Yikri 19 - SEBR SÕNGO

Sinayi zoodo

¹ Israyɛl kamba sẽn waa n ta Sinayi zĩ-peen-daagẽ dẽ tɩ yaa kiis a tã la b yi Ezipt tẽnga.

² B yii Refidim n dɩk b sore la b sẽn ta Sinayi zĩ-peen-daagẽ, b yalsa be. A Israyɛl sika da tii tãngã pennẽ.

³ A Moyiiz dʋʋ tãnga zug n bʋʋg Soaala-Wẽnde. Tãnga zugu, Soaala boola a Moyiiz n yeel-a: «Ad-f sẽn na n gom to-to ne a Zakoob kamba, ad-f sẽn na togs bũmb ning a Zakoob roogo.

⁴ Y meng y toor yãenda m sẽn maan Ezipt rãmba bũmb ninga. Y yãeeme tɩ m dɩka yãmb wala sɩlg, n kolg m menga.

⁵ Marsã, yãmb sã n deeg m noore, y sa n sak m zoodã, m na ges-y wala m kamba, dũni wã pʋgẽ, la dũni wã, maam n so-a zãnga.

⁶ M na ges-y wa maan-kʋʋdb buudu, wala buud sẽn welg toor mam yĩnga. Yaa woto la f na n togs Israyɛl kamba.»

⁷ A Moyiiz lɛɛg n sigame; a tigsa nin-kẽembã n taas Wẽnd koɛɛga.

⁸ Zãma wã naaga taab n yɩ sũur a ye, n yeele: «Soaala sẽn togs bũmb ninga fãa, tõnd deegame.» A Moyiiz taasa Naaba-Wẽnd b leokrã.

⁹ Soaala-Wẽnd yeela a Moyiiz: «M na n zomba sawadg sẽn tagme n wa f nengẽ tɩ m sã n gomd ne foo, bɩ neba wʋmd m koɛɛga, tɩ b yama kẽ fo me zãnga.» A Moyiiz n da reesd zãma wã koɛɛg n taas Soaala-Wẽnde.

Sinayi tãnga zugu

¹⁰ Soaala-Wẽnd le yeela a Moyiiz: «Kos neba tɩ b yɩlg b mense rũnna la beoog yĩnga, yeel-b tɩ b pek b futu.

¹¹ Yeel-b tɩ b gũ-m da-yɩta tɩ da-yɩta m na n siga tãnga zugu la b fãa nif na n yãend-m lame.

¹² Bao bũmb n pɩk n gũbg tãngã la f yeele: ned ba a ye da saag n dʋ tãnga ye, ned ba a ye da saag n sɩɩs tãnga sɛɛg ye. Ned ninga sẽn sɩɩsa tãnga bɩ b kʋ-a.

¹³ Bãng tɩ pa nug n na n sɩɩs a soab ye, na n yɩɩ kug bɩ pɛɛma. Yaa rũnga, yaa ninsaala, a pa tog n le vɩɩnd ye. Baorga sã n peebe, neb kẽer bala n na n dʋ tãngã.»

¹⁴ A Moyiiz sigame n tɩ yeel neba tɩ b segl b mense.

¹⁵ A yeela nebã tɩ b gũ da-yɩten-daare la b ra kolg b pagb ye.

¹⁶ Da-yɩten-daar yibeoogo, b yãee sawad sableg tãnga zugu. B yãee saag sẽn yãge la b wʋma a sẽn tãse. B wʋma bʋʋr sẽn sãt wʋsgo, tõntõog peebgo, tɩ ned kam fãa sɩng rigbu.

¹⁷ A Moyiiz yiisa nebã tɩ b seg Soaala-Wẽnde la b kolga tãnga sɛɛga.

¹⁸ Sinayi tãnga ra nukda bug-zõose tɩ yaa bugum pʋga la Soaala da sig yã. Bug-zõosa da nukda wala wʋng dẽnna la tãnga da rimda wʋsgo.

¹⁹ Tõntõoga bʋʋra ra yãngdame n paasdẽ; a Moyiiz ra gomdame tɩ Soaala-Wẽnd leokd-a ne sa-tãse.

²⁰ Sinayi tãnga zug-tẽnsʋka la b sig yã. B yeela a Moyiiz t'a me rʋ tãnga zug-tẽnsʋka, la a rʋʋme.

²¹ Soaala Wẽnd yeela a Moyiiz: «Lɛɛg n sig n yeel nebã tɩ b ra gãndg toaagã n wa ges Soaala-Wẽnde, tɩ b sã n gãndge, wʋsg na kiime.

²² Ba maan-kʋʋdba sẽn minim Soaala-Wẽnd pẽnegrã, b modg n yɩlg b mense n da wa tak Soaala-Wẽnd beem b zug ye.»

²³ Dẽ la a Moyiiz leok Soaala: «Neba kõn saag n dʋ Sinayi tãnga ye. Yãmb da reng n wilg-b lame tɩ b da pẽneg tãnga ye la yãmb kɩtame tɩ b ning toaag n welg-a toore.»

²⁴ La Soaala-Wẽnd yeelame: «Lɛɛg n sigi n tɩ wa ne a Aarõ la yeel nebã la maan-kʋʋdbã tɩ b gũus n da long toaaga n wa paam n pẽneg Soaala-Wẽnd, tɩ b wa yik zabr ne b ye.»

²⁵ A Moyiiz sigame la a kosa nebã tɩ b maan gũusgu.