Yelbũna 30 - SEBR SÕNGO

A AGUR YELBŨNA Saglse

¹ Wã yaa a Yake biig a Agur goama: bãngd goama. A Agur goma ne a Itiyɛl, a Itiyɛl la a Ukal.

² N-ye, maan la dũni wã fãa yalma, n ka tar ninsaal yam ba bilfu.

³ Mam ka tʋlg yam vẽenem ye, Wẽnd bãngra la m tʋlg yã.

⁴ Ãnda n dʋ yĩngri n lɛɛg n sigi? Ãnda n kogl a nusin kok pemsem, ãnda n yondg a fuugu n yõng koom? Ãnda n kɩʋʋlem tẽngã, a taoor la a yaanga? A yʋʋr la bõe, a biig yʋʋr la a bõe, fo miime?

⁵ Wẽnd goama fãa kõt-b-la kaseto. Ned ninga fãa sẽn soonda Wẽnd maasmẽ paama a gãongo.

⁶ Da paas bũmb b goamẽ wã ye tɩ b na n zaba ne-fo, la b ges-fo wa zirẽ-be-neda.

⁷ Bũmb a yiib la m kot yãmba, Soaala, kõ-y-ma tɩ m nan ket n vɩ.

⁸ Zãag-y-m ne zirẽ-beedo la pʋ-lika. Da kõ-y-m arzɛka, da kõ-y-m naong ye. Bas-y-m tɩ m rɩ m pʋɩɩr n zemse;

⁹ m sã n dɩ tɩ looge m wat n yik n basa yãmba la m gomd woto: «Soaala la ãnda?» Ka rẽ bɩ m naonga kẽes-m wagdem tɩ m sãam m Wẽnda yʋʋre.

¹⁰ Da kãneg yamba ne a zu-soab ye, tɩ yãmba na n wa kãab-f lame tɩ tũ.

¹¹ Neb n be n kãabd b ba la b yãkd b ma zaka.

¹² Neb n be n yet tɩ b ka tar yell ye, tɩ b wẽnema yaool n nan ka pek ye.

¹³ Neb n be n sãbsd b taaba, b nina kʋɩɩme, nina ka kamsd ye.

¹⁴ Neb n be tɩ b yẽna ya zãngoeego, tɩ b noora ya sʋʋga, tɩ b tar n wãbd nin-koam dãmba la naong rãmba.

BŨMB A TÃ, BŨMB A NAAS YELBŨNA Saglse

¹⁵ Rendeoogo tara kom-pugli a yiibu: a wa ne, la a wa ne yɛsa. Bũmb a tãab n be n ka tɩgd ye, t'a naas soaba zɩ n yeele tɩ sekame ye:

¹⁶ Yaa bʋg-tẽnga, pʋg-kiiri, tẽng sẽn zĩ ne ware, bugum sẽn zɩ n yeele: m tɩgame.

¹⁷ Nif sẽn sãag ba, nif sẽn sãbsd ma-pʋg-yãanga, kʋɩlsa noorẽ gãabdo la yĩngr sɩlse n na feoog nif kãnga.

¹⁸ Bũmb a tãab n yɩɩd mam yam, la a naas soaba m ka tar a sor ye:

¹⁹ sɩlg sẽn tũud sor ning yĩngri, waaf sẽn tũud sor ninga pĩig zugu, koom-koglg sẽn tũud sor ninga mogr zugu n paas rogem buka.

²⁰ Pʋg-yoodre maanda woto: a rɩtame, n yẽes a noore n yetẽ: m ka maan wẽng ye.

²¹ Bũmb a tãab n yɛɛsd tẽnga, la a naas soaba la a ka tõe n tʋke:

²² yem-daoog sẽn lebg dĩma, yalem sẽn paamde n dɩt n tɩgda;

²³ bi-pugl neb fãa sẽn kis sẽn paam sɩda, roog-biiga sẽn deeg a roog ma zĩiga.

²⁴ Bũmb a naas n be tẽng zugu n paoodẽ n yaool n tar yam n yɩɩd yẽesem dãmba fãa:

²⁵ Yaa gũuri, a paooda, la sɩpaolgo a tigsda a rɩɩbo.

²⁶ Yaa marawa, nao paooda la b rot yaa pĩis bogdo.

²⁷ Sʋya: b ka tar naab ye, la b pa yɩgd yaar ye.

²⁸ Bõnpoaka, kamb sẽn digd n yõgda, la a yaool n gãee dĩm dãmb zakẽ.

²⁹ Bũmb a tãabo n sakd gesgo, la a naas soaba m mi kẽnde:

³⁰ yaa bõnyẽega, yẽ la sũur soaba rũmsã fãa sʋka, bũmb ka tõe t'a tar ye;

³¹ yaa no-raoogo, sẽn tabgd naam tabgre noosa sʋka: yaa pe-raoogo sẽn lʋɩt piisa taoore le paasa dĩma a sã n wa kõta a soolma rãmb a koɛɛga.

³² Fo yalemdã sã n da kɩtame tɩ f baood n na zẽk f menga, la marsã f tagsame tɩ yaa wẽnga, dik f nugu n pĩ f noore.

³³ Bĩisim sã fɩre n yooge, kella kaam; yõor sã n deeg wẽedo, a yũnda zɩɩm, sũur sẽn fõta bolgda zabre.