Yikri 23 - SEBR SÕNGO

Sẽn kis bʋʋd zĩigẽ

¹ Da wɩd f to ye; da sõng yel-maand ne f kaset zirẽ ye.

² Da kẽ sẽn baood-b wẽnga, b sõor yaa wʋsg yĩng ye. Da tũ sõor yaa wʋsg rãmba n togs sẽn pa sɩd n paalg ned bʋʋdo, a sẽn yaa a ye wã yĩng ye.

³ Da lʋɩɩs taoore t'a zagl yaa nin-bila n wa gãndg sɩda n sõng-a tɩ loog, bʋʋd zĩigẽ ye.

⁴ F sã n yãend f bɛ bõang bɩ a naaf sẽn meneme, bɩ f yõk-a n wa lebs a soaala.

⁵ F bɛ bõang sã n ka tõe a zɩɩbo n pãsd n lʋɩtẽ bɩ f ra yɛs kɛɛng n getẽ ye. Kolg tɩ y naag taab n yik-a.

⁶ B sã n bool naong soab bʋʋdo bɩ f ra sõng n kedb a bʋʋda ye.

⁷ Zirẽ-beed sã n be sʋka, bɩ f ra lʋɩɩs f toog ye. Da sõng tɩ b b kʋ nin-tɩrga la ned sẽn ka beeg ye. Ad-y m ka tõe n kõ yel-maand bʋʋm ye.

⁸ Da reeg kũun ye, tɩ kũun pagda nini n kedbd nin-tɩrs bʋʋdo.

⁹ Da tall sãan toog ye, y mii sãan yɛl sẽn yaa a soaba, tɩ y me yɩɩ sãamb Ezipt tẽnga.

Vʋʋsg yʋʋmde

¹⁰ F na n bʋda f pʋta yʋʋm a yoob n tong taaba la f na n tigsa f koodã f baoorẽ.

¹¹ Yʋʋmd a yopoe soaba, fo basda f pʋtã n ka ko ye la f ka rɩkd bũmb ba a ye f pʋʋgẽ ye. Yaa naong rãmb n na n dɩ b yõodo, tɩ rũmsa me soog naong rãmba sẽn na n keesã. Na n yɩɩ boto me ne tɩ-sendsã, bugsuntund la kakamse.

¹² Dasem a yoob pʋgẽ, f na n tʋmame la a yopoe raarã f na n vʋʋsame, f naaf la f bõang na n vʋʋsame. F yem-poak biiga, f noak na n vʋʋsame.

¹³ Maan-y gũusgu ne m sẽn togs-y bũmb niynsa fãa; da pʋd-y wẽn-naandsa yʋʋr ye. Da sak-y tɩ b yʋʋra yi y noorẽ ye.

Israyɛl kibs rãmba

¹⁴ Yʋʋmd pʋgẽ yaa naoor a tã la y na n maan kibs m yĩnga. Pipi kibsa yaa bur sẽn pa ning bɩll kibsa.

¹⁵ Dasem a yopoe tõre y na n dɩɩ bur sẽn ka ning bɩlle la rẽ na n yɩɩ bõn-bɩʋng kiuug, wa sẽn zoe n wilgã, tɩ yaa bõn-bɩʋng kiuug la yãmb yi Ezipt tẽnga. Ra wa-y mam taoore ne nus-vɩɩd ye.

¹⁶ Ad kibs a to: f kood rɩkre, f tʋʋmda pipi biis f pʋʋg sẽn wom n kõ-f rɩkre. Ad kibs a to: zĩig sẽn wat n kolg likri tɩ f kẽesd f sẽn tʋm n paam fãa.

¹⁷ Dɩlla yʋʋmd pʋgẽ yaa naoor a tã la Wẽnnaam na n paam waoogr rapa fãa nengẽ.

¹⁸ Baraare m pa rat tɩ b kõ-m maand n naag ne bur sẽn lob bɩll ye. Nem-kaama y sẽn na n kõ maam kibsa raarã, da bĩng-y tɩ beoog vẽeg ye.

¹⁹ Yaa tẽnga sẽn wom bũmb ninga pipi tɩ ya sõmbo la f na n wa kõ Wẽnnaam, f Soaala. Da saag n dʋg bull ne a ma bĩisim ye.

Wẽnd kãab noodo

²⁰ M na n tʋma m malɛk t'a lʋɩ f taoore n gũ f sora zugu la a tall-fo n taas m sẽn kãab-f tẽng ningã.

²¹ Waoog-a la f kelg a koɛɛga, da yɩ tõat ye. F sã n yɩ tõata, f kõn paam f beegra sugr ye, t'a gomda m zĩigẽ.

²² Fo sã n sak-a neere, la f sã n maam bũmb ning fãa m sẽn yet tɩ f maana, m na yɩ f bɛɛba bɛyã, la sẽn zabda ne fooma pat-n-taaga.

²³ M malɛka m sẽn lʋɩɩs f taoora sã n wa tall-f n taas Amoritse, Ititse, Perizitse, Ivitse, Zebuzitse la Kanaã rãmb tẽnga tɩ f paam n kʋ-b zãnga,

²⁴ da saag n wõgemd b wẽn-naandsa taoor ye, da saag n waoog-b, wala tẽnga rãmb sẽn da maand ye, da tũ b sora ye, pãb-ba n wã, n wã b tẽn-kugã.

²⁵ Yaa f Soaala la f Wẽndã la f na n waoog wa sẽn segde. Sã n yɩ woto, f sẽn dɩt la f sẽn yũud na paam barka la m na zãag-f ne bãaga.

²⁶ F tẽngẽ, f pag ba a ye pʋg kõn sãam ye, pag ba a ye kõn pa n ka rog ye. F na kʋʋl tẽng zug n tãag f pʋlemd daare.

²⁷ Yɛɛsgo la m na n lʋɩɩs f taoore; f sẽn na n ta zĩig ning fãa, m na n zũndga tẽn-kãnga la m na n kɩtame tɩ f bɛɛba ning tĩiga, b zãkudg bal la f na n yãende.

²⁸ M na n lʋɩɩsa kãnenkãas f taoore tɩ b rig Ivitse, Kanaã rãmba la Ititse.

²⁹ Ka na n yɩ yʋʋm-yɛng pʋgẽ bal la m na n dɩg bãmb f taoor ye, tɩ tẽnga ka tog n tiig n lebg we-raoogo, bõn-nindi tẽnga, tɩ yɩ naana ne foom ye.

³⁰ M na n dig-b-la f taoor bilf-bilfu, n tãag wakat ning m sẽn wat n ges tɩ f kamba lebga wʋsgo n tõe n soog tẽng ning m sẽn na n kõ-b t'a yɩ b soolem.

³¹ Toaag ning m sẽn na n toog f tẽnga la woto: Rudum Mogrã n tãag Filisti rãmb mogre, Efrat kʋɩlga n ta zĩ-peen-daaga. M na n basa tẽnga rãmb fãa f nugẽ tɩ f sẽeg-b zãnga.

³² Da maan zood ne b ye, da maan zood ne b wẽn-naandsa ye.

³³ Da bas-b fo tẽngẽ ye, ka rẽ b wat n kɩtame tɩ f beeg maam, f wat n tʋlgame n waoog b wẽn-faadã la rẽ yaa b bẽdgo, b sẽn na n bẽd n yõk foo.»