Yikri 38 - SEBR SÕNGO

Yũ-noog maan-kugri

¹ B Kaa yũ-noog maan-kugrã ne gõ-miig ra-pegdo. A woglem yaa kãntɩɩs a nu, a yalem kãntɩɩs a nu, dɩlla a kɩrems a naasa fãa zema taaba; a zãndlma yaa kãntɩɩs a tã.

² B ninga yɩdba a kɩrems a naasa fãa n bolg zũud a zugu.

³ B yõga maan-kugra teed fãa: bug-rɩɩnda laase, kardo, zɩɩm sĩmbi, kõsã la wisda laase. Te-bãmb fãa yõga ne zũudu.

⁴ B maana kut gãmbre n gilg maan-kugrã, b ning-a-la tẽngre la a zẽkame n ta a pʋɩ-sʋka.

⁵ B ninga zũud kags a naase, kɩremsã, ra tuiidsa yĩnga.

⁶ B peesa ra tuiidsã n maneg n bolg ne zũudu.

⁷ B tuii b kagsã maan-kugra zẽkr yĩnga. Maan-kugra pʋg ra yaa vɩʋʋgo.

Ko-sĩnga

⁸ B maana zũud ko-sĩngã. A sẽn dog bũmb ning zuga me yaa zũudu. Pagba sẽn da gãe sɛka rooga noora zũuda nin-gɛtsã la b reeg n kud dẽnd fãa.

Zaka

⁹ B maana zaka. Yaa pɛɛl sẽn wʋg ne gĩs kegemse la b tak n gilgi. Nug rɩtgo b woglma yaa kãntɩɩs koabga.

¹⁰ Pɛɛla ra sogda wanzurf ribli sẽn ning gaagdse la sẽn tɩ gaagd zũud ra-lug gils sẽn tong taab pisi la sẽn sel te-sends pisi zutu.

¹¹ Nug goabga, le yaa kãntɩɩs koabga la peenda tak yã. Ra-lugsa sẽn ya gilsa me yaa pisi, b te-sendsa me boto.

¹² Sẽn lebd nin-taoore, yaa kãntɩɩs pis-nu la zaka yalem, la pɛɛla ra loe ra-lugs gils piiga sẽn sel zũud te-sends piig zutu.

¹³ Sã n ya yaangã yalma yaa kãntɩɩs pis-nu.

¹⁴ Yaa kãntɩɩs piig la a nu la pɛɛla reng n loe ra-lugs gils a tã sẽn sel te-sends a tãab zutu.

¹⁵ Yaa kãntɩɩs piig la a nu la pɛɛla leb n tɩ loe ra-lugs gils a tã sẽn sel te-sends a tãab zutu. Woto b basa noor sʋka sẽn ta kãntɩɩs pisi.

¹⁶ Rooga pɛɛla wʋga ne gĩs peelse sẽn maneg n dĩngi tɩ ya kẽnkẽ.

¹⁷ Ra-lug gilsa sẽn sel bũmb niyns zuta rõoga ne zũudu, tɩ ribli wã ne b gaagdsa ya wanzurfu. Ra-lug gilsa zuta ra bolga ne wanzurfu; ra-lug gilsa ra soga taab ne wanzurf ribli la gaagdse.

¹⁸ Dooga noor peendã da maneg n bukame la b wʋg-a-la ne gĩs mismiidu, gĩs moam yʋs, gĩ bãanese. A woglem yaa kãntɩɩs pisi, t'a zãndlma yaa kãntɩɩs a nu, wala pɛɛl a taabã.

¹⁹ A ra-lug gils a naasã ne b te-sendsã da yaa zũudu. Yaa wanzurf ribli la gaagdse n da sog-b ne taaba. Ra-lug gilsa zuta bolga ne wanzurfu.

²⁰ Sɛka roog biili ne zaka rẽnna, fãa ra yaa zũudu.

Teeda geelgo

²¹ Ad kutã, sãnema, wanzurfã sẽn tall n maan doogã, la kuga walsa koglgã geelse. A Moyiiz sẽn yeel b rãmb tɩ b maan geelsã yɩɩ Levitse; maan-kʋʋd a Aarõ biiga, a Itamar, n deeg kãsengo.

²² A Uri biig a Besalɛl, a Ur yagengã, Zɩɩda sak nedã, n tʋm tʋʋma wala Soaala-Wẽnd sẽn da wilgã.

²³ Sẽn yɩ-a a sõangda, yɩɩ Dã sak ned, a Ayisamak biiga Ooliab: yẽ ra mii kug peesgo, raad peesgo, peend bukri, peen yũnugri, n yũnug tɩ lebg mismiigu, miigu, moomd yʋs.

²⁴ Sãnema zãng sẽn tall n wa kõ Naaba-Wẽnd rooga tʋʋm yĩng zɩslem taa neb pis-naas la a tã zɩɩbo. Sãnem gila maga wa b sẽn minim n magd-a Wẽnd waoogra zĩigẽ.

²⁵ Israyɛl kamba sõadga wakato, b da reega wanzurf gil sẽn ta neb koabg la pis-nu zɩɩbo. (Magba tũu Wẽnd waoogr do-sõngẽ dẽnna.)

²⁶ Dẽ wilgdame tɩ ned kam fãa kɩsa wakɩ koɛɛng pʋɩ-sʋka. Yaool n yɩɩ rap bal la b sõd yã. Yaa neb niyns yʋʋm sẽn da ta pisi bala. Yɩɩ neb tus kobs-yoobe la a tã la kobs-nu la pis-nu.

²⁷ B rɩka wanzurf zɩslem sẽn ta neb koabg la pis-nu zɩɩbo n yẽneg n maan teeda sẽn na n sel zĩig ningã, Soaala-Wẽnd waoogr ro-sõnga ra-lugsi la peen-lilla raad yĩnga. Te-sendsã yɩɩ koabga, la wanzurf sẽn ta nin-tɩɩg zɩɩbo la b rɩk n dõog te-sendg a ye.

²⁸ B rɩka wanzurf sẽn ta nin-yend zɩɩbo n dõog ra-lugsa bãn-sogse la b kell n bolga zũuda ra-lugsa zutu la b kud bãn-tuiidsã sẽn tuiid ra-lugsã.

²⁹ B sẽn wa ne zũuda taa neb koabg la a yoob zɩɩbo.

³⁰ Dẽ la b rɩk n kud sɛka rooga noor ra-lugsa te-sendse, yũ-nood maanda maan-kugri ne a gãmbrã la a teed a taabã.

³¹ Zaka ra-lugsa te-sendse, dooga noorẽ dẽnna, sɛk rooga rẽnna, bãn-kaadsã, fãa yɩɩ zũudu.