Yikri 18 - SEBR SÕNGO

A Moyiiz ne a rɛɛmba Zetro

¹ Madiã maan-kʋʋd la a Moyiiz rɛɛmba, a Zetro, wʋma Soaala-Wẽnd sẽn maan bũmb ning ne a Moyiiz la b buudu, a Israyɛl. A wʋmame tɩ Wẽnd yiis-b-la Ezipt tẽnga.

² Dẽ la a babs-a la a waa ne a paga Sefora sẽn da pa Madiã,

³ n paas a kamb a yiibu. Biig a ye yʋʋr la Gersõ, a Sãana, t'a ra yeelame: Yaa tẽn-zẽngẽ la m zoe n tɩ kẽ.

⁴ Biig a to wã pʋdame tɩ Eliezer, Wẽnd la m sõangda, t'a ra yeelame: M ba rãmb Wẽnd yɩ-la m sõangda la b fãag-m-la ne Ezipt dĩma sʋʋga.

⁵ Dɩlla a Moyiiz rɛɛmba Zetro ne a kamba la a pag waa n paam-a-la we-raoogẽ wã, b sikẽ, Wẽnd tãnga zugu.

⁶ A kɩtame tɩ b yeel a Moyiiz: «Ad yaa maam, f rɛɛmba Zetro, n wa n na n ges-fo la m waa ne f pagã la f kamb a yiibã.»

⁷ A Moyiiz yi n sega a rɛɛmba, n wõgemd a taoore, n mobg-a, n sok taab keelem tɩ b yaool n tũ taab n kẽ roogẽ.

⁸ A Moyiiz wilga a rɛɛmba Wẽnd sẽn maan ne Ezipt dĩma la a nebã. B sẽn sõng a Israyɛl to-to. A wilga yel-pakr toɛ-toɛ b sẽn seg sor zugu tɩ Wẽnd fãag-ba.

⁹ A Zetro nooga a sũuri ne Soaala-Wẽnd sẽn maan bũmb ning fãa a Israyɛl yĩnga tɩ b põs Ezipt rãmba.

¹⁰ A zẽka a koɛɛga n yeele: «Wẽnnaam paam pẽgre, bãmb sẽn yiis yãmb Ezipt naaba la Ezipt dãmb nugẽ, bãmb sẽn yiis yãmb Ezipt yembdẽ.

¹¹ Marsã m miime tɩ Israyɛl Wẽnnaam n yɩɩd Ezipt wẽn-naandsã ne pãnga, ba wẽn-naandsa sũra sẽn waa n puug zãng ne a Israyɛl.»

¹² A Zetro, a Moyiiz rɛɛmba, kʋ yũ-noog maoongo la maand a taaba. A Aarõ la a Israyɛl nin-kẽemba waa n naaga ne a Zetro tɩ b rɩ, Soaala-Wẽnd taoore.

Bʋ-kaoodba sɩngre

¹³ Beoog sẽn vẽege, a Moyiiz zĩndame n na n kao Israyɛl kamba bʋʋdo. Neba yaasa yĩngr, yibeoogo n ta zaabre, tɩ pa sɛ ye.

¹⁴ A Moyiiz rɛɛmba yãee namsg ninga a Moyiiz sẽn namsd ne a nebã la a sok-a lame: «Fo welgda f neba koees wãn-wãna? Bõe tɩ fo ya f ye? Neba ka labsa? Yaa bõe tɩ bʋʋda bʋʋd yibeoog n tat zaabre?»

¹⁵ T'a Moyiiz leoke: «Nebã n wat m nengẽ n dat Soaala-Wẽnd leokre.

¹⁶ B sã n yik no-koeemd ne taaba, yaa mam nengẽ la b wata tɩ m na n wilg ned kam fãa a bʋʋm bɩ a kongre la m wilg-b Soaala-Wẽnd sẽn date, Soaala-Wẽnd sẽn yalse.»

¹⁷ A Moyiiz rɛɛmba leok-a lame: «Fo sẽn maand woto wã ka tog ye!

¹⁸ Fo sɛɛsda f pãnga la f lakda neba yam. Tʋʋmda yɩɩda f pãnga, f ka tõe n tʋm f yembre tɩ yɩ sõmb ye.

¹⁹ Kelg saglg ning m sẽn na n sagend-fã, tɩ woto Soaala-Wẽnd na sõng-fo. Fo meng f toore n na n ges sẽn lam neba ne Wẽnde, n taas-b Soaala koɛɛga.

²⁰ Zãms-b Soaala-Wẽnd noya, wilg-b sor ning b sẽn na n dɩke, wilg-b b sẽn na n maan to-to.

²¹ Ges zãma wã sʋka n bao neba, neb sẽn tar dabaare, neb sẽn zoet Wẽnde, neb sẽn ya pʋ-peen-dãmb n kõ b naam. Kẽer na n dɩɩ naam neb tusr zugu, kẽer neb koabga, kẽer neb pis-nu, kẽer piiga.

²² Bãmb na n zĩnda neba sʋka wakat fãa, n kao bʋʋdo; b na n taasa foom koe-bɛdã; sã n ya koe-bõonesã, bãmb na welg rẽnd b toore. B na naag foom n zɩ zɩɩbã t'a tiig n lebg faasga.

²³ F sã n maan woto, la sã n sega ne Soaala-Wẽnd daabo, f na tõog n tʋm f tʋʋma la neba me na leb b zagsẽ ne sũ-noogo la laafi.»

²⁴ A Moyiiz tũ-la a rɛɛmba saglse n maan wala a sẽn togsã.

²⁵ A tũusa Israyɛl kamb sʋka neb sẽn tar dabaare la a kõ-b-la naam, naam sẽn dɩt neb tusri zugu, bɩ neb koabga, bɩ neb pis-nu, bɩ neb piig zugu.

²⁶ Wakat buud fãa b ra bee neba sʋk n kaood bʋʋdo. Koe-bɛda bal la b ra wat ne a Moyiiz taoore; bãmb mens n da welgd koe-bõonesã.

²⁷ A Moyiiz basa a rɛɛmba t'a lebe; a sɩd le rɩka a tẽng sore.