Yɩɩn‑sõamyã 30 - SEBR SÕNGO

M boonda m Soaala, m pʋʋsd-b-la barka

¹ A Daviid yɩɩlle, a dooga bark ningr daare.

² M pẽgd-y-la ne m pãng fãa, Soaala, y yaag-m-la bul-zulungẽ, m bɛɛba ka paam n la-m ye.

³ Soaala, m Wẽnde, yãmb la m tees n kelme la y sãoog-m lame.

⁴ Soaala, y yiis-m-la bʋg-tẽnga, yãmb le vʋʋg-m lame ne m sẽn da zoe n lebg yaoog bũmbã.

⁵ Wẽnd kamba yɩɩl Soaala yĩnga; kils-y-b tɩ b pida ne sõmblem.

⁶ Y sũura puuga bilf bal ne-ma la yaa m vɩɩma tõre la m tɩg y nonglem. M yãbra yãba yʋngo n zʋʋg zĩiga, la beoog sẽn vẽege, lebga sũ-noogo.

⁷ M da zĩi ne laafi n gomda: «Bũmb kõn zãag-m ne Wẽnd ye!

⁸ Mik yãmb yika ne nonglem n kõ-m tãng keglem.» Y yaool n wa yik n solga y nengã tɩ rabeem yõk-ma.

⁹ Dẽ me la m bool-y, Soaala, dẽ me la m kolg n yõk y sɛɛga, n yeele:

¹⁰ «M zɩɩma daagr ka yõod yɛ, m yaoog pʋgẽ sigb ka yõod ye, Sẽn lebg-a tom ka tõe n le pẽg-y ye, a ka tõe n le kils y nonglem ye.»

¹¹ Kelg-y-ma, Soaala, zoe-y m nimbãanega! Zoe-y n wa sõng-y-ma.

¹² Y teka m kʋ-yãbra tɩ lebg saooga, Soaala Wẽnde, m na pʋʋs-y barka, beoog sẽn vẽeg fãa,

¹³ tɩ m tar yɩɩl n pa rat n sĩnd ye, n tar y bark pʋʋsg daar fãa.