Yelbũna 8 - SEBR SÕNGO

Yam vẽenem boolgo

¹ Yam vẽenem ka kaasd n boondẽ sɩda? A pa zẽkda a koɛɛg sɩda?

² Tãms zutu, soy zutu, so-tiisẽ la a yɛsa,

³ a yɛsa tẽnga noore, a yɛsa sobadsẽ wã n boondẽ.

⁴ Adem biisi, yaa yãmb la m boonda, ninsaalba, yaa ne yãmb la m kaasda.

⁵ Yam-pa-sek rãmba, zãms-y yam sõngo, yam kaoolgo rãmba, bao-y sɩlem.

⁶ Kelg-y, m tara m sũur koɛɛga n na n togs yã; m noor na n yiisa gomde sẽn yaa tɩrga.

⁷ Yaa sɩd la m na n wilgi, wẽng pa tõe n yi m noorẽ ye,

⁸ m noora goama fãa yaa sɩda, zirẽ-beed la bõn-goaleng ka be sʋk ye:

⁹ b fãa yaa vẽenese ne ned ning fãa sẽn tar-a yam, ne ned ning fãa yam sẽn vɩ.

¹⁰ Bao-y mam zãmsgo, da bao-y ligd ye, bao-y bãngre n yɩɩd sãnem sẽn yɩlge.

¹¹ Yam sõngo são muizãanfo; bũmb ka be sẽn tog baoobo wala yam sõng ye.

Yam vẽenem pẽgre

¹² Maam, a yam vẽenem, maam n tar bãngre. Maam n wa ne bãngre sẽn yaa zulunga.

¹³ Wẽng kisgu n wilgdi tɩ f zoeta Wẽnd nifu. M kisa wilg-m-menga la tɩtaam, vɩɩm sẽn ka tũud tɩrga, zelem golongo.

¹⁴ Maam n so saglgo la neer wilgri, maam n so wʋmbo la m tar tõogo.

¹⁵ Maam n kõt dĩm dãmb b naam. B pãnga yita mam nengẽ, b tõoga yaa mam tõogo.

¹⁶ B sã n dɩt naam, yaa maam n kõ-ba, b sã n kaood bʋʋdo, yaa mam maasem yĩnga.

¹⁷ Mam nonga sẽn nong-b maam, sẽn baood-a maam ne raab sɩda yãet-m lame.

¹⁸ Mam nengẽ yaa faongo la ziiri, arzɛka la sõmblem.

¹⁹ M sẽn kõt bee yõodo n yɩɩd sãnem, sãnem sẽn yɩlge, n yɩɩd wanzurg sẽn yit boaagẽ.

²⁰ M sẽn be sor ning zugã yaa sõmblem sore. So-kãng zugu yaa zemsgo tʋʋm la b tʋmda, yaa vɩɩm sõng la b vɩ.

²¹ So-kãng zugu m pʋɩta sẽn nong-b maama m kũun sõma wã. M pidsda b rota ne arzɛka.

Yam pidungu

²² Naaba-Wẽnd n naan maam sɩngrẽ, mam la pipi soaba, b bõn-naandsa fãa sʋka.

²³ B naan-m lame tɩ bũmb nan ka be ye, b naan-m-la sɩngrẽ, dẽ tɩ tẽnga nan ka yals ye.

²⁴ B naan-m lame dẽ tɩ mogra nan ka tigs a kooma ye, tɩ ko-bulsa nan ka sɩng b kooma bulb ye,

²⁵ tɩ tãmsa nan ka tilg b nao zug ye, tɩ kunkuba nan ka vigl ye.

²⁶ B naan-m lame tɩ tẽnga ne a tẽn-peelma nan ka be ye, dẽ tɩ b sẽn dɩk bũmb ninga n yag dũni wã nan ka be ye.

²⁷ B sẽn wa n yɛdg sa-gãongã, tɩ m beeme, b sẽn wa n kargd mogra toaaga, tɩ m beeme.

²⁸ B sẽn waa n kɩt tɩ sawatã tigimd yĩngri, b sẽn wa n pood mogra ko-nina,

²⁹ b sẽn waa n yãkd mogra toaaga, n yeel a kooma t'a da fudg n yi wã, b sẽn wa n kɩʋʋlemd tẽnga gãongo,

³⁰ m da yɛsa b sɛɛgẽ wala tʋʋmda soaba, n noogd b sũuri beoog sẽn vẽege. M kɩdemda b taoore wakat buud fãa,

³¹ m da saad n pʋgemda zĩis fãa tɩ m daab yaa m vɩɩnd Adem kamba sʋka.

Yam vẽenem daabo

³² La marsã, m kamba kelg-y m goama: sũ-noog soaba la sẽn tũud-a mam sore;

³³ kelg-y m goama, n lebg sẽn mi-b meng võore. Da sãbs-y m saglga ye.

³⁴ Zu-noog soaba la sẽn wʋmd-a m goama, sẽn yɛs-a m dignoorẽ beoog sẽn vẽege n gũud-ma.

³⁵ Sẽn yãend-a maam paamda vɩɩm, a paamda Soaala-Wẽnd yel-sõmde.

³⁶ Sẽn beeg-a maam pogenda a menga, sẽn kis-b maam, nonga kũum.