Yɩɩn‑sõamyã 109 - SEBR SÕNGO

B lebs-m-la wẽnga — Sõngr kosgo

¹ Yɩɩlla bee yɩɩla naab sebrẽ. A Daviid yɩɩlle. Yãmb la m pẽgda Soaala. Bõe tɩ y ya sɩɩ n ka leokdẽ?

² M bɛɛba yaaga b noor n dat n wãb-ma, b yaaga b noor n dat n tudg-ma, b zelemda yiisa goam sẽn pa sɩd ye,

³ b gomame n wilg tɩ b kis-m lame, b zabda ne-ma la m ka tar b zabra võor ye.

⁴ B yao-la m zooda ne wɩdse dẽ la m tar y sɛɛga.

⁵ M maan-b-la neere la b lebs-m-la wẽnga, mam nonga bãmba tɩ b lɛɛg n kis maam.

⁶ Ad-b sẽn gomd m poorẽ: «D bao yelle n dogl a zugu, n bao kaset soab n zĩndg a rɩtgo.

⁷ Sõng-y tɩ b paalg-a bʋʋdo. Bɩ a kosga ra yɩ bũmb y sẽn na n sak kelgr ye.

⁸ Kɩt-y t'a yõor lebg koɛɛga, tɩ ned a to led a zĩiga,

⁹ t'a kamb lebg kɩɩb-bi, t'a pag lebg pʋg-kõore,

¹⁰ t'a kamb lebg gõaadba la bõs rãmba, tɩ b rig-b n yiis b raboodẽ,

¹¹ tɩ bobl-wẽng soab wa loog ne a paoong fãa, tɩ sãamb wa loog ne a sẽn tar fãa,

¹² t'a ra le yãend pʋ-peen-ned a sɛɛgẽ ye, tɩ ned da yãb a kɩɩbsa ye,

¹³ tɩ b menes a yagensa fãa gilli, tɩ yʋʋm a wãn pʋgẽ bɩ a yʋʋr menem moogo,

¹⁴ tɩ b le tẽegd Wẽnde a ba la a saamb dãmb yel-wẽna, t'a ma beegr ra tol n paam sugr ye!

¹⁵ Bɩ b wẽnema fãa pa Wẽnd pʋtẽerẽ, tɩ b yʋʋr yẽes tẽng zugu!

¹⁶ Ad-y nin-kãnga pa tol n bao n na n vɩɩnd ne pʋ-peelem ye. A namsa naong soaba, a pʋga nimbãan neda, a pʋgame n na n kʋ ned yam sẽn yi vɩɩm zãnga.

¹⁷ A sẽn da nong n kãab beedã, bɩ a kãab beeda lɛɛg n lʋɩ a zugu. A sẽn pa tʋlg n kãab noogã, bɩ kãab beed pa ne-a.

¹⁸ A sẽn dat beedã bɩ beeda lebg a ko-yũudem a bʋk a yĩnga wa ka-zɛɛdem.

¹⁹ A pil-a wa fu goabga a mobg-a wa sẽbdga.»

²⁰ Yaa woto la m kaset zirẽ dãmba maanda, yaa woto la b rõt-m Wẽnd taoore.

²¹ La yãmba, m Soaala-Wẽnnaam, maan-y ne maam wala y sẽn sɩng n maandẽ, y nonglma n tat m yam, fãag-y-ma.

²² M yaa naong soaba la nimbãan neda, m sũura võoga m pʋgẽ.

²³ M yõbgda bilf bilfu wa lika; b pĩngd-m-la wa zõ-ralle.

²⁴ M no-loeera sɛ-la m pãng zãnga, m faagame tɩ rɩɩb ka le kẽed m noorẽ ye.

²⁵ B sã n laad ned fãa, yaa mam bala, b sã n yãend-m fãa, b girda b zutu.

²⁶ Wa-y n sõng-y-ma, Soaala-Wẽnde! Y sẽn nong-ma bɩ y fãag-ma.

²⁷ Bɩ neba fãa bãng, Soaala, tɩ yãmb n maan woto m yĩnga.

²⁸ Bãmb kãabd beed me, yãmb dẽnd yaa noogo. B sã n baood zabr ne maam b na n lebga b bɛɛb laado, tɩ y yamba sũur lɛɛg n tosd kaam.

²⁹ Sã n ya sẽn dõt-b maama, bɩ paoor lebg b fu taoko, bɩ b yeelg yãnde n vuud-a wa kobre.

³⁰ M dat n pẽga Soaala ne m koɛɛg pãng tɛka. M dat n pẽg-b-la kʋʋnga sʋka.

³¹ Bãmb bʋʋdo n yiisd nin-koam yellẽ, bãmb n fãagd-a sẽn dat-b tɩ b kʋ-a wã nugẽ.