Yikri 30 - SEBR SÕNGO

Tɩdar maan-kugri

¹ Soaala yeela a Moyiiz: «F na n maana maan-kugri la yaa yẽ zug la f na n yõog tɩdarã. F na n maan-a-la ne gõ-miig ra-pegdo.

² A woglma yaa kãntɩɩga, a yalma me boto; dɩlla a kɩremsa fãa zema taaba. A zãndlma yaa kãntɩɩs a yi: Ning-a yɩdb a naase sẽn naag n ya bũmb a ye ne-a.

³ Bao sãnem meng n bolg a zugã, a kɩremsã la a yɩdbã. Bao sãnem n mobg-a zãnga.

⁴ Ning a kɩrems a yiibã sãnem kags a naase. Yaa raad a yi la b na n wa tui kagsã n tõog n zẽkd maan-kugrã.

⁵ F na n peesa gõ-miig raado n maan dasaba f sẽn na n bolg ne sãnem.

⁶ Maan-kugra na n dɩgla peend ning sẽn luta kuga walsa koglga taoore, tɩ koglg kãng zug la m na n kõ-y sɛka.

⁷ Yibeoog fãa a Aarõ na n yõoga tɩdar zom sẽn tar yũ-noogo, a sã n wa manegd dooga bugma.

⁸ Zaabre me a sã n wa ne kaam n na n ning fitilsã, a na n le yõoga tɩdarã. Tɩdara sẽn yõogd Wẽnnaam taoorã yaa bũmb sẽn na n maan zamaan woo zamaana.

⁹ Maan-kugr kãnga zugu y kõn yõog tɩdar zaalg ye, y kõn yõog yũ-noog maoong ye, y kõn dɩgl kũun a zug ye, y kõn kɩrg rãam bɩ kaam ye.

¹⁰ Yʋʋmd-yʋʋmd fãa, a Aarõ na n kosame tɩ Wẽnd zãag-a ne rẽgdo. A na n taaga yɩdba ne zɩɩm. Yʋʋmd-yʋʋmd fãa, na n yɩɩ sugr kosg kibs kãsenga raare la a Aarõ na n dɩk rũnga zɩɩm n taag maan-kugra yɩdba, a pekr yĩnga. Na n yɩɩ woto zamaan sẽn wate tɩ maan-kugra pa a sõmblema zĩigẽ zãnga.»

Yaood yelle

¹¹ Wẽnnaam goma ne a Moyiiz:

¹² «F sã n wa sõd Israyɛl kamba sẽn ta sõadga, n bãng b sẽn zem to-to, kɩt tɩ ned kam fãa kɩs Wẽnd a yaoodo. Woto sõadga wakato tẽn-kũum kõn zĩnd ye.

¹³ Sẽn sõd a soab fãa kɩta ligdi. Neb a yi yaa wakɩ koɛɛnga, wala b sẽn dɩt a soab Wẽnd waoogra zĩigẽ.

¹⁴ Yaa ned ninga yʋʋm sẽn ta pisi bal la b sõta la yaa sẽn be-a sõadgẽ n kɩt yaoodã.

¹⁵ Arzɛk rãmba, naong rãmba, b fãa kɩta bũmb a ye: wakɩr koɛɛng pʋɩ-sʋka. Yaooda reegda Soaala-Wẽnd yĩnga n na n fãag f yõore.

¹⁶ Ligd kãnga me n yãkd sɛka roog tʋʋma yĩnga. Woto maam, Naaba-Wẽnd, na tẽeg Israyɛl dãmba yelle, n fãag b yõore.»

Ko-sĩnga

¹⁷ Wẽnnaam goma ne a Moyiiz:

¹⁸ «Maan sĩnga, koom waasg yĩnga. A menga yaa zũudu, a sẽn na n dogl bũmb ninga zuga me yaa zũudu. Ning-a zaka pʋga, maan-kugrã ne sɛka roog tẽnsʋka. Pids-a ne koom.

¹⁹ Be la a Aarõ na n toog n waas a nus la a nao.

²⁰ B sã n na n kẽ rooga pʋg bɩ b reng n waas n da wa ki ye. B maan boto me b sã n kolgd maan-kugrã n na tʋme, n na n yõog yũ-noog maoong, Soaala-Wẽnd yĩnga.

²¹ B na n peka b nus la b nao n da wa ki ye. A Aarõ ne a kamba yĩnga, dẽ yaa noor sẽn ka tõe n teem abada.»

Kaam sõngo

²² Wẽnnaam yeela a Moyiiz:

²³ «Bao bõn-yood sẽn tar yũ-noog wʋsgo wala: gondre-yẽoog sũm koaaga: wakɩ-koeems kobs-nu; wala yulun-yuuga: wakɩ-koeems kobs-yi la pis-nu; wala wal tʋko: wakɩ koeems kobs-yi la pis-nu;

²⁴ wala barkudga: wakɩ koeems kobs-nu, wakɩr wala b sẽn dɩt a soab Wẽnd waoogra zĩigẽ, n paas la-pogbr ne oliviye kaam; lens a nu n pit laagã.

²⁵ Dɩk-ba n kalem taaba n maan ka-sõngo; sõng t'a yũuga yɩɩ noog wa mitba rẽnna. Yẽ n na n yɩ ka-sõngo.

²⁶ F na n yãk-a-la me n taag roogã la kuga walsa koglgã,

²⁷ te-roagendga ne a teedã, sãnema fitil kãsenga la tɩdara maan-kugrã;

²⁸ yũ-nood maanda Maan-kugra ne a teedã, sĩnga ne a sẽn dogl bũmb ning zugã.

²⁹ Welg-b toore, Wẽnd yĩnga, la bũmb ning fãa sẽn na n sɩɩs-b na n lebga bõn-sõngo.

³⁰ F na n yãka ka-sõngã n taag a Aarõ ne a kamba, n welg-b toore maan-kʋʋra yĩnga.

³¹ F na n yeela Israyɛl kamba woto: Bãng-y tɩ ka-kãnga yaa ka-sõng zamaan woo zamaana, mam yĩnga.

³² Ka-kãnga ka taagd ned yaare ye; da maan kaam sẽn wẽnd-a ye, yaa bũmb sẽn ya bõn-sõngo n na n kell n yɩ sõngo.

³³ Ned ninga fãa sẽn na n mams a buudu n dɩk n taag nin-zaalga, b na kʋ a soaba.»

Tɩdare

³⁴ Wẽnnaam yeela a Moyiiz: «Ning pãng n paam bõn-yood sẽn tar yũ-noodo wala naglɛng, wala soompiiga, wala wisao, la tɩdar menga. Bao tɩ b zeng taaba.

³⁵ Kalem b taaba n wa yãkd n lobd bugmẽ. Kalem b wala mitba sẽn maandã, tɩ yɩ sõmbo la tog ne pẽgre.

³⁶ To-b tɩ b lebg zom tɩ f yõgen-b rooga pʋga, sɛka roogẽ. Y na n ges-b-la wala bũmb sẽn ya sõngo.

³⁷ Da maan-y bũmb sẽn wẽnd-a y meng yĩng ye, ges-y tɩdarã wa bõn-sõngo, bũmb sẽn welg toor Wẽnd yĩnga.

³⁸ Ned ninga fãa sẽn na n togs n maan a buudu n tar a yũugã n kokdẽ, b na n kʋ-a lame.»