Yɩɩn‑sõamyã 68 - SEBR SÕNGO

Wẽnd paam pẽgre — Bark pʋʋsgo

¹ Yɩɩlla bee yɩɩla naab sebrẽ. A Daviid yɩɩlle.

² Bɩ Wẽnd yiki tɩ b bɛɛba fãa sẽege, tɩ b fãa ning tĩig b taoore.

³ Wala bug-zõose sẽn nukd n looge, wala siribdu sẽn yẽnegd bugmẽ, bɩ nin-wẽnsa me menem woto Soaala taoore.

⁴ Bɩ nin-sõma wã yẽ noog b sũuri, Wẽnd taoore bɩ b sɩng kɩdengo la saooga!

⁵ Yɩɩl-y Wẽnd yĩnga, pẽg-y b yʋʋre, n deeg sẽn zao-a sawadga wa weefo; b yʋʋr la Soaala, d kɩdem b taoore.

⁶ B ro-sõnga pʋga bãmb la kɩɩb-bi ba, pʋg-kõapa sã n paamd bʋʋm tũuda ne bãmba.

⁷ Zĩ-m-ye soab wat n lebga zak soaba. Sẽn pag-b rãmb roogo wat n paama yɩng pemsem noogo. Tõatba bal n ka na n paam zĩ-bʋgsgo.

⁸ Soaala, y sẽn waa n yi ne y buudã n kẽne n ta we-raoogẽ,

⁹ tẽnga miimame tɩ saag meng minisi, Sinayi Wẽnde, Israyɛl Wẽnde!

¹⁰ Yãmb kɩtame tɩ saag ni wʋsgo. Tẽnga sẽn da kʋɩ wã le vʋʋgame.

¹¹ Yaa be la y zĩndg y buudã, yaa zĩ-kãng la y nonglma ra segl n bĩng naong soaba.

¹² Soaala yiisa b koɛɛga tɩ sẽn na deeg-ba n yelg mooga ya tãb-biis ka tɛka.

¹³ Dẽ me la dĩm dãmb ne b tãb-biisa sẽn sɩng zoees la b sẽn tar zoeese. Pagba sẽn pa yira na paam teed n pʋɩ.

¹⁴ Da bõn-y y mens n pa y tãb-sikẽ ye. A Israyɛl pʋɩɩra wẽnda walle la a pɩgsa tablga wanzurfu, la pigsa kõbdã yaa sãnem.

¹⁵ Wẽnd sẽn waa n sẽeg dĩm dãmba zĩ-kãnga, dẽ tɩ waooda saag gĩsa kooma, tɩ tãn-sablga zugu lebg pɛɛlg-a.

¹⁶ Bazã tãmse, tãms sẽn lug n kul yĩngri, tãms ne kũna, Bazã tãmse,

¹⁷ bõe tɩ y maan sũ-kiiri, Bazã tãmse, bõe tɩ y sɩndge n get tãng ninga Wẽnd sẽn dat n zĩnd a soab zugã? N-ye! Soaala na n zĩnda a zug daar fãa.

¹⁸ Wẽnd wed-dʋʋdba sẽn yer miida ka tõe n sõd ye. Soaala yii Sinayi n wa ne bãmba, b ro-sõngẽ.

¹⁹ Yãmb dʋʋ yĩngr tẽnsã n yõg neb kẽere, be me y reega kũuni, ba tʋb-pa-wʋmdba rẽnna, la y tilga y zak Siõ.

²⁰ Bɩ Wẽnd paam pẽgr beoog sẽn vẽege! Yaa bãmb n wat ne d bɛɛba tõogre.

²¹ Wẽnd ning sẽn kõt-d daooda la bãmba la bãmb n naag n pagdẽ la b pakd bʋg-tẽng noore.

²² Wẽnd bõgsda b bɛɛba zutu, zut ne zoobd sẽn ka põngde, wa sẽn tog ne tʋʋm-beed rãmba.

²³ Soaala yeelame: «M na n talla m sẽn yõg b rãmb Bazã n wa, n paas m sẽn yõg b rãmb mogra ko-zulungẽ.

²⁴ F nao na fẽd-ba, b zɩɩmẽ, f baasa fãa zelemd na lemb b sẽn pʋɩ n kõ-ba.»

²⁵ Wẽnnaam, Adem biisa yãenda y neba sẽn tonge, m Wẽnd la m dĩma neb sẽn tong y do-sõnga pʋga.

²⁶ Yɩɩn-yɩɩndba n be taoore, tɩ yʋʋm teeda rãmb be poorẽ, tẽnsʋk yaa kom-pugli wã, kom-pugli niyns sẽn wẽed gãngão-gilsã.

²⁷ Bɩ Wẽnd paam pẽgr kʋʋnga sʋka Bɩ Israyɛl kamba sẽn tigim taaba pẽg Wẽnde.

²⁸ A Bẽnzame n lʋɩt taoore. Yẽ n paood n yɩɩd sags a taabã. Sẽn pʋgd yaa a Zɩɩda sak kãsem dãmba, sẽn yer fut sẽn maneg n buk ne sãnem, Dẽ poore a Zabulõ la a Neftali sak kãsem dãmba.

²⁹ F Wẽnda yalsame tɩ b na tʋm daoodo. Wilg-y-du, m Wẽnde, y pãn-kẽengo, bũmb ka be a sẽn pa tõog d yĩng ye.

³⁰ Dĩm dãmba sã n yãeend dĩma zakã sẽn lug yĩngr Zerizalɛɛm, ad-y b na wa ne b kũuni.

³¹ Bɩ dĩma gẽen rudma bõn-nindã n gẽen lol-toosã, gẽen koomẽ rũmsã, gẽen sẽn kũud-b f taoor ne b ligdã! Dĩma sẽeg buud niyns sẽn baood-b zabrã,

³² tɩ peen neeba le tõog n yit Ezipt n watẽ, tɩ Etiopi wat Wẽnd taoore, t'a nug teesd-b kũuni.

³³ Tẽng zug dĩm dãmba, pʋd-y yɩɩl Soaala yĩnga. Kils-y Soaala-Wẽnde, maan-y sũ-noog bãmb yĩnga.

³⁴ Bãmb weoof zomb n kẽeda sawad-kutẽ, bãmb koɛɛga la saaga peng n tãsd ne pãnga. Reeg-y tɩ bãmb n so pãnga.

³⁵ B siga Israyɛl ne naam tɛka. B pãnga tigma sawatẽ.

³⁶ Wẽnd bee b ro-sõngẽ wã n wilgd tɩ b pãnga ka be taar ye, bãmb la Israyɛl Wẽnnaam, bãmb n kõt b neba pãng la tõogo. B soog barka!