Yikri 35 - SEBR SÕNGO

Sɛka roog tiibu

¹ A Moyiiz tigma Israyɛl kamba, n yeel-ba: «Ad Soaala-Wẽnd sẽn yeel tɩ y maan bũmb ninga.

² Dasem a yoob pʋgẽ b tʋmdame la daar a yopoe soaba yaa ra-sõngo, vʋʋsg daare, Soaala-Wẽnd waoogr yĩnga. Ned ninga fãa sẽn na n tʋm-a baraare, b na n kʋ-a lame.

³ Da widg-y bugum vʋʋsga daare, zĩig ba a ye, y zakẽ ye.»

Neba kõo ne sũuri

⁴ A Moyiiz taasa Israyɛl kambã Soaala-Wẽnd noor kãnga:

⁵ «Yãk-y y sẽn tare n kõ Soaala-Wẽnde. Sẽn nonga n bao n kõ Wẽnde, bɩ a wa ne woto: sãnem, wanzurfu, zũudu,

⁶ gĩs mismiidu, gĩs miidu, gĩs moam yʋs, gĩs sẽn maneg n dĩngi, bʋ-kõbdo,

⁷ pe-raad gãndo sẽn los monem, gãnd sẽn ka yũnd koom, raado,

⁸ kaam sẽn na n ning fitila, kaam sẽn tar n zɛɛdẽ, tɩdar sẽn tar yũ-noogo;

⁹ kug sẽn moog wa rulg lɛlma, kug neeb sẽn na n tall n zap sãnem-pɛ-m-poore la sãnem-pɛ-m-yãoogo.

¹⁰ Neb niyns fãa sẽn be yãmb sʋk n tõe n maan bõn-neer fãa, bɩ b wa sõng tɩ Soaala-Wẽnd sẽn data tõog n pidsi.

¹¹ Yaa sɛka roog ne a pɛɛla, a kɩremsã la zug tẽnsʋk peen-tagdã, loetsã, ra-lugsã, ra-lug gilsã, ra-paadsã, b sẽn send bũmb niyns zutã.

¹² Yaa koglgã ne a ra-tuiidsã, la a lingã, yaa peen-lillã;

¹³ te-roagendgã ne a ra-tuiidsã la a te-neebã, bura sẽn ya Wẽnd pʋɩɩrã.

¹⁴ N paas fitilsa ne b kaama.

¹⁵ N paas tɩdara maan-kugrã ne a ra-tuiidsã, kaam sõngã, tɩdar bãanegã, rooga noor peen-kãsengã.

¹⁶ N paas yũ-noog maan-kugrã ne a kut gãmbrã, ko-sĩngã, ne a sẽn dog bũmb ning zugã.

¹⁷ N paas zaka pɛɛla, a ra-lugsã ne raada sẽn send zĩig ningã, zaka noor peendã.

¹⁸ N paas rooga ne zaka raado la wĩya.

¹⁹ N paas fu-bɛdã, maan-kʋʋr futã, a Aarõ ne a kamba rẽnna.»

²⁰ Israyɛl kamba fãa basa a Moyiiz n leb b zagsẽ.

²¹ Yamleoog tʋʋm-tʋmdba fãa waame. Neer baoodba fãa talla b kũuni n wa kõ Soaala-Wẽnde, sɛka roog tiib yĩnga, fu-sõma wã wʋgb yĩnga.

²² Rap ne pagb waame, ne yamleoogo, b waa ne b fan-teedo: zũya, nug-bĩnsi, fan-teed buud fãa sẽn dõog ne sãnem, la b rɩk-b-la fãa n tees la b kõ Soaala-Wẽnde wa b sẽn maan ne sãnema.

²³ Ned ning fãa sẽn da tara gĩs mismiidu, gĩs miidu, gĩs moam yʋs, gĩs bãanese, bʋ-kõbdo, pe-raad gãndo sẽn los monem, gãnd sẽn ka madgd koom, a tall-b lame n wa.

²⁴ B waa ne b wanzurf bɩ zũudu n kõ Soaala-Wẽnde. B waa ne ra-sõma tʋʋmda yĩnga.

²⁵ Pagb niyns sẽn da mi-b lamd wĩib sõmb-sõmbo, wĩi gĩ-bãanese, gĩs moam yʋs gĩs miidu, gĩs mismiidu.

²⁶ Sẽn da rat-ba la sẽn da mi-b bʋ-kõbd gĩs wĩib waame.

²⁷ Kãsem-dãmba waa ne kug moama, ne kug neeb a taab sẽn na n zap sãnem-pɛ-m-poore la sãnem-pɛ-m-yãoogo,

²⁸ b waa ne bõn-yood sẽn tar yũ-noodo, fitila kaama la ka-sõnga yĩnga, b waa ne tɩdar bãanegã.

²⁹ Rapã la pagbã sẽn da rat ne sũuri n maan tʋʋma wala Soaala-Wẽnd sẽn wilgã, fãa tẽegame tɩ b yaa Israyɛl kamba la b waa ne b kũuni n kõ Soaalã.

Tʋʋm-tʋmdba sɩngdame

³⁰ A Moyiiz yeela Israyɛl kambã: «Ade, yaa a Besalɛl, a Uri biiga, a Ur yagenga, a Zɩɩda sakẽ neda, la Soaala-Wẽnd yãk yã.

³¹ B kõ-a-la sɩlem gongo, dabar la bãngr kãsenga t'a tõe tʋʋm buud ka tɛka.

³² A tõe n yãenda a yamẽ la a maan ne a nugu sãnem teedo wanzurfu, zũud teedo;

³³ a tõe n peesa kug-bõonego tɩ b yãgd b toore; a tõe n peesa raado, a tõe bũmb fãa.

³⁴ Soaala-Wẽnd kõ-a lame wala b sẽn kõ a Ooliab, a Dã sakẽ nedã, yam sẽn na n zãms b taab tʋʋma.

³⁵ B kõ-b-la yam la sɩlem tɩ b tõe tʋʋm buud fãa wala kug neeb peesgo, peen-neeb bukri, ne gĩs bãanese, sʋlg meng tʋʋmde; b tõe n yãenda b yamẽ tʋʋm buud toɛ-toɛ yã la b maan-b ne b nugu.»