Yelbũna 9 - SEBR SÕNGO

Sãan deegre

¹ Yam vẽenem soab me-la a roogo, ra-nina a yopoe la a yals yã,

² a kʋ-la a rũmsi, n kõg a rãam, n maneg a rɩɩb roogo.

³ A tʋma a roog kamba tɩ b moon tẽnga fãa.

⁴ Sẽn ka tar-a yam tɩ seke, wa ka, yalem buud fãa, wa ka.

⁵ Wa-y n dɩ m dɩɩbã la y yũ m rãama m sẽn kõgã,

⁶ bas-y yalemdã tɩ y na vɩɩnde, kẽn-y tɩrga so-sõng pʋgẽ.

D maan gũusg ne sẽn laad-b b taaba

⁷ Fo sã n dat n sagl ned sẽn ka reegd yelle, yaa f sãbsg bala la f bao yã. Fo sã n wilg nin-wẽng a kongre, yaa a tʋʋr bal la f bao yã.

⁸ Fo sã n wilg sẽn ka reegd-a a kongre, a na n kisg-f lame. Sã n ya nin-sõng la f wilga a kongre, a na n nong-f lame.

⁹ Kõ nin-sõngo t'a na lebg sõng n paase, zãms nin-tɩrga n paas a bãngre.

¹⁰ Yam vẽenem yẽgre yaa Naaba-Wẽnd nif zoeese. Sẽn tara-a yam vẽenem, sẽn mi-a Wẽnde, la nin-sõgo.

¹¹ Maam a yam vẽenem, n na paas f raara sõore, la m na kõ-f yõ-woko.

¹² F sã n tar sõmblem yam, f na rɩ a yõodo, f yam sã n ya la f taab yam, f na rɩ bõne.

Yam wẽng sẽn ya a soaba

¹³ M ba yam kaoolgo yaa pirpiri, a pa tagsd yɩɩga la a ka vʋmd fɩ.

¹⁴ A zĩ-la a dignoorẽ, tãng zugu, a zao a goeele,

¹⁵ n kamsd so-loaadba, sẽn lood b sore:

¹⁶ «A Yam pa sek soab wa ka.» La a yeta yam sẽn paoog a soabã:

¹⁷ «Rãam sẽn ya wagdem rãam nooma, tɩ rɩɩb sẽn soosd n dɩtẽ me sakd velbo.»

¹⁸ A yĩmdame bala tɩ lik tara a na-tẽnga, tɩ rɩɩba fãa segl be n gũud b rɩ-rɩtba.