Yelbũna 4 - SEBR SÕNGO

Yam vẽenem yãkre

¹ M kamba, kelg-y y ba zãmsgo, ning-y pãnga n bãng sɩda.

² M sẽn togsda ya bõn-sõngo, da bas-y m sẽn wilg-y wã ye.

³ Mam me yɩɩ m ba biiga, mam me yɩɩ m ma bi-nongre, m ma bi-zelle.

⁴ Yaool n ya woto la b zãms ma, modg tɩ m goama pa f sũurẽ, modg n deeg m noya, n paam n vɩɩnde.

⁵ Bao yam sõngo, maan tẽegre, da yĩm m goama, da bas-b tɩ b looge.

⁶ Tall yam sõngo t'a fãag-fo, nong-a t'a gũ-fu.

⁷ Deeg tɩ yẽ la pipi kũuni, dɩk f sẽn tare n tek ne-a.

⁸ Sog-a dɩm-dɩm n paam n yɩ neda. Ad-f sã n mobg-a, a na n wa ne f zu-zẽkre.

⁹ A na fõgneg f zugu ne neerem pugla, a na n mobg f dĩir ne sãnem peende.

¹⁰ M biiga, deeg m goama tɩ f yʋʋm lebg kʋʋma.

¹¹ M kẽes-f-la yam sõng sor pʋga, m kẽes-f-la so-tɩrs pʋga.

¹² F sã n ka teem sore, f kẽnd na n yɩɩ faasga. F zoet me f kõn lak n lʋɩ ye.

¹³ Deeg noore, da bas-a ye, tũ-a, yaa yẽ n wat ne vɩɩm.

¹⁴ Da tũ nin-wẽns sor ye, da pɩʋʋg b sẽn kẽnd zĩig ning ye.

¹⁵ Bas-a, da tũ be ye, da ges be ye, gãndg-a.

¹⁶ Bãng tɩ nin-wẽns sã n ka maan wẽnga b gõeem pa sakd ye, b sã n pa kʋ b pa suusd ye.

¹⁷ B rɩɩb yaa sãmpog rɩɩbo, b rãama yaa pãn-tõog rãam.

¹⁸ Nin-sõma sore yaa wa sõore, wĩntooga zẽkdame t'a vẽenema paasdẽ.

¹⁹ Nin-wẽns sore yaa lika, b kẽnd n lagsdame la b pa ne b sẽn lakda ye.

²⁰ M biiga, kelg m koeesã neere, kelg m goama ne f tʋb fãa.

²¹ Tees f nengã b sẽn dat-f zĩig ninga; bĩng-ba f sũurẽ.

²² B kõta vɩɩm, b kõta yĩng laafi.

²³ Gũus f sũurã n yɩɩd sẽn keta fãa, vɩɩma ko-nin bunda sũurẽ.

²⁴ Da saag n yag zirẽ ye, da kãneg f to ye.

²⁵ F gesg yɩ pʋ-peelem la a ra yɩ zãmb gesg ye.

²⁶ Da kẽnd n tugd bogd ye, da bʋdg sore ye.

²⁷ Da leb goabg bɩ rɩtg ye, da sak n zoe n pʋg wẽng ye.