Yikri 16 - SEBR SÕNGO

Yĩngr dɩɩbo la pitr-lʋɩɩse

¹ A Israyɛl kamba yii Elim n ta Sin zĩ-peen-daagẽ. Sin bee Elim ne Sinayi tẽnsʋka. B taa be b sẽn yi Ezipt tẽng tɩ kiuug la rasem piig la a nu.

² Israyɛl kamb yika we-raoogẽ wã n guglem ne a Moyiiz la a Aarõ.

³ B yeel-b lame: «Bõe tɩ y ka bas tɩ Soaala-Wẽnd kʋ tõnd Ezipt tẽnga, nemda rʋgd sẽn da waa n dɩg d taoore tɩ d kaood burã d yam? Bõe tɩ yamb tall zãma a woto fãa n wa zĩ-peen-daagẽ tɩ kom na n kʋ-ba?»

⁴ Dẽ la Wẽnnaam yeel a Moyiiz: «M na n kɩtame tɩ rɩɩb yi yĩngr n dʋʋg wa saaga tɩ y rɩ. Beoog sẽn vẽeg fãa neba na yi n wʋk sẽn sekd-b daar a ye dɩɩbo. M na n maana woto n ges b sã n na n sakame bɩ b sã n pa na n sak n deeg m noore.

⁵ Daar a yoob soabã b na n le wʋkame n segl b dɩɩbo la badaare a na n yɩɩga dasem kam dẽnna naoor a yiibu.»

⁶ A Moyiiz ne a Aarõ goma ne zãma wã woto: «Zaabrã y na bãng tɩ yaa Soaala-Wẽnd n yiis yãmb Ezipt tẽnga.

⁷ Beoog yibeoogo Soaala-Wẽnd na n puk-y-la b ziiri. B wʋma y sẽn tar gugleng ne bãmba. Sã n ya tõndo, d neeme tɩ y sẽn tar gugleng ne tõnda ka be zĩig ye.»

⁸ A Moyiiz da rat n yeelame: «Y na yãend Soaala ziiri, b sã n wa kõ yãmb nemd zaabre, n kõ-y rɩɩb yibeoog tɩ y rɩ n tɩge, tɩ y guglma ne Soaala la b wʋmame. Tõnd yaa bõe tɩ y na n guglem ne tõndo, yaa ne bãmb la y guglemda.»

⁹ A Moyiiz yeela a Aarõ: «Kõ Israyɛl zãma wã no-kãnga: Wa-y Wẽnnaam taoore tɩ b wʋma y guglengã.»

¹⁰ A Aarõ sẽn waa n gomd ne-bã, b wẽnemda b nens n tees zĩ-peen-daagã la b yãee Wẽnd ziirã sẽn puk yĩngri, sawadgẽ.

¹¹ Wẽnnaam goma ne a Moyiiz la ad-b sẽn yeel-a:

¹² «M wʋma Israyɛl kamba guglengu. Dẽ yĩnga yeel-ba: Zĩig sã n wa sobge y na wãb nemdo la yibeoogo y na tɩg rɩɩbo la woto y na bãng tɩ maam a Naaba-Wẽnd la yãmb Wẽnnaam.»

¹³ Zĩig sẽn sɩd sobge pitr-lʋɩɩs dʋʋgame n pid a Israyɛl sẽn da wẽ a sika zĩig ningã la vẽkẽmbeoogo meenem n dʋʋg n gilgi.

¹⁴ Meenema sẽn waa n mesge, b yãee bõn-bõonego sẽn ya bɛɛl-bɛɛla, sẽn pelg weooga wa zom, wa fʋl-fʋl-bi.

¹⁵ Israyɛl kamb yãee-a lame la b sogsa taaba: Woto yaa bõe? B da ka mi sẽn ya bũmb ning ye. T'a Moyiiz leok-ba: «Wã la rɩɩb ning Wẽnd sẽn kõt yãmbã.

¹⁶ La ad noor ning b sẽn kõt-y rɩ-kãnga poorẽ: Ned kam fãa wʋk sẽn tog n sek-a. Ned fãa wamde. F roog ned ba a ye ra kong a rẽnd ye. Bɩ ned kam fãa wʋk sẽn na n sek a roog rãmb fãa.»

¹⁷ A Israyɛl vẽega beoogo n maan wa Wẽnd sẽn yeelã. Kẽer dẽnd da yaa wʋsgo, tɩ kẽer dẽn ya bilfu.

¹⁸ B sã n yaool n dɩk magba wamde n na n mage, fãa zengda taaba. Sẽn wʋk-b wʋsga dẽnd boogdame, sẽn wʋk-b bilfa dẽnd fɩɩgdame. Ned kam fãa ra paamda sẽn sekd a rɩɩbo.

¹⁹ A Moyiiz yeel-b lame: «Ned ba a ye da saag n bĩng beoog yĩng ye.»

²⁰ Kẽer ka kelg ye la b yãkame n bĩng beoog yĩnga. Bãng-y tɩ sẽn keesã, zũnzũy kẽe-a lame la a põogame n lebg yũug zãng t'a Moyiiz sũur puug.

²¹ Dɩlla beoog-beoog fãa ned kam da wʋkda wala a sẽn tõe n dɩ tɛka; wĩndg sã n zẽke a boogdame.

²² Daar a yoob soabã b wʋka dasem kam fãa dẽnna naoor a yi: ned kam fãa wam a yi. Sagsa kãsem-dãmb waa n togsa a Moyiiz.

²³ T'a na n yeel-ba: «Soaala-Wẽnd n sɩd yeel woto: Beoog yaa vʋʋsg daare. Yaa Soaala-Wẽnd daare. Ning-y wʋngẽ y sẽn dat n ning be, la rʋg-y y sẽn dat n dʋge. Bas-y sẽn kella fãa beoog yĩnga.»

²⁴ B bĩnga sẽn keesã beoog yĩnga, wala a Moyiiz sẽn yeelã la bũmb ka põog n lebg yũug ye, bũmb ka kẽ zũnzũy ye.

²⁵ A Moyiiz yeel-b-la baraare: «Yãmb dɩɩb la woto rũnna, yaa vʋʋsg daare, yaa Wẽnnaam daare. Rũnna bũmb ka na dʋʋg pʋʋgẽ ye.

²⁶ Dasem a yoobã, y tõe n wʋk-a lame la raar a yopoe soaba, vʋʋsga raarã, a kõn dʋʋg ye.»

²⁷ Daar a yopoe soaba, neb kẽer baas n yiime n na n tɩ wʋke, la b pa yãend bũmb ye.

²⁸ Soaala-Wẽnd yeela a Moyiiz: «Yãmb na n zãgsa m noora reegr n ta da-bʋre?

²⁹ Ade, m kõo yãmb vʋʋsg noore. M kɩtame tɩ daar a yoob soaba bɩ y paamd sẽn sekd dasem a yiib dɩɩbo. Dẽ yĩng bɩ ned kam fãa pa a zĩigẽ; a yopoe daarã bɩ ned da yi ye.»

³⁰ Dẽ tɛka b pa le saag n tʋm vʋʋsga daar ye.

³¹ Rɩɩba sẽn da yit yĩngr n dʋʋgd tẽngã, Israyɛl kamba ra sokda taaba: «Bõe la wã, bõe la woto?» B ra ka mi a sẽn ya-la. A ra wẽnda siili, n ya pɛɛlga, n noom wa miisd sẽn dõos ne sɩɩdo.

³² A Moyiiz yeelame: «Ad Soaala-Wẽnd sẽn yals bũmb ninga: Bao-y wamde n wʋk rɩɩbã n pids-a, n bao zĩig n bĩng-a y kamb yĩnga, woto b na yãe rɩɩb ning m sẽn tall n dɩlg yãmb we-raoogẽ wã, m sẽn waa n yiis-y Ezipt tẽnga.»

³³ A Moyiiz yeela a Aarõ: «Bao rubla n pids-a ne rɩɩbã n tɩ rɩgl-a Soaala-Wẽnd taoore, y yagensa yĩnga.»

³⁴ A Aarõ baoo rubla, n pids ne rɩɩbã, wala Soaala-Wẽnd sẽn yeelã la b bĩng-a-la ne kuga walsã.

³⁵ Yɩɩ yʋʋm pis-naas pʋgẽ la Israyɛl kamba paam dɩ-kãnga n tãag b sẽn na n yi we-raoogẽ n kẽ tẽngẽ. B da rɩtame la b sokd b mens tɩ bõe la wã, n tãag Kanaã rãmb toaagẽ.

³⁶ Wamda sẽn da magd ned kam fãa pʋɩɩrã, yaa bãmb piig n da pit peoogo.