Yɩɩn‑sõamyã 78 - SEBR SÕNGO

A Israyɛl yĩmame — Zãmsgo

¹ A Asaf yɩɩlle. M buudu, kelg m gomde! M noora goam lʋɩ f tʋbrẽ.

² M na n yaaga m noor n gome tɩ zaamẽ yɛla yik rũnna n le kõ-d zãmsgo.

³ Tõnd sẽn wʋme, d sẽn yãende, d ba rãmba sẽn taas tõndo,

⁴ d ka na n sĩnd-b ye, d na n deeg-b lame n wilg d yagense, d na wilg-b bõe yĩng la Soaala tog ne pẽgre, d na puk b pãnga ne bõn-bãna sẽn maana.

⁵ Noor la b yals a Zakoob tẽn-peelmẽ, a Israyɛl buuda yĩng la b yiis noore, la noora ra yeta d yaab rãmbã

⁶ tɩ b wilg b yagensã, tɩ bãmb me wa reeg n taas b sẽn na n dog kamb niynsã.

⁷ Noora ratame tɩ b teeg Wẽnde, tɩ b da yĩm wẽnd-makr dãmba ye, tɩ b tũ sor ning b sẽn wilgi,

⁸ n da wẽneg b yaab rãmba, tɩ yaab rãmba zamaan yɩɩ tõatb zamaana, ninsaan-yiu la pilimpigd zamaan, ninsaalb sẽn ka pelg b pʋg ne Wẽnd zamaana.

⁹ A Efrayim yagensã sẽn da bob logdo n na n tak zabrã kong n lɛɛg n zoe tula, zabra raare,

¹⁰ tɩ b zãgsa Wẽnd noora reegr n sãam zoodã.

¹¹ B ra yĩma b bõn-bãna, n yĩm b tʋʋm-bãna b sẽn maan b barãmb nifẽ.

¹² B ba rãmba nifẽ, b ra maana makr-dãmb a taaba: Ezipt tẽnga, Tanis noorẽ,

¹³ mogra koom waa n yik n yalsa wa lalga goabg la rɩtgo tɩ b loog sʋka.

¹⁴ B ra wilgd-b-la sor wĩntoogo ne sawadgo, yʋngo sawadg kãng kelld n yãngda ne vẽenem.

¹⁵ We-raoogẽ pĩisa ra pusda koom, tɩ b ra tar koom n yũud b yam wa b pooga tẽngr ko-yũugã.

¹⁶ Pĩisa pusga koom la b kooma zoe wa kʋɩlse.

¹⁷ Ne rẽ fãa yaab rãmba kell n talla Wẽnd beegre. Pʋ-weesẽ wã b yõka Pãng-Soaba tõdgre.

¹⁸ B yika ne pʋ-toogo n fɛɛs Wẽnde. B kosame tɩ b kõ-b tɩ b rɩ wa b sẽn dat tɛka.

¹⁹ B guglma ne Wẽnde, la ad-b sẽn yeele: «D ges Wẽnd sã n tõe n kõ-d-la rɩɩb we-raoogẽ.

²⁰ D yãenda b sẽn wẽ pĩigã, n sɩd tõog tɩ koom zoe wa kʋɩlse, la sã n ya bura la nemdã, b yãet-a-la yɛ n kõ nebã?»

²¹ La Wẽnd me sẽn wʋm dẽ, b sũura puugame, tɩ bugum widg n na n dɩ a Zakoob, tɩ b sũura na n fudg n waag a Israyɛl.

²² B ra ka bas b yɛla ne Wẽnd ye, b ra pa tẽed tɩ b na fãag-b ye.

²³ Soaala kõo yĩngr sawata noore, b pagsa yĩngr ko-nina.

²⁴ B kɩtame tɩ rɩɩb yi yĩngr n dʋʋge, alkam sẽn bʋd yĩngr la b kõ-ba.

²⁵ Woto ned kam fãa paama yĩngr dãmba dɩɩb n dɩ. B kõ-b lame tɩ b rɩ n tɩge.

²⁶ Yĩngri, b tusa yaang sobga t'a menem, b Pãnga boola nug rɩtg sobgã.

²⁷ Nemd kaooga wa sobg n dʋʋge, luiili nemd la b kõ-ba, la luiili wã sõor zema mogr noor bĩisri.

²⁸ Luiili wã ra wat n dʋʋgda b sika pʋga, b rʋʋgame n gilg b rotã.

²⁹ B rɩɩme la yɩɩ rɩɩb tɛka; Wẽnd da reega b kosgo.

³⁰ B velma ra ket n zabd-b lame, b noor da ket n pida ne nemdo,

³¹ la Wẽnd sũur puuga ne-ba la sẽn da ya-b nin-tɩɩsa fãa loogame, a Israyɛl kom-bɩɩba me naag n dʋʋgame.

³² Ne rẽ fãa b ra ket n beegda Wẽnde, bõn-bãna sẽn da maanda ka gãneg b yam ye.

³³ B raar ra loogda wa sobg sẽn loode, tɩ b yʋʋma ra pid ne yɛɛsg la yɛɛsgo.

³⁴ B sẽn wat n kiidẽ wã la b baood Wẽnd zĩiga; wakat kãng bal la b ra teemd zʋgo, la b wẽnemd b neng n tees bãmba.

³⁵ B ra lebd n tẽegame tɩ Wẽnd la b pĩiga, tɩ Pãng-Soaba la b Sõangda.

³⁶ La b waa n gomdame n dat n tudug Wẽnde, b zelemda da ka leokd sɩd ne Wẽnd ye.

³⁷ B sũura ra ka loe ne bãmb ye, b ra ka maand pʋ-peelem ne Wẽnd zooda ye.

³⁸ Wẽnd kelga b nimbãan-zoeerã n da yẽesd b beegrã, la b ra basd-lame n pa kʋʋd ye. Naoor wʋsgo Wẽnd yõka b menga, b pa bas tɩ b sũura fudg zãng ye.

³⁹ Wẽnd tẽrame tɩ b naan-b-la ne nemd bala, la b yaa pemsem sẽn lood n ka na n lebg ye.

⁴⁰ Yaa naoor ka tɛka la b yɩ tõatb, we-raoogẽ wã, yaa naoor ka tɛk la b yɩ kɩɩsdb, zĩ-peen-daasẽ wã.

⁴¹ Yaab rãmba ka wʋʋs ne Wẽnd fɛɛsg ye. B sãamda Israyɛl Nin-sõnga sũur dũnna, n le sãam-a beoogo.

⁴² B wa n yĩma tʋʋm-bɛd niyns b nug sẽn tʋme, tɩ b paam n yi b soaalba yembdẽ.

⁴³ B yĩma b sẽn maan Ezipt, b sẽn maan Tanis.

⁴⁴ B yĩma b sẽn yũnug b tẽnga t'a lebg zɩɩm, zĩig zãnga, tɩ ko yũudem ka le tõe n paam n yũ ye.

⁴⁵ B yĩma b sẽn tʋm dũms la keooda, n tʋm loms b zagsẽ la b ko-yũusẽ.

⁴⁶ B yĩma b sẽn tʋm sʋʋre t'a wa sɛɛs b bõn-koadi, n tʋm kalwaare t'a wa loog ne sẽn bʋde.

⁴⁷ B yĩma b sẽn bas tɩ sapɩlem sʋʋg b bugsuntundu, n bas tɩ waood pus b kankama.

⁴⁸ B yĩma b sẽn bas tɩ sapɩlem lab b rũmsi, n bas tɩ sa-tãs yõog b bãg la b wuba.

⁴⁹ B yĩma b sẽn bas tɩ b sũura puug n waag-ba, n bas-b ne sũ-beed la yɩɩre, n bas-b ne tẽn-kũum malɛgse.

⁵⁰ B yĩma b sẽn bas-b ne b sũ-fõore, tɩ kũum kẽed b zagsẽ, tɩ bã-longdem loogd ne yõore,

⁵¹ B yĩma b sẽn kʋ Ezipt kom-dẽemse, tɩ b zags fãa dig rogem waoodo.

⁵² B sẽn yiis b neba wa niisi, b sẽn tees-b we-raooga wa piisi.

⁵³ B yĩma b sẽn kiis b yɩɩre n wilg-b so-sõma n yaool n bas tɩ mogra rɩ b bɛɛba.

⁵⁴ B yĩma b sẽn tall-ba n kẽes b soolmẽ b sẽn deeg tãn-sõnga ne pãnga, n tall-ba n dʋʋs a zug tẽnsʋka.

⁵⁵ B yĩma b sẽn dig bu-zẽmbã b taoore, b sẽn kõ buud fãa a zu-noog pʋɩɩre b sẽn kẽes Israyɛl sak fãa a roogẽ.

⁵⁶ Yaab rãmba le yik n yeelame tɩ zãaba pa ta b yam ye, tɩ b le yik n tar yĩngr Wẽnda fɛɛsgo, tɩ b le yik n zãgs b noora reegre,

⁵⁷ tɩ b le sɩng zãmbo ne Wẽnde, n sɩng zoe n zãag ne Wẽnde. B yɩɩ wa pĩim sẽn lɛɛg n kõs a tãooda.

⁵⁸ B ra yaanda Wẽnd sũuri ne b tãmsa zut maan-kugã, Wẽnd sũur da kãbda ne b wẽn-naandsã.

⁵⁹ Wẽnd wʋmame n sɩd yik ne b kamba, a Israyɛl la b yik n dig zãnga.

⁶⁰ B meng zãaga ne Silo, n zãag ne roog ning b sẽn da kõ b menga, b sẽn waa n dat n zĩnd b neba sʋkã.

⁶¹ B basame tɩ b loog ne zood kasetã, n bas tɩ bɛɛba na n sɩng b ziira paoogre.

⁶² B basa b buuda ne bɛɛba sʋʋse, b zaba ne b sẽn da kees buud ning wala b pʋɩɩrã.

⁶³ Bugum tilgame n dɩ b kom-bɩɩbã, b kom-pugli ka le paam tɩ b yãb b kʋʋr ye.

⁶⁴ Maan-kʋʋdba mens kooda ne sʋʋse, la pʋg-kõapa pa yãb b sɩdb rãmb ye.

⁶⁵ Wẽnd waa n neka wa ned sẽn da gõe, wa gãndaoog sẽn paam dãam n yẽeg a gĩini.

⁶⁶ B leba poorẽ n wẽ b wẽedo, la bɛɛba kõn tõog bada n pek rẽgd ning sẽn dẽgem-b baraara ye.

⁶⁷ B basa a Zozɛf buuda kɛɛnga, b basa a Efrayim roogo.

⁶⁸ A Zɩɩda buuda la b yãk yã, Siõ tãnga n waa n ta b yam n yɩɩd.

⁶⁹ B mela b rooga tɩ yẽ me lug wa tãnga, b yals-a-la wa b sẽn yals tẽngã, yaa daar fãa yĩnga.

⁷⁰ B sõgen, a Daviid, la b lʋɩɩs taoore, la rẽ t'a ra yaa pe-kɩɩma.

⁷¹ A Daviid basa a piisã n wa sake, la Wẽnd kɩtame t'a lebge a Zakoob buuda pe-kɩɩma, n kɩt t'a lebg a Israyɛl, bãmb pʋɩɩra, pe-kɩɩma.

⁷² Pe-kɩɩma sũur da yaa tɩrga, la a sɩd gũ piisa ne yam sõngo.