Yɩɩn‑sõamyã 80 - SEBR SÕNGO

Lɛɛg-y n wa fãag-do — Sõngr kosgo

¹ A Asaf yɩɩlle. Yɩɩla naab yɩɩnd-a lame t'a wẽneg: Tees lɩɩnse.

² Israyɛl pe-kɩɩma, kelge! Yãmb n get a Zozɛf yelle wa rũm-kɩɩm ne a rũmsi. Yãmb sẽn tɩ zaoolg y meng malɛgsa zutu,

³ puk-y y meng a Efrayim, a Bẽnzame la a Manase. Le yik-y ne d sẽn mi-y ne raood ningã n wa fãagd-do.

⁴ Le kẽes-y tõnd d soolmẽ. Sõng-y tɩ y nenga vẽenem bui-du tɩ d na paam fãagre.

⁵ Soaala, Pãng-Soaba, y sũura na n puugame n ta da-bʋre, y buuda neba kosg na n yaal-y lame n ta wakat bʋgo?

⁶ Y na n kell n dɩlga y kamba ne bur sẽn wẽ ne nintãm, n yũnug-b ne nintãm wam pogbre?

⁷ Yãmb kɩtame tɩ d bɛɛba tar no-koɛɛm tõnd poorẽ, yãmb kɩtame tɩ d lebg d bɛɛba laado.

⁸ Soaala, Pãng-Soaba, le kẽes-y tõnd d soolmẽ, Bɩ y nenga vẽenem bui-du, tɩ d na paam fãagre.

⁹ Bugsuntung ning y sẽn võog Ezipt tẽnga, y lebs-a lame n sel zĩig ning y sẽn dig bu-zẽmbã n yiisã.

¹⁰ Y pesma tẽngã a yĩnga, sẽn na n yɩlẽ t'a kɩ yẽgen sõma n wa reeg zĩigã n yãmbe.

¹¹ Tãmsa ra bãma ne a maasem, t'a biisa gaam tɩ bɛdã,

¹² t'a tão a wila n tãag mogre, n tão a yagense n tãag kʋɩlgã.

¹³ Bõe tɩ y bas t'a yãgra wurgi, tɩ so loaadba kẽed n kaood a biisi?

¹⁴ Reoog yita a tʋgrẽ n wa rɩ-a tẽnga rũms wat n wãbd-a lame.

¹⁵ Wẽnnaam Pãng-Soaba, lɛɛg-y n wa-y yã. Zĩnd-y yĩngr n ges y bugsuntungã, la y y maan bũmbu a yĩnga.

¹⁶ Maan-y bũmb y tɩɩga yĩnga tɩɩg ning y nuga sẽn selã, maan-y bũmb y dĩma yĩnga, y sẽn taag a soab naama kaama yĩnga.

¹⁷ Bɩ sẽn yõog-b la sẽn kʋʋg-b tɩɩga da le yaas Wẽnd sẽn pid ne sũ-fõora taoor ye.

¹⁸ Bɩ y nuga kell n tik dĩma y sẽn zĩndg y rɩtgo n kõ naama.

¹⁹ Woto d kõn le bas-y ye, y na paas d vɩɩma noogo, la d na waoog y yʋʋre.

²⁰ Soaala Wẽnd-Pãng-Soaba, le kẽes-y tõnd y soolmẽ, bɩ y nenga vẽenem le bui-du tɩ d na paam fãagre.