Yikri 31 - SEBR SÕNGO

Sɛka roog tʋʋm-tʋmdba

¹ Wẽnnaam yeela a Moyiiz:

² «Ade, m yãka a Besalɛl, a Uri biiga, a Ur yagenga, a Zɩɩda sak neda.

³ M kõ-a-la sɩlem, bãngre, minim la tʋm-tɩ-b-pẽg tõogo, bũmb wʋsg yĩnga.

⁴ A tõe n yãenda a yamẽ la a maan ne a nugu sãnem teedo, wanzurf teedo, zũud teedo.

⁵ A tõe n peesa kug sẽn yãgd b toore n maan fan teedo, n maneg n ning ned kam a zĩigẽ tɩ sakd gesgo; a tõe n peesa raado; d yeel vugr bala t'a tõe n maana fãa.

⁶ M na n kõ-a-la ned sẽn na n sõng-a: yaa a Ayisamak biig a Ooliab, a Dã sakẽ neda. M kõo neb a taab me yam la sɩlem sẽn tõe maan m sẽn dat tɩ b maane.

⁷ Bãmb n na n maan roogã, koglg ning sẽn na n pag kuga walsã, koglga ne a lingã, sɛka roog teedo;

⁸ te-roagendga ne a teedã, fitila sẽn ya bõn-neer mengã, tɩdar maan-kugrã,

⁹ maan-kugrã ne a teeda fãa, ko-sĩnga ne a sẽn dogl bũmb ning zugã,

¹⁰ fu-sõma wã, maan-kʋʋra futu, a Aarõ ne a kamba sẽn yeelgdã,

¹¹ ka-sõngã, tɩdar bãanegã. B sã n sɩng b tʋʋmna, bɩ b tũ m sẽn wilgã.»

Vʋʋsg daare

¹² Soaala-Wẽnd kosa a Moyiiz

¹³ t'a yeel Israyɛl kamba: «Deeg-y vʋʋsga noor neere tɩ vʋʋsga daar m sẽn yalsã yaa kaset sẽn ya sõmbo, kaset tɩ yãmb ne y kamba miime tɩ maam y Wẽndã n welg y toore.

¹⁴ Reeg-y vʋʋsga noore tɩ yaa daar sẽn tog ne waoogre, sẽn tõdga noor kãnga n tʋm tʋʋmd baraare toga ne kũum.

¹⁵ Tʋʋmda tʋmda dasem a yoobe, la a yopoe daarã zãnga b vʋʋsdame, sẽn tʋma badaare, b kʋʋd-a lame.

¹⁶ Israyɛl kamba na n deega vʋʋsga noore zamaan woo zamaana. Yaa zood sẽn ka tog n sãam kaseto.

¹⁷ Maam ne a Israyɛl kamba yĩnga, a yaa tẽegre, wakat buud fãa tẽegre tɩ m tʋma dasem a yoobe, n naan yĩngr la tẽnga, la daar a yopoe soaba b vʋʋsame n ka tʋm ye.»

¹⁸ Wẽnd sẽn gom ne a Moyiiz n sɛ, b kɩs-a-la kug wals a yi, yaa kug walse la Wẽnd meng b toore n gʋls-b ne b nugu.