Yikri 2 - SEBR SÕNGO

A Moyiiz kibare

¹ A Levi sakẽ, ned n da tɩ bao a pag a buuda kamb sʋka.

² Paga waa n dɩka pʋg n dog bi-ribla. Biiga da yaa neere la a ma tõog n solg-a-la kiis a tãabo.

³ Biiga solgr waa n lebga toogo. A bao mo-kãdre n wʋg peoogo, n maneg n bol a pʋga ne tãn-sũudu n yaool n dɩk biigã n sagl-a pʋgẽ, n tʋk n tɩ bas kʋɩlg noor, rudum sʋka.

⁴ Biiga tão soosame n lamdeg yɩɩga n na n ges yella sẽn na n baas to-to.

⁵ La ade, dĩma bi-pugl waa kʋɩlgẽ n na n so koom. Kom-pugli n yãag-a, la bãmb paa kʋɩlga noore. Dĩma bi-pugla yãee peoogã, rudma sʋka, n kɩt tɩ b rɩk-a n yiis.

⁶ A laka peoogã n yãe biig sẽn yãbda. Biiga weoog kẽ-a lame la a yeelame: «Wã yaa Ebre bila.»

⁷ Biiga tão kolgame n yeel dĩma biiga: «Sãnd y ka rat pag Ebre pogsa sʋk sẽn na n kõt-a bĩisim?»

⁸ Tɩ dĩma bi-pugla leok-a: «N-ye! M datame!» La yaa biiga ma menga la a tɩ tall n wa.

⁹ Dĩma bi-pugla yeelame: «Tall-y biigã, n tɩ wub-a, n kõ-ma. M meng m toor na yao-fo.» Paga talla biigã n tɩ wubi.

¹⁰ Biiga sẽn bɩ, b tall-a lame n wa kɩs rĩma bi-puglã la a ges-a-la wa a meng biiga n pʋd a yʋʋr a Moyiiz, t'a ra yetame: «M yiis-a-la koomẽ.»

A Moyiiz zoeese

¹¹ Sẽn waa n beẽ, n beẽ, a Moyiiz yiime na n kaaga a saam-biisã. A yãee tʋʋm tood niyns b sẽn da tʋmna; a yãee Ezipt dao a ye sẽn pãbd a saam-biiga.

¹² A Moyiiz sẽn ges goabg la rɩtgo, a pa yãe tɩ ned pẽ be ye, t'a kʋ Ezipt nedã n bus bĩisrẽ.

¹³ Vẽkẽmbeoogo a le yiime; a yãee a saam-biis a yiib sẽn tar taaba t'a sok nin-yend: «Bõe tɩ f pãbd f tũud-n-taaga?»

¹⁴ Saam-biiga leokame: «Ãnda n yeel foo tɩ f yɩ d naaba la d bʋ-kaooda? Fo rat n kʋʋ maam wala Eziptga laa?» Dabeem yõka a Moyiiz la a yeela a sũurẽ: «Daare yella vẽnegame.»

¹⁵ Yella sɩd da taa dĩma t'a baood a Moyiiz n na n kʋ, dẽ la a zoe n zãag al Madiã tẽnga. A waa n yãee bulga la a zaonda a noore.

¹⁶ Madiã maan-kʋʋda yaool da tara kom-pugli a yopoe. Bãmb n wa bulgẽ wã, n na n yõng koom, n pids gaolg, n yũnug b ba piisi.

¹⁷ Rũm-kɩɩm n waa n tuk-b be n sɩng b rigbu, t'a Moyiiz na n sõng-ba tɩ b paam n yũnug b rũmsã.

¹⁸ B sẽn leb yiri, b ba Reowɛl nengẽ, b ba wã yeel-b lame: «Ade, dũnna y lɛɛg n waa tao-tao wɛ, m kamba!»

¹⁹ Tɩ b yeele: «Ad-y yaa Ezipt ned n fãag tõnd pe-kɩɩmba nugẽ, a reega tõnd zĩig n toog koom n kõ rũmsã.»

²⁰ Dẽ la b ba sok yã: «La nin-kãng bɛɛ? Bõe yĩng la a pa beelẽ? Bool-y daoã t'a wa rɩ.»

²¹ A Moyiiz wa n noka a Reowɛl tɩ yẽ rɩk a bi-pugl a ye n kõ-a; bi-pugla yʋʋr la Sefora.

²² A Sefora roga a Moyiiz biiga la biiga pʋdame t'a Gersõ, a Sãana. A Moyiiz ra yetame: «M waa n noka tẽn-zẽnga.»

A Moyiiz boolgo

²³ Sẽn waa n beẽ, Ezipt dĩma kiime. A Israyɛl kamb waa n yɛɛ ne b yembdã la b kelmame, la b koɛɛg taa Naaba-Wẽnd.

²⁴ Wẽnd kelga b waasgo la b tẽega b zood ne a Abraam, a Izaak la a Zakoob.

²⁵ B gesa Israyɛl kamba ne nimbãan-zoeere la b weoog yõk-b lame, b bãnga b yɩɩre.