Yikri 27 - SEBR SÕNGO

Yũ-noog maan-kugri

¹ Soaala yeela a Moyiiz: «Maan-kugra na n kaa ne gõ-miig raado. A woglem yaa kãntɩɩs a nu, a yalem yaa kãntɩɩs a nu, dɩlla a kɩrems a naasa fãa zema taaba. A zãndlma yaa kãntɩɩs a tã.

² Ning yɩdb a naas, kɩrems a naasã. Maan-kugrã ne a yɩdba naagdame n ka wakat yɛnga. Gãneg zũud a zugu.

³ F na n yõga laas n tar n kokd tompɛglma, n paas kardo, sĩmbi sẽn na n kokd zɩɩm, kõse la tɩdar laase. Te-bãmb fãa na n kuda ne zũudu.

⁴ Ka bũmb n mobg maan-kugrã. Ka wa zũud gãmbre n gilg-a la ning zũud kags a naas, gãmbra kɩrems a naasã.

⁵ Gãmbra ningda tẽngre la a zẽkdame n ta maan-kugra pʋɩ-sʋka.

⁶ Maan-kugra tʋkr yĩnga, pees raad a naas n mobg ne zũudu.

⁷ Raada tuiida kagsã tɩ b sãd n be maan-kugra taoor la poorẽ.

⁸ Maan-kugra kaada ne ra-pegdo, a pʋga na n yɩɩ vɩʋʋgo la fãa na n tũu wala m sẽn togs bũmb ning tãnga zugã.

Zaka

⁹ Rooga na n paama a zaka n gilg-a. Yaa pɛɛl sẽn wʋg ne gĩs sẽn maneg n dĩngi la b na n yagle. Rooga nug rɩtgo, yaa pɛɛl woglem sẽn ta kãntɩɩs koabga.

¹⁰ B ra-lugs pisi wã na n yalsa zũud te-sends pisi zutu la b tara kaad-gõdse la wanzurf ribli, fãa yaa sẽn na n yɩlẽ n wa tõog n sog taaba.

¹¹ Goabg kɩrengã me yaa kãntɩɩs koabga, la a na n luda ne pɛɛla. Ra-lugsa yaa pisi la b na n yalsa zũud te-sends pisi zutu la b tara kaad-gõdse la wanzurfu ribli.

¹² Sã n ya nin-taoore, yaa sẽn ta kãntɩɩs pis-nu la zaka yalem la a luta ne pɛɛl sẽn loe ra-lugs piig sẽn sel zũud te-sends piig zutu.

¹³ Sã n ya yaanga a yalma yaa kãntɩɩs pis-nu yɛsa.

¹⁴ Kɩreng a ye yaa kãntɩɩs piig la a nu la f magd pɛɛlã. B ra-lugsa ya b tã, la b te-sendsa me ya b tã.

¹⁵ Kɩreng a to wã le yaa kãntɩɩs piig la a nu la f magd pɛɛlã. B ra-lugs ya b tã la b te-sendsa me yaa b tã.

¹⁶ Dɩlla dignoora meng yalem yaa kãntɩɩs pisi. Pɛɛla wʋga ne gĩs mismiidu, gĩs miidu, gĩs moam yʋs, gĩs bãanese, sʋlg-mit tʋʋmde. Ra-lugsa yaa b naase, n sel te-sends a naas zutu.

¹⁷ Yaa ne wanzurf ribli la zaka ra-lugs fãa na n loe n gãd taaba. Ka na n loe kaad-gõdsa ne kut ribli ye, na n yɩɩ ne wanzurf; b te-sendsã n ya zũudu.

¹⁸ Zaka woglem: kãntɩɩs koabga. A yalem: kãntɩɩs pis-nu. A zãndlem: kãntɩɩs a nu; te-sendsa yaa zũudu.

¹⁹ Teeda fãa sẽn be rooga tʋʋm yĩnga, a biili wã, ne kaadsã, fãa na n yɩɩ zũudu.

Bugma kaam

²⁰ Kos Israyɛl kamba tɩ b kõ-f oliviye kaam sẽn ya yɩlenga, roga bugum yĩnga, tɩ zaabr bɩ sãnem fitil kãsenga tõog n widi.

²¹ A Aarõ ne a kamba na n ninga sãnem fitil kãsenga sɛka roog pʋga, roog ninga sẽn ti ne gãndã. Dɩgend-a-la peenda taoore, peend ning sẽn lilla kuga walsa koglgã. Sãnem Fitila na n wida zaabr n ta yibeoogo, maam, Naaba-Wẽnd taoore. Dẽ yaa noor sẽn ka tõe n teem zamaan sẽn wate, a Israyɛl kamba yĩnga.»