Yikri 29 - SEBR SÕNGO

Wẽnd welgda a Aarõ ne a kamba

¹ Soaala yeela a Moyiiz: «Ad-f sẽn na n maan bũmb ninga, n kõ a Aarõ ne a kamba b maan-kʋʋr tõogo. Bao lʋll a ye la pe-raad a yi sẽn ka tar bãnde.

² Dɩk bur sẽn ka ning bɩlle, samsa, miisd me sẽn ka lob bɩlle, sẽn dʋg ne kaam la sẽn wẽ ne alkam zom sẽn ka kalem bũmb a to.

³ F na n ning-b-la peoog a ye pʋgẽ la f na n naaga peoogã ne lʋllã la piis a yiibã n kõ Wẽnde.

⁴ Kɩt t'a Aarõ ne a kamba wa rooga noor n so koom.

⁵ Yeelg a Aarõ fu-bilã, fu-kãsengã ne sãnem-pɛ-m-poore la sãnem-pɛ-m-yãoogo. Maneg-ba n sog taaba.

⁶ Fõgneg-a a pugla la loe gʋlsma a rĩirẽ.

⁷ Dɩk kaama marsã n daag a zugu n maneg n sõoge.

⁸ Kɩt t'a Aarõ kamba me kolg tɩ f yeelg-b b fu-yordã.

⁹ Ning sẽbdsã b sɛɛsẽ, a Aarõ wala a kamba, fõgneg b pugli wã b rĩirẽ la woto b na reeg maan-kʋʋr tõog zamaan sẽn kõn sɛ yĩnga. Yaa woto la f na n kõ a Aarõ ne a kamb maan-kʋʋr naam.

¹⁰ Kɩt tɩ b wa ne lʋllã, sɛka roog noore. A Aarõ ne a kamba nus na n sɩɩsa naafa zugu.

¹¹ Kʋ naafã m taoore, sɛka roog noor.

¹² Tẽk a zɩɩma ne nug-bila n taag maan-kugra yɩdb a naasã, dɩk zɩɩma n daag maan-kugra sɛɛga.

¹³ Wobg yãooda kaam, tõsg sãoora vã-minima, yɩɩm a yiibã ne b kaama, n yõog maan-kugra bugmẽ.

¹⁴ Yaa sugr-kosg maoongo, maan-kʋʋdba yĩnga. Zãag ne rotã n yõog naafa nemdo, a gãongo, a bĩndã.

¹⁵ Kɩt tɩ b kolg ne pesg a ye t'a Aarõ ne a kamba le sɩɩs a zugu ne b nusi.

¹⁶ Kʋ pesgã, dɩk a zɩɩma n mes maan-kugrã n gilgi.

¹⁷ Pas pesgã, pek a yãadã ne a karsã, dɩk nemda ne zugã n dogl taaba.

¹⁸ Yõog-b zãng maan-kugra zugu tɩ yaa yũ-noog maoongo sẽn na n sigs Soaala-Wẽnd sũuri. Yaa maoong sẽn yõog bãmb waoogr yĩnga.

¹⁹ Kɩt tɩ b wa ne pe-raoog a to wã t'a Aarõ ne a kamba le tẽeg b nus n sɩɩs a zugu.

²⁰ Kodg-a, rɩk a zɩɩma n taag a Aarõ rɩtg tʋbre, a kamba me boto, b rɩtg nug-raado, b rɩtg nao-raado. Dɩk zɩɩma sẽn kellã n daal maan-kugrã n gilgi.

²¹ Yãk zɩɩma maan-kugra zugu, yãk kaam sõnga me n paas n mes a Aarõ ne a futu, a Aarõ kamba ne b futu. Yẽ ne a futã na n lebga bõn-sõma, a kamba me ne b futã na n lebga bõn-sõma sẽn welg toore.

²² Maan-kʋʋra tõoga reegre tʋɩsda ne pe-raoog a yiib soaba maoongã. Dɩk pe-raooga kaam, a zʋ-kɛɛgã, kaam sẽn mobg yãadã, tõsg sãoora vã-leg-legã, yɩɩm a yiibã ne b kaama la rɩtg gerã.

²³ Dɩk bur sẽn ya gilga, samsa, miisgu sẽn be peooga pʋga peoog ning sẽn dɩg m taoorã.

²⁴ Dɩk rẽ fãa n sagl a Aarõ ne a kamba nugẽ, la f yeel-b tɩ b dɩkd-ba n tees maam.

²⁵ Lebs n deeg-ba n yõog m taoore, wala pipi rũngã. Na n yɩɩ maoong sẽn yõog tɩ rɩ zãnga, tɩ m na n kok a yũ-noogã.

²⁶ Pesg kãng sẽn kʋ, a Aarõ tõoga deegr yĩnga, dɩk a yãoogã n mak kũun makre, m taoore, la foom n na n soog rẽnna.

²⁷ F na yeele tɩ pesga yãooga ne a gerã sẽn dɩk n tees maama lebga bũmb sẽn ya sõngo, sẽn welg toore.

²⁸ Yaa rẽ me yĩnga la Israyɛl kamba na n yãk wakat buud fãa, yãoog la gere, b sã n kʋ rũng maoongo tɩ rẽ n lebg a Aarõ ne a kamb pʋɩɩre.

²⁹ A Aarõ sã n wa kaẽ, yaa a kambã n na n yeelg a futã n deeg maan-kʋʋr tõogo la b lebg neb sẽn welg toore.

³⁰ A biig ning sẽn na n deeg a zĩig n kẽ sɛka roogẽ n tʋm maan-kʋʋd tʋʋmd na n yeelga futã rasem a yopoe.

³¹ Rɩk pesgã sẽn kʋ tõoga reegr yĩngã n bao zĩ-sõng n dʋg a nemdã.

³² A Aarõ ne a kamba na n wãba pesgã ne burã sẽn be peooga pʋga, sɛka roog noore.

³³ B na n wãba b sẽn tall bũmb ning fãa n kos Wẽnd sugri, b naama deegre daare, b sẽn lebg neb sẽn welg toora raare, la ned a to ka tõe n wãb-b ye, tɩ yaa rɩɩb sẽn welg toore.

³⁴ Beoog sã n vẽege, sẽn kellã, bura la nemdã, ningda bugmẽ. Ned a to ka tõe n dɩ ye, tɩ yaa rɩɩb sẽn welg toore.

³⁵ Maan ne a Aarõ la a kambã wala m sẽn togsã. B maan-kʋʋra tõog reegr na n kaoosa rasem a yopoe.

³⁶ Beoog sẽn vẽeg fãa, lʋll maoong la b na n kʋ n kos yel-wẽna sugri. B na n yɩlga maan-kugra woto, b na n taag-a-la kaam n welg a toor Soaala yĩnga.

³⁷ Yaa dasem a yopoe pʋgẽ la f tog n kʋ beoog sẽn vẽeg fãa yel-wẽnd sugr kosg maoong, maan-kugra zugu, n le rɩk a n kõ Wẽnde t'a wa lebg sõng zãnga. Dẽ poore nin zaalg bɩ rũng sã n sɩɩs-a, yaa yell la a na n bao n kõ a menga.

Beoog-beoog maoongo

³⁸ Beoog sẽn vẽeg fãa n tãag dũni wã yikri, ad-b sẽn na n kʋ bũmb ning maan-kugra zugu: pe-bi a yi, sẽn zems yʋʋmd a ye rũmsi.

³⁹ A ye kʋʋda yibeoogo, t'a ye kʋ zaabre.

⁴⁰ Tũnug pipi rũnga maoong ne alkam zom wamd pogbre sẽn nag ne kaam sẽn ya yɩlgemde, la sẽn pit lengre, n paas yubl rãam.

⁴¹ Pesg a ye n na n kʋ zĩ-sobdo, n tũnug zom, kaam la rãam, wa yibeoogẽ wã. Na n yɩɩ yũ-noog maoong sẽn na n maag Wẽnd sũuri, yaa maoong sẽn yõogd zãng Wẽnd taoore.

⁴² Dẽ yaa bũmb sẽn tog n maan beoog sẽn vẽeg fãa Wẽnd taoore, sɛka roog noore, zĩig ning b sẽn na n seg foom n kõ b koeese.

⁴³ Be la m na n seg Israyɛl kamba la m na n welga zĩ-kãng t'a lebg m ziir zĩiga.

⁴⁴ M na n welga rooga la maan-kugra toore, m na n welga a Aarõ ne a kamba toore, maan-kʋʋr yĩnga.

⁴⁵ M na n zĩnda Israyɛl kamba sʋk n yɩ b Wẽnnaam.

⁴⁶ B na bãng marsã tɩ yaa maam la bãmb Wẽnde, sẽn yiis-b Ezipt tẽnga, n na n pa ne bãmba. Maam la Soaala, bãmb Wẽnnaam.»