Yikri 25 - SEBR SÕNGO

SẼN GET WẼND WAOOGRA YELLE Do-sõnga tiib yelle

¹ Soaala-Wẽnd yeela a Moyiiz:

² «Wilg a Israyɛl kamba tɩ b sa neba nengẽ n dees bũmb m yĩnga. B reeg-a neb niyns sẽn ka mi beeda nengẽ, kõt yaara rãmb nengẽ.

³ Ad-y y sẽn na n deege: sãnem, wanzurfu, zũudu,

⁴ peen-mismiuugu, peen-moomde, peen-miuug yʋs, peend sẽn wʋg ne gĩs peelse la gĩs bãanese, peend sẽn wʋg ne bʋ-kõbdo,

⁵ pe-gãnd sẽn los monem, gãn sẽn ka yũnd koom, ra-neeba,

⁶ kaam sẽn na n ning fitila, kaam sẽn tar n zɛɛdẽ, tɩdar sẽn tar yũ-noogo,

⁷ kug sẽn moog wa rulg lɛlma, kug neeb sẽn na n tall n zap sãnem-pɛ-m-poore la sãnem-pɛ-m-yãoogo.

⁸ Dẽ fãa la b na n tall n ti gãnd ro-sõngo n kõ-ma tɩ m tõog n pa y sʋka.

⁹ M na n wilg-f-la rooga sẽn na n ti to-to la bũmb ning fãa sẽn na n kẽ a pʋgẽ. Maan-y fãa wa m sẽn na n wilgã.

Kug walsa koglgo

¹⁰ B na n peesa gõ-miiga n maan koglgo. Koglga woglem na n yɩɩ kãntɩɩs a yi la pʋɩ-sʋka, a yalma kãntɩɩg la pʋɩ-sʋka, a zãndlem kãntɩɩg la pʋɩ-sʋka.

¹¹ B gãneg sãnem, koglga pʋg la a yɩnga. B kʋk a noorã ne sãnem maabre.

¹² B maan sãnem kags a naase n sog-a, a yiib goabga, a yiib rɩtgo.

¹³ B pees ra-gils a yi, n bolg-b ne sãnem.

¹⁴ Bãmb na n tuii kagsã, koglga lʋgrẽ, koglga zẽkr yĩnga.

¹⁵ La b na n paa be daar fãa.

¹⁶ Yaa koglga pʋg la f na n bĩng kuga walsã m sẽn na n gʋls f yĩnga.

¹⁷ B na n maana ling koglga yĩnga. A na n yɩɩ sãnem zãnga; a woglem yaa kãntɩɩs a yi la pʋɩ-sʋka; a yalma yaa kãntɩɩg la pʋɩ-sʋka.

¹⁸ F na n dɩka sãnem n toos n maan malɛgs a yi, n zaoolg lingã, a ye taoore, a ye poorẽ.

¹⁹ Naag malɛgs a yiibã n tableg ne lingã tɩ b lebg bũmb a ye ne-a.

²⁰ Malɛgs a yiiba neng na n togla taaba, n tees lingã, tɩ b pɩgsa na n zẽk n yɛdg a zugu n lilld-a.

²¹ B na n dɩka lingã n fõgneg koglgã. Koglga pʋga f na n bĩnga noya walsã m sẽn na n gʋls n kõ-fã.

²² Yaa linga zug la m na n likd m meng foom a Moyiiz, malɛgs a yiiba sʋka, yẽ zug la m na n yiis koees niyns f sẽn na n deeg n taas a Israyɛl kamba.

Bur sõma rɩglg zĩiga

²³ B na n baoo gõ-miig raado n maan bũmb sẽn tar n dogend teedo. A woglma yaa kãntɩɩs a yi, a yalma kãntɩɩga, a zãndlema kãntɩɩg la pʋɩ-sʋka.

²⁴ B gãneg sãnem a zugu. B bao sãnem maabre n kʋk-a n gilgi.

²⁵ B kok-a, a kɩrems a naasã, ne raad yalem sẽn ta nus-bi a naase. B bao sãnem n gãneg ra bãmb me zugu.

²⁶ B kud sãnem kags a naase n ning kɩrems a naasã.

²⁷ Kagsa ningdame n pẽneg te-roagendga noore. Raad la b na n tuii kagsã, te-roagendga zẽkr yĩnga.

²⁸ Raada na n yɩɩ ra-sõma la f na bolg-b-la ne sãnem. Ra-bãmb tuiida te-roagendga tʋkr yĩnga.

²⁹ B rɩgl a zugu yõg-laase, ko-teese, la-bõonese, bãmb pʋg la b ningd rãama. Teeda fãa na n yɩɩ sãnem zãnga.

³⁰ Yaa te-roagendga zugu, la b na n dɩgl burã b sẽn kõt maam wala m pʋɩɩrã. Bur ka tõe n vaal a zug abada.

Sãnem fitil kãsenga

³¹ B na n dɩka sãnem zãnga n dõog-dõog fitilsa roagendg kãsengã. Fãa na n naagame n dõog rõog yɛnga: sɛɛgã, wilã, maabrã, pu-yoaalã la puuda menga.

³² Fitilsa sẽn na n wa rogl bũmb ning zugã tara sɛɛga, n tar sʋk willi, la wil a yoobe sẽn keg taab tẽnsʋk willã, n dʋʋd a yiib-yiibu, zĩis a tã.

³³ Wila sẽn keg taab a yiib-yiibã tara puud a tã la puug fãa rõoga wa lɩɩn puugu ne a pu-yoolle la a puuga menga. Wil a yooba fãa wẽnda taaba.

³⁴ Tẽnsʋk willã tara puud a naase sẽn dõog wa lɩɩn puugu ne a pu-yoolle la a puuga menga.

³⁵ Will a yooba fãa sẽn tão sɛɛgã la sẽn keg taab n dʋʋd a yiib-yiib, zĩis a tã wã, dõoga maabre, n gilgi.

³⁶ Maabrã ne willã na naagame n dõog rõog yɛnga. Fãa na n yɩɩ sãnem yɩlemde sẽn toos ne zãare.

³⁷ Roagendga puuda pʋsẽ la f na n sagl fitils a yopoe. Fitilsa sã n widgi b vẽenema tʋʋsda b taoore.

³⁸ Bug-rɩɩna sẽn dʋʋgd laok ninga pʋgã la laonga wõrsdgã, bãmb me tog n yɩɩ sãnem zãnga.

³⁹ Yaa sãnem gilgu sẽn ta nin-tɩɩg zɩɩbo la f na n dɩk n dõog fitilsa ne b roagendgã la teed a taabã.

⁴⁰ Ges neere, Moyiiz, tɩ fãa tũ wa m sẽn wilgd foom tãnga zugã.»