Yɩɩn‑sõamyã 52 - SEBR SÕNGO

D da teeg d paoong ye — Saglgo

¹ Yɩɩlla bee yɩɩla naab sebrẽ. A Daviid yɩɩlle.

² A tẽegda Edomitg a Doeg sẽn waa n wilg a Sol t'a Daviid kẽla a Abimelɛk zakẽ.

³ Wʋglem bãag bʋg la f bẽeda n yet tɩ wẽng bala la fo na n tʋme?

⁴ Beoog sẽn vẽeg fãa wẽng bala la f yama tar bilgri. F zelemda rɩta wala wanzam barga, f sẽn mi bal la neb kãnegre.

⁵ Fo nonga wẽnga n kis neere, n nong zirẽ-beed n yɩɩd sɩda.

⁶ F zelemd goalenga sẽn mi yaa sẽn sãamd bala. F sẽn leok fãa yaa kalem-kalem.

⁷ Wẽnd na n bas-f lame tɩ f lʋɩ n da le yik ye, b na n tak-f lame n yiis f roogẽ, b na n võog-f lame n yiis nin-vɩɩs sʋka.

⁸ Dẽ marsã la nin-sõma wã na n yãende, n wẽed siri la b gomda:

⁹ «Ges-y rao ninga sẽn da maand wʋglma, n da teeg a paoongã n yɩɩd Wẽndã!»

¹⁰ Sã n ya maam, m na n wẽnega oliviye, sẽn tãood a wil Wẽnd zakẽ. M teega Wẽnd nonglma sẽn ket n pʋgd-m wakat fãa.

¹¹ Y tʋʋm sõnga yĩnga, m na pʋʋs-y barka, la m gũuda wa bũmb sẽn toge, daar ning b sẽn na n pẽg y yʋʋrã nin-sõma wã sʋka.