Yikri 17 - SEBR SÕNGO

Masa la Meriba

¹ Israyɛl kamba deega Soaala-Wẽnd noore, b yii Sin weoogã n dig taoore. B taa Refidim n yaas be, la b pa yãend koom n na n yũ ye.

² Dẽ la b yik zabr ne a Moyiiz: «Kõ-d koom tɩ d yũ!» T'a Moyiiz leok-ba: «Bõe yĩng la y zabd ne maam? Bõe yĩng tɩ y baood Soaala-Wẽnd noore?»

³ Ko-yũuda sẽn da zabd-b yĩnga, b kell n guglma ne a Moyiiz n yetẽ: «Bõe tɩ f yiis-d Ezipt tẽnga? F ratame tɩ ko-yũud kʋ tõnd ne d kamb la d rũms laa?»

⁴ A Moyiiz yõka Soaala-Wẽnd sɛɛg woto: «Bõe la m na n maan nin-bãmba yĩnga? Kellẽ la bilf bal tɩ b labẽ maam ne kuga.»

⁵ Tɩ Soaala-Wẽnd yeel a Moyiiz: «Yi ne f nebã, lʋɩ b taoore, foo ne zagsa kãsem-dãmb kẽere; rɩk rasaar ning fo sẽn tall n wẽ kʋɩlgã, rɩk-a n zã f nugẽ la kẽnge.

⁶ M na n yalsa f taoore, pĩiga zugu, Oreb tãnga. F na n wẽe pĩiga t'a pusg koom tɩ neba paam n yũ.» La yaa boto la a Moyiiz maan kãsem-dãmba taoore.

⁷ B boola zĩ-kãng tɩ Masa la Meriba, fɛɛsgo la no-baoore, la rẽ yaa b sẽn bao Wẽnd noor zĩ-kãnga la b sẽn fɛɛs Soaala-Wẽnd n na n bãng b sã n beeme bɩ b sã n ka be ne bãmba.

Zabre ne Amalɛk

⁸ Amalɛk waa Refidim n tak zabr ne a Israyɛl.

⁹ A Moyiiz yeela a Zozuwe: «Bao neb tɩ y yik beoog n tɩ zab ne a Amalɛk. M na dʋʋ n yalsa tãnga zugu la Wẽnd dasaara la m na n zã m nugẽ.»

¹⁰ A Zozuwe maana wala a Moyiiz sẽn togs-a; a yi n sega a Amalɛk la rẽ t'a Moyiiz ne a Aarõ la a Ur dʋʋ tãnga zugu.

¹¹ A Moyiiz nusa sã n da zẽk yĩngr fãa, a Israyɛl n da tõe. Nusa sã n sigi yaa a Amalɛk n da tõe.

¹² A Moyiiz nusa waa n kiime t'a Aarõ ne a Ur bilim kugr n kõ-a t'a zaond tɩ bãmb yaool n zẽkd a nusã, la woto wĩndig kẽeme tɩ b ket n zãnd yĩngri.

¹³ A Zozuwe sʋʋga varga a Amalɛk.

¹⁴ Wẽnnaam yeela a Moyiiz: «Bao sebr n gʋls yel-kãnga tɩ b ra wa yĩm-a ye la f togs a Zozuwe woto: m na n yẽesa Amalɛk rãmb buud saaga tẽngre.»

¹⁵ A Moyiiz mee maan-kugr n pʋd a yʋʋra woto: Soaala-Wẽnd la m tãb-kaoore.

¹⁶ La rẽ yaa a sẽn tʋlg n wilgi: «A Amalɛk bao zabre ne Naaba-Wẽnde, bɩ Naaba-Wẽnd kao zabr ne a Amalɛk, zamaan woo zamaana.»