Yikri 11 - SEBR SÕNGO

-10- Kom-kẽems kũum

¹ Soaala-Wẽnd yeela a Moyiiz: «Yel-beed a ye n kete, a ye tãa, m sẽn na n tool Ezipt dĩma ne a soolem dãmba. Dẽ poore, a na bas-y tɩ y looge, a pʋs n na n dig-y lame menga.

² Wilg m neba tɩ ned kam fãa kos a yaka, rao bɩ paga, wanzurf la sãnem teedo.»

³ Soaala-Wẽnd kɩtame tɩ b nebã ne Ezipt rãmba moor zems taaba. A Moyiiz meng da yaa nin-kãseng Ezipt tẽnga, dĩma sõsd-n-taasã la a soolma rãmb fãa nifẽ.

⁴ A Moyiiz yeela dĩma: «Ad Soaala-Wẽnnaam koɛɛga: Yʋn-sʋka, m na n pɩʋʋga Ezipt tẽnga.

⁵ Sẽn ya-a a ma pipi bi-ribl fãa, Ezipt tẽnga tõre, na n kiime: biig ning sẽn tog n ledg dĩma, a zaoorẽ, na n kiime, wala yem-pogsa sẽn werd neerẽ wã kom-dẽemse, la rũmsa me pipi kamba sẽn ya raado.

⁶ La kɛleng n na n kelem Ezipt tẽng tõre, wala b sẽn zɩɩ n wʋm la b kõn le wʋm a taar ye.

⁷ Sã n ya ne mam kambã, kɛleng kõn kelem ye, baag meng kõn wes ninsaal bɩ rũng ye. La woto f na bãng tɩ maam, Naaba-Wẽnd baka a Israyɛl toore, m welg-a-la ne Ezipt rãmba.

⁸ Wakat kãng marsã, f poorẽ dãmb na wa n wõgemd m taoore n yeel-ma: ‹Looge, foom ne f nebã.› La m sɩd na n looga wakat kãnga.» A Moyiiz yii Ezipt dĩma zakẽ n loog ne sũ-puuri.

⁹ Soaala-Wẽnd yeela a Moyiiz: «Dĩma ka na n sak y kelgr ye; rẽ fãa yaa sẽn na yɩlẽ tɩ m pids Ezipt tẽng ne m bõn-bãna.»

¹⁰ Yel-beeda fãa sẽn sõdgã, a Aarõ ne a Moyiiz kɩtame tɩ b pids dĩma taoore. La Wẽnnaam kidba a sũuri t'a zãgs tɩ Israyɛl kamb kõn yi a tẽngẽ ye.