Yikri 26 - SEBR SÕNGO

Sɛka roogo

¹ Soaala yeela a Moyiiz: «Sã n ya sɛka roogo, wʋg a yĩnga, pɛɛl piiga. Pɛɛla wʋgda ne beren-dɩgr gĩsi sẽn maneg n dĩngi. Pɛɛl kẽer yaa mismiuugu, kẽer yaa moam wa saag paga Nina-nina. F sã n wa wʋgd pɛɛlã bɩ f ges n buk ne minim la bãngre, rũms sẽn naag n tar nao a naase, pɩgsa la ninsaal nenga.

² Peend a ye fãa tara kãntɩɩs pisi la a nii, a yalem yaa kãntɩɩs a naase la pɛɛl piiga fãa zema taaba.

³ Pɛɛl a nu la f rɩkd n bogl taaba, n le rɩk a nu sẽn kellã n bogl taaba.

⁴ Rĩng wĩ ne pe-kõbdo, wĩ sẽn ya mismiidu, n tall n loe pipi satem peen-boagla noore. Maan boto ne bogl a to wã me.

⁵ Wĩ wã na n yɩɩ pis-nu, pipi bogla yĩnga la pis-nu me bogl a yiib soaba yĩnga. Wĩ wã loeesa zĩig na n togla taaba.

⁶ Yaa sãnem sogdse pis-nu la f na n kud tɩ b wa tõog n loe peen-bɛd a yiiba ne taaba. Woto yaa wa peen-yɛng la b rɩk n ti roogã.

⁷ Maan pɛɛl a taab sẽn ya tagd-tagdo ne bʋ-kõbdo sẽn na n palg pipi pɛɛla zugu. Peen-kãens na n yɩɩ piig la a ye.

⁸ Peend a ye fãa woglem yaa kãntɩɩs pis-tã, a yalem yaa kãntɩɩs a naase. Bãmb piig la a ye wã fãa zema taaba.

⁹ Dɩk a nu n bogl taaba la rɩk a yoobã sẽn ketã n bogl taaba. Peend a yoob soaba na n lɛɛg n lʋɩɩ dooga kɩrenga.

¹⁰ Kud zũud sogds pis-nu n ning pɛɛl a nu wã sẽn bogl taaba kɩreng a ye, la ning sogds pis-nu pɛɛl a yooba sẽn bogl taaba me kɩreng a to wã. Ning wĩ pis-nu pɛɛl a nu wã sẽn bogl taaba kɩreng a ye wã. Ning wĩ pis-nu me pɛɛl a yoobã sẽn bogl taaba kɩreng a to wã.

¹¹ Kud zũud sogds pis-nu, wĩ wã sẽn na n wa tui zĩig ninga n gãd pɛɛla tɩ rooga lebg wa peen-yɛng roogo.

¹² Pɛɛla sõor sẽn ka zem taabã, peend ning sẽn luga wã pʋɩ-sʋk na n lɛɛg n siga rooga kudga.

¹³ Pɛɛla sẽn tʋʋg kãntɩɩgã, kãntɩ-kãng na n lɛɛg n lʋɩɩ rooga kɩrenga n lud-a.

¹⁴ Rooga yĩng yɛsa, zap pe-raad gãnd sẽn ning monem la gãn sẽn ka yũnd koom n wa yɛdg rooga zugu.

Rooga ra-lugsi la ra-paadse

¹⁵ Rooga yĩnga bao gõ-miig n pees ra-pegdo sẽn na n ka taab a naas-naase, n bas võ-yaleng tẽnsʋka, n yik-ba n yals yĩngri. Yaa ra-lug-yalemse.

¹⁶ B zãndlma yaa kãntɩɩs piiga tɩ yalma ya kãntɩɩg la pʋɩ-sʋka.

¹⁷ Basda ra-pegdã tɩ tʋʋg zĩis a yiibu tɩ bũmb wa tõog n sel zĩ-kãnga. B zãnga fãa kaab na n wẽnega taaba. Kaadame n bas vɩʋʋg sʋka.

¹⁸ Raada sẽn ka woto wã na n tonga bãmb pisi, dooga rɩtg kɩrenga.

¹⁹ F na n dɩka wanzurf n dõog te-sendse, bãmb pis-naase. Ra-pegda sẽn tʋʋg zĩig ninga na n wa sela bãmb zutu. Ra-lug-yaleng fãa yaa te-sends a yiibu.

²⁰ Rooga kɩreng a to wã, goabg soaba, me tara ra-lug-yalens pisi.

²¹ Bãmb me senda wanzurf te-sends pis-naas zutu: Ra-lug-yaleng fãa yaa te-sends a yiibu.

²² Sã n ya rooga nin-taoore, ra-lug-yalensa sõta bãmb b yoobe.

²³ Rooga satmẽ pẽgsã reegda ra-lug-yalens a yiibu, a ye goabga, a ye rɩtgo. Bãmb teegda roogã n na n paas a pãnga.

²⁴ Rɩgend-b lame tɩ tẽngrã bɩ ra-pegda zãr ne taaba n yaool n na n tɩ sɩɩs taab yĩngri. B sẽn ya woto wã, rooga teega bãmb n yɛsẽ.

²⁵ Dɩlla, rooga nin-taoore, ra-lug-yalensa sõta bãmb b nii. Ra-lug-yaleng fãa sela wanzurf te-sends zutu, bãmb piig la a yoobe: ra-lug-yaleng fãa yaa te-sends a yi.

²⁶ Bao gõ-miig n pees ra-paadse, bãmb b nu rɩtg kɩrenga yĩnga.

²⁷ Bãmb b nu me goabg kɩrenga yĩnga, a nu poorẽ kɩrenga sẽn tees nin-taoora yĩnga.

²⁸ Ra-lugsa zãndlma tẽnsʋka, la raad na n pɩʋʋge n sog ra-lugsa fãa ne taaba, b sɩngrẽ n tãag b baasgo.

²⁹ Bolg ra-lugsa sãnem, kud sãnem kags sẽn na n wa tui ra-paadsã la bolg ra-paadsa me sãnem.

³⁰ Yaa wala m sẽn wilg-f tãnga zugã la f na n tũ n ti roogã.

Peen-lilli

³¹ Wʋg peen-lilli ne gĩs mismiidu, gĩs moama, gĩs moam yʋs, gĩs peelse sẽn maneg n dĩng kẽnkẽ. Wʋgba wakato, bɩ f ges n buk ne minim la bãngre, rũms sẽn naag n tar nao a naase la pɩgsa la ninsaal nenga.

³² F na n yagla peenda gõ-miuug ra-lugs a naas sẽn bolg sãnem, sẽn tar sãnem kaad-gõdse, la sẽn sel wanzurf te-sends a naas zutu.

³³ Peen-lilla loeta kaad-gõdsã. Yaa peen-lilla poore la f na n dɩgl kuga walsa sẽn be koglg ning pʋgã la peen-lillã a na welga sõmblem sẽn pid ne sõmblem zĩiga ne zĩis a taaba.

³⁴ Kuga walse sẽn be koglg ninga pʋgã, dɩk a lingã n fõgneg-a a zĩigẽ: sõmblem sẽn pid ne sõmblema zĩigẽ.

³⁵ Dɩgl bur sõma piig la a yiiba te-roagendgã, peen-lilla taoore, rooga nug goabga, dɩgl sãnem fitil kãsenga rooga nug rɩtgo t'a tot te-roagendgã.

³⁶ Sã n yaa rooga noor bɩ f ning peend sẽn wʋg ne gĩs miidu, gĩs mismiidu, gĩs moam yʋs, gĩs peelse. Sʋlg sẽn mi a tʋʋmde n na n wʋg-a.

³⁷ Peen kãng yĩng bɩ f pees raad a nu n bolg-b sãnem, ning-b sãnem kaad-gõdse. Ra-bãmb na n wa sela zũud te-sends a nu zutu.»