Yikri 1 - SEBR SÕNGO

Ezipt tẽng vɩɩm

¹ Ad-a Israyɛl kamb ne b zak rãmb sẽn tũ a Zakoob n wa Ezipt tẽnga:

² A Rubẽ, a Simeõ, a Levi, a Zɩɩda,

³ a Isakar, a Zabulõ, a Bẽnzame,

⁴ a Dã, a Neftali, a Gad la a Asɛr.

⁵ Sã n naag ne b zak rãmba, b fãa gill sõor yaa pisopoe. Sã n yaa a Zozɛf, yẽ ra reng n bee Ezipt tẽnga.

⁶ A Zozɛf ne a saam-biisa fãa waa n maana kaalem.

⁷ B ra roga kamb wʋsgo, n wa lebg ka tɛka; b waa n pida tẽngã, b waa n kẽe pãafo.

⁸ Dĩm a ye n wa n deeg Ezipt tẽng naam. Yẽ ka bãng a Zozɛf ye.

⁹ Yẽe n wa n yeel a soolem dãmba: «Dẽnd d gũus ne a Israyɛl kamba, b lebga wʋsgo, b tara pãnga; tõe n wa yɩɩ yelle.

¹⁰ D bao yam n kõ d menga, n sõng tɩ b sõora ra le paas ye; ka rẽ zabr tõe n yikame tɩ b bas tõnd sõngre n sõng d bɛɛba, n yaool marsã n paam n looge.»

¹¹ Woto wã b yãka neb sẽn na n ges Israyɛl kamba tʋʋma, neb sẽn na n mao tɩ b yãend far ne tʋʋm-toodo. Ezipt dĩma kɩtame tɩ b me tẽn-bɛd a yi: Pitom la Ramsɛs. Be la b ra bĩngd b te-koosem buud fãa.

¹² Israyɛl kamba far da paasdame, la b sõora ra ka woogd ye, b tol n paasa wʋsgo, tɩ Ezipt tẽng-rãmb wa maand dabeem.

¹³ Israyɛl kamb deega tʋʋm toodo.

¹⁴ Yɩɩ tʋʋm sẽn sɩd nams-b wʋsgo: Tãnd tagbo, tãn-koɛɛm wẽebo, koobo; yɩɩ ne tʋʋm buud fãa la b modg-ba.

¹⁵ Ezipt dĩma boola pʋg-roagsdb a yiibu sẽn da rogsd Ebre pogsã, a Sifara ne a Ypwa, n yeel-ba:

¹⁶ «Y sã n dogsd Israyɛl pagbã bɩ y maan gũusgu. Ges-y biiga yaa pag bɩ raoa. Kʋ-y kom-dibli la bas-y kom-pugli wã.»

¹⁷ Pʋg-roagsdba da zoeta Wẽnde, woto b pa sak n deeg dĩma noor ye. B pa sak n kʋ kom-dibli wã ye.

¹⁸ Dẽ la dĩma bool-ba n yeel-ba: «Yaa bõe yĩng la yãmb bas kom-dibli wã n pa kʋʋda?»

¹⁹ Tɩ b na n leoke: «Ad-y Israyɛl pagba ne Ezipt pagba ka wẽnd taab ye; b tara pãnga, woto, pʋg-roagsa ne a na n ta tɩ b rog n sɛɛme.»

²⁰ Wẽnd ninga pʋg-roagsdba barka. A Israyɛl kamba tõog n lebga wʋsgo, b tõog n kɩɩ yẽgna.

²¹ Pʋg-roagsdba sẽn zoe Wẽnnaam nifa yĩnga, Wẽnd yalga b buudu.

²² Dĩma waa n yeela a nebã: «Lob-y koomẽ a Israyɛl sẽn na n dog kom-dibli niyns fãa; bas-y kom-pugli wã bala.»