Yelbũna 6 - SEBR SÕNGO

Da kãab tɩ f na yao samd ye

¹ M biiga, fo sã n yeel neda tɩ foom n na n yao a samde, fo sã n wẽen tɩ f na yao sãan samde,

² sã n ya fo meng n yaag f noor n pʋlme, sã n ya fo meng bẽdgo n lɛɛg n yõk fo,

³ ad-f sẽn na n maan bũmb ninga n põse: yella sẽn pak-fã, kẽng n tɩ yãend f tũud-n-taagã, yẽs ne-a, dɩdg ne-a.

⁴ Da bao vʋʋsgo, da bao gõeem, tɩ y wa zems taaba.

⁵ Modg n yi wĩirẽ wã, wala yãk sẽn fãagd bẽdgẽ, wala luiil sẽn fʋremd n yi nakalbteongẽ.

Zoe kʋɩɩm

⁶ Kʋɩɩm daolgo, yi n ges gũuri! Ges a sẽn maan bũmb ninga n bao yam n kõ f menga.

⁷ Gũuri ka tar ned sẽn wilgd-a tʋʋmda ye, ned ka pʋʋsd-a tʋʋmde, la a ka tar soansoa-ma ye.

⁸ La sɩpaolgo, a tigsda a sẽoog dɩɩbo. Tigsgu sã n ta, yẽ me tigsdame.

⁹ Kʋɩɩma, fo yẽ na n paa f gãagẽ n ta wakat bʋgo? Wakat bʋg la f na n neke?

¹⁰ F yetame tɩ f rat n gũsa bifu, tɩ f na n suusa bilfu, n kalemd f nusi, n gãe.

¹¹ Ad wakat kãng la naong na n soos n kẽ-fo, a na n soos n waa wa wagdre la fãada tɩ lebg pɛta.

Ned sẽn pid ne zãmbo

¹² Ka võor soaba la sẽn saad-a n yagd zirẽ. Dẽ ka sõma ye.

¹³ A kamsda ne a nini, n kamsd ne a nus la a nao.

¹⁴ A yamleoog sẽn beẽ, yaa wẽng bala. Tʋʋm yood la a baood n na n tʋme, zab la a rʋʋsda.

¹⁵ Yaa rẽ me yĩng la a yella na n sãame. A lʋɩta vugri bala tɩ tɩɩm kaẽ ye.

Soaala sẽn kis wa fãa-fãa

¹⁶ Bũmb a yoob n be tɩ Soaala-Wẽnd kisa, b ka tat b yam ba sẽn paood ye.

¹⁷ Yaa gesg sẽn ya wilg-m-meng gesgo, zelemd sẽn ya zelem goalenga: nus sẽn daagd ned sẽn ka tar a toorẽ yell zɩɩm,

¹⁸ sũur sẽn bilgd wẽnga, nao sẽn tʋʋl ne wẽng babsgo.

¹⁹ A yopoe soaba yaa kaset zirẽ soaba, pʋ-yagsa la tẽn-kãn-neda.

Ket n yaa ba wã saglse

²⁰ M biiga, deeg f ba noore, da zãgs f ma wilgri ye.

²¹ Loe a goama f sũurẽ tɩ b da zãag ba bilfu, loe-ba f loorẽ wa fan-teoogo,

²² tɩ b yãagd foom zĩis fãa, la b gũud foom, f gõeemẽ. B yɩ f sõsd-n-taaga, f sã n nek n sɛ.

²³ Soaala noor yaa wa fitila sẽn paalgd tõnd vɩɩma sor zugu.

²⁴ Noora n na n sõng-f tɩ f maan gũusgu ne pʋg yoogo, n gũ-f ne f to pag sẽn pid ne goam bʋgsa.

²⁵ Da bas f sũurã t'a tʋlg a neerma ye, da bas t'a nina kamsgo lub foom a bẽdgẽ ye.

²⁶ Pag sã n yooda n baood ligdi, la a ka tar sɩd ye, bur gɩrg sekd-a lame. Pag sẽn tar sɩda sã n dat n yõg zood ne foo, ad yaa f kũum la a rata.

²⁷ F sã n dat n mok bugum, ka ningd gɩfẽ ye; kɩɩs n ning tɩ fuug yõk bugum.

²⁸ Bug-saal ka tabd ne nao ye, kɩɩs n tabe tɩ nao feebe.

²⁹ Yaool n yaa boto la f maanda, f sã n baood f to paga, f kõn sɩɩs-a n looge tɩ yell ka pak-f ye.

³⁰ B pa ningd wagdre sẽn zuud n na pidsa a pʋg taal ye, yaa kom n tar-a.

³¹ Baasgo b sã n yõk-a, a na n yaoo naoor a yopoe, a na vaag a roog zãng n kɩse,

³² la sẽn baood-a a meng wãabo yaa yam kaoolgo soaba a ra-taaga.

³³ B na n pãb-a lame, b na n laa-a lame, a kõn yi yãnd pʋgẽ bada.

³⁴ Sũ-kiir bugum sã n wit rao pʋgẽ, bãng-y t'a sũur dokre daare, sugri kõn zĩnd ye.

³⁵ Nimbãan-zoeer ka ba bilfu, ba f rɩgl f kũuna a taoore, a kõn bars ye.