Yikri 33 - SEBR SÕNGO

Israyɛl le rɩka sore

¹ Soaala-Wẽnd yeela a Moyiiz: «Loog ne f neba f sẽn yiis Ezipt tẽngã, dɩk sore, yaa tẽnga sore, tẽng ning m sẽn kãab a Abraam, a Izaak la a Zakoob tɩ m na reeg-a n kõ m kamba.

² M na n tʋma malɛk f taoore t'a pĩng Kanaã rãmba, Amoritsã, Ititsã, Perizitsã la Zebuzitsã f taoore. Tɩ kẽe-y tẽng sẽn bund bĩisim la sɩɩdo.

³ Mam ka na n yãag-y ye tɩ yãmb ka reegd noor ye la m sã n belg m meng n yãag yã, m na n kʋ-y-la zãng sor zugu.»

⁴ Neba sẽn bãng tɩ Soaala-Wẽnd zabdame, b maana wa kʋ-biisi, fuug sẽn wẽnd kibs fuug ka yeelg baraar ye.

⁵ Wẽnnaam wilga a Moyiiz t'a yeel a Israyɛl kambã: «Yãmb tara tõatb zʋgo. M sã n yãag yã n kẽn bilfr bala, m na n kʋ-y-la zãnga. Yãgs-y y fan-teedã tɩ m bãng m sẽn na zã-y zãab ninga.»

⁶ Yaa rẽ la Oreb tɛka, Israyɛl kamba ka le ning fan-teed ye.

Sɛk roogo, roog sẽn ti ne pɛɛla

⁷ A Moyiiz zãaga wʋsgo n ti roogã. A bool-a lame tɩ sɛk roogo. Ned ninga fãa sẽn da tara koɛɛg n dat n sok Wẽnde, a ra yit n taa sɛka roog sẽn da ti n zãag ne sikã.

⁸ A Moyiiz sã n da yi n digd dooga sẽnẽ, ned kam fãa da yikdame n yaas a roog noore n get a Moyiiz t'a wa ta sɛk roogã.

⁹ A Moyiiz sã n wa kẽed doogã, sawadg me n sigd n yaas dooga noore la koɛɛg n da yit be t'a Moyiiz kelgdẽ.

¹⁰ Sawadga sã n wa yaas rooga noore, ned kam fãa zĩndida a doog noor n wõgemd tẽnga.

¹¹ Soaala-Wẽnd ne a Moyiiz ra sõsda ne taaba wa ned ne a zoa. A Moyiiz mi n lɛɛgd n wa neba sʋka, a rakõorã, a Zozuwe, a Nun biiga bal n da paad do-sõnga pʋga.

Wẽnd ne a Moyiiz sõasga

¹² A Moyiiz yeela Soaala-Wẽnde: «Yãmb meng n yeel maam tɩ m kɩt tɩ neba rɩk sore la y ka wilg ned ning sẽn na n paas maam ye. Yãmb da yeelame tɩ y mi-la m tiiri la y sɩd zoe-la m nimbãanega.

¹³ Sã n ya sɩd tɩ y ka yi m poorẽ, bɩ y wilg maam y raabo tɩ m bãng la m deeg tɩ y ket n be-la m poorẽ. Bãng-y tɩ nin-bãmba yaa yãmb neba.»

¹⁴ Soaala-Wẽnd leokame: «M na n lʋɩ-la f taoore tɩ f paam n kẽ vʋʋsga tẽngẽ?»

¹⁵ T'a Moyiiz paas: «Y meng y toor sã n ka na n tũ bɩ y ra sak tɩ d yi ka ye.

¹⁶ Kaset bʋg la m tar n na n bãng tɩ zood n be tõnd sʋka, maam ne yãmb la yãmb ne y neba sʋka? Kaset n le bee n yɩɩd d sã n tũud taab bɩ? Y sã n tũud tõndo, neba kõn bãng tɩ yãmb n welg maam ne y neba toore, dũni wã pʋgẽ sɩda?»

¹⁷ Soaala-Wẽnd yeela a Moyiiz: «M na n maan wala fo sẽn kos maama tɩ m nong-f lame la m maam n welg-f toore.»

¹⁸ A Moyiiz kos-b lame: «Wilg-y maam y ziirã!»

¹⁹ Tɩ Soaala-Wẽnd yeele: «M na n looda f taoore, n wilgd-f m nonglma sẽn ta zĩig ninga la m togsd m yʋʋre: Naaba-Wẽnde. M zoeta m sẽn dat a soab nimbãanega la m kõta m sẽn dat a soab sugri.

²⁰ La ade, fo ka tõe n yãe mam neng ye, tɩ ned ka yãet mam neng n le vɩɩnd ye.

²¹ Soaala le yeelame: Ad vɩʋʋg m sɛɛgẽ, ad pĩigã.

²² M sã n wa lood ne m ziira, m na kẽes f pĩiga bokẽ, m na solg f ne m nug, m loogra wakato.

²³ M na yaool n yãk m nugã tɩ f yãend m zãkudga; sã n ya m nengã, ad nenga ka tõe n yãend ye.»