Yikri 36 - SEBR SÕNGO

¹ Yɩɩ wala Soaala-Wẽnd sẽn da wilg-bã la a Besalɛl, a Ooliab la neb a taaba sẽn da paam sɩlem la bãngr n na tʋm dooga tʋʋmna, wẽneg n sɩng b tʋʋmde.

Teeda sekame

² A Moyiiz boola a Besalɛl, a Ooliab la neb a taabã sẽn da paam sɩlem la bãngre n paas sẽn da tar-b tʋʋmda sũuri n yet tɩ b na n tʋm-a lame wã.

³ B waa n deega a Moyiiz nengẽ bũmb ning fãa a Israyɛl kamba sẽn wa ne, Soaala-Wẽnd waoogr ro-sõnga yĩnga. La beoog sã n vẽege a Israyɛl kamba da ket n tara waoongo ne b kũuni.

⁴ Woto tʋʋm mitbã sẽn da sɩng-b tʋʋmna n na n ti roogã, kong n yalsame.

⁵ B waa n yeela a Moyiiz: «Neba sẽn ket n wat ne kũuna yaa n yɩɩda Wẽnd daabo.»

⁶ Dẽ la a Moyiiz kɩt tɩ b moon tẽnga pʋga: «Marsã tɛka bɩ ned ba a ye, pag bɩ rao, da le wa ne bũmb Wẽnd waoogr ro-sõnga yĩng ye.» B gɩdga neba tɩ b ra le wa ne kũun ye.

⁷ Teeda sẽn wa wã da sekda roogã n mabge.

Sɛka roog tii ne pɛɛla

⁸ Yaa tʋʋm-mitb gill la b yãk rooga tiib yĩnga. B wʋga pɛɛl piig ne gĩs bãanese, gĩs mismiidu, gĩs miidu, gĩs moam yʋs, b buka peenda zugu, rũmsi sẽn naag n tar nao a naase la pɩgsa la ninsaal nenga.

⁹ Peend a ye fãa woglem yaa kãntɩɩs pisi la a nii t'a yalma ya kãntɩɩs a naase. Pɛɛla fãa ra zema taaba.

¹⁰ B deng n dɩka pɛɛl a nu n bogl taaba, n le rɩk a nu n bogl taaba.

¹¹ B rɩka pe-kõbd gĩs mismiidu n wʋg wĩ n loe peen-satga noore; b le maana boto me ne a to wã.

¹² Peend satg a ye fãa noore yaa wĩ pis-nu la b loe yã; peend satsa a yiiba fãa wĩ loeme tɩ b tot taaba.

¹³ B kuda sãnem sogds pis-nu, peela loees yĩnga, la b sã n sɩd loe, lebga wa peend yɛnga.

¹⁴ B wʋga peen-tagdo me ne bʋ-kõbdo, bãmb piig la a ye sẽn na n wa gãneg rooga zugu.

¹⁵ Peend fãa woglem yɩɩ kãntɩɩs pis-tã, t'a yalem tat kãntɩɩs a naase. Pɛɛla fãa ra zema taaba.

¹⁶ B rɩka pɛɛl a nu n bogl taaba la b rɩk a yoobã sẽn kellã n bogl taaba.

¹⁷ Peen satga noorẽ, b ninga wĩ pis-nu, a to wã me wĩ pis-nu.

¹⁸ B kuda sãnem sogds pis-nu n na n wa loe pɛɛla tɩ yɩ wa peen-yɛng.

¹⁹ Rooga yĩnga b le sẽe pɛɛla, n sẽ pe-raad gãn sẽn los monem la b sẽ gãnd sẽn ka yũnd koom, dooga sugr pilb yĩnga.

²⁰ Rooga yĩnga b rɩka gõ-miig ra-pegdo n ka-b taab a naas-naase, n bas võ yaleng tẽnsʋka, n yik-b n yals yĩngri. Bãmb boondame tɩ ra-lug-yalemse.

²¹ B zãndlem yɩɩ kãntɩɩs piiga, tɩ b yalem yaa kãntɩɩg la pʋɩ-sʋka.

²² B kaa ra-pegda tɩ tʋʋgd zĩis a yi, b selb yĩnga, la b sel-b lame n pẽneg taaba.

²³ B tonga bãmb pisi, nug rɩtgo.

²⁴ B maana wanzurf te sends pis-naase la yaa bãmb zut la b sel ra-lug-yalensã, ra-lug-yaleng fãa yaa te-sends a yiibu, la yɩɩ woto n tonge.

²⁵ Nug goabg ra-lug-yalensa me na n tonga pisi.

²⁶ B wanzurf te-sendsa yaa pis-naase, a yiib ra-lug-yaleng fãa tẽngre. La yɩɩ woto n tonge.

²⁷ Rooga nin-taoor yɩɩ ra-lug-yalens a yoobe.

²⁸ Rooga nin-taoor pẽgsa reega ra-lug-yalens a yiibu sẽn na n paas tiiba pãnga.

²⁹ Tẽngrã b ra yaagame, la yĩngrã b tɩ naag n sogda ne pipi kakã. Ra-lug-yalensa sẽn na n paas pãnga sogame n wẽneg taaba.

³⁰ Dɩlla nin-taoorã yɩɩ ra-lug-yalens a nii la wanzurf te-sends piig la a yoobe, ra-lug-yaleng fãa te-sends a yi.

³¹ B peesa ra-paadse ne gõ-miiga, bãmb b nu kɩreng a ye fãa yĩnga.

³² Rooga kɩreng a to wã me yɩɩ bãmb b nu. Sẽn lebd mogra sẽnẽ kɩrenga le yaa bãmb b nu.

³³ Tʋʋm-mitba gesame n bog raado n pɩk ra-lug-yalemsã b zãndlem pʋɩ-sʋka, rooga sɩngre, n ta a sɛɛbo.

³⁴ B bolga raada sãnem. B kuda sãnem kagse n tui ra-paadsã la bãmb me bolga sãnem.

Peenna

³⁵ B wʋga peen-lilli ne gĩs mismiidu, gĩs miidu, gĩs moam yʋs, gĩs bãanese la b buka peenda zugu rũms sẽn naag n tar nao a naase la pɩgsa la ninsaal nenga. Sɩd yɩɩ tʋʋm-mit tʋʋmde.

³⁶ B yagl-a-la ra gils a naas sẽn bolg sãnem la sẽn ka sãnem kaadse. B maana wanzurf te-sendse a naas b yĩnga. B sẽn na n dogl bũmb niyns zutã yaa wanzurf, bãmb b naase.

³⁷ Rooga noore b ninga peend sẽn wʋg ne gĩs miidu, gĩs mismiidu, gĩs moam yʋs, gĩs peelse wa mitba sẽn wʋgdã.

³⁸ Peen-kãng yagla raad a nu sẽn bolg sãnem la sẽn tar sãnem kaadse. B bolga ra-lugsã ne b bãn-sogdsã ne sãnem la b dõoga zũud te-sends a nu b yĩnga.