Yɩɩn‑sõamyã 135 - SEBR SÕNGO

A Israyɛl la b pʋɩɩre — Pẽgre

¹ Wẽnd soog pẽgre! Pẽg-y Soaala yʋʋre! Yãmb fãa sẽn tʋmd b zakẽ,

² yãmb fãa sẽn kẽed b ro-sõngẽ, yãmb fãa sẽn yɛs b sɩmannẽ.

³ Pẽg-y Soaala! B yaa nin-noanga kils-y b yʋʋre, bãmb la d zoodo.

⁴ Soaala n tũus a Zakoob, a Israyɛl la b reeg n kõ b menga.

⁵ N-ye! M miime tɩ Soaala yaa nin-kãsenga, tõnd Wẽnda n yɩɩd sẽn keta fãa.

⁶ B maana b sẽn dat bũmb ning fãa, yĩngri, saasẽ wala tẽng zug ka, mogra ne a bog zulunga, bãmb n naana.

⁷ Bãmb n zẽkd sawat tɩ b kuiis yĩngri, bãmb n tãsd n sik saaga, bãmb n kõt sobgã a pãnga.

⁸ Soaala zẽka b nug Ezipt tẽnga, t'a kom-dẽemsa na n loog zãnga, rũmsa kamba wala rĩm biisi.

⁹ B sẽn tʋm b rãmba me nus zĩnda pãnga; t'a Moyiiz na n pids Ezipt ne bõn-bãna, t'a Aarõ na n pids-a ne yɛl soalma; tɩ b na n lub dĩma ne a poorẽ dãmba.

¹⁰ B tõoga bu-zẽmb ka tɛka, n kʋ dĩm dãmb sẽn da tar pãnga,

¹¹ yɩ-la a Siyõ, Amoritsa dĩma, n le paas a Og, Bazã dĩma la Kanaã tẽng dĩm dãmba.

¹² Bãmb tẽnsa la b reeg n kõ a Israyɛl, t'a Israyɛl lebga bãmb pʋɩɩre.

¹³ Soaala, b na n kilsa y yʋʋrã; b na n tẽega y yell zamaan woo zamaana.

¹⁴ Wẽnd n pukd b buuda sõmblem, bãmb n kogend neb niyns sẽn waoogd-b bãmbã.

¹⁵ Bu-zẽmba wẽn-naandsa, sẽn dõog ne wanzurf bɩ sãnema, yaa ninsaal nug tʋʋmde.

¹⁶ B tar noor me, b pa gomd ye, b tar nin me b pa ne fɩ,

¹⁷ B tara tʋba la b pa wʋmd ye, pemsem buud ka yit b noorẽ ye.

¹⁸ Bɩ sẽn naan-b bãmba wẽneg-ba, la sẽn teeg-b bãmba me boto.

¹⁹ Yãmba, Israyɛl kamba, pʋʋs-y Wẽnd barka; yãmba, a Aarõ yagense, pʋʋs-y Wẽnnaam barka.

²⁰ Yãmba, Levitsa buudu pʋʋs-y Wẽnd barka. Yãmb fãa, Wẽnd kẽed-paalsã, pʋʋs-y Wẽnd barka.

²¹ Bɩ Zerizalɛɛm sẽn zao Siõ tãnga kaas a barka pʋʋsg tɩ kul yĩngri. Wẽnd soog pẽgre!