Yelbũna 3 - SEBR SÕNGO

Yam Vẽenem sẽn paamd to-to

¹ M biiga, da yĩm m zãmsga ye, bĩng m noya f sũurẽ.

² Woto f yõor na yɩ woko, n pid ne yʋʋma la sũ-noogo.

³ Da zãag f meng ne sũ-bʋgsem ye, da zãag f meng ne pʋ-peelem ye, bao wĩiri n tui-ba n bob f kokore, gʋls-ba f sũurẽ.

⁴ F sor na yɩ sõngo la f na paam f sẽn date Wẽnd la ninsaal nengẽ.

⁵ Dell Soaala-Wẽnd ne f sũur fãa, da teeg f meng bãngr ye.

⁶ F sẽn maan bũmb ning fãa bɩ f tags Wẽnd yelle tɩ f sor kunkub na sirgi.

⁷ Da kao tao tɩ f yaa ned sẽn mi vɩɩm ye. Zoe Wẽnd nifu n zãag f meng ne wẽnga.

⁸ Woto, f na n paam yĩn-maasem, woto f kõab kõn wãg ye.

⁹ Yãk f sẽn tare n waoog Soaala-Wẽnde. Yãk f kood rẽemse n kõ-ba.

¹⁰ Woto f bao na pid n sudg ne koodo la f sĩmsa na raal ne rã-paalga.

¹¹ M biiga, da sãbs Soaala-Wẽnd sɩbgr ye, da bas tɩ zabr puug f sũur ye.

¹² Yaa b sẽn nong a soaba la Wẽnd zabd ne, wala ba sẽn maand ne a bi-nongre.

Sẽn tar-a yam vẽenem tara sũ-noogo

¹³ Zu-noog soaba la sẽn pam-a yam sõngo, sẽn paam-a t'a yam weke.

¹⁴ Yam sõng yõodo yɩɩda ligdi, f sã n tar-a n são f sẽn tar sãnem.

¹⁵ A yõod yɩɩda muizãana, bũmb ka be f sẽn tõe n mak-a f bõn datsa sũk ye.

¹⁶ Dɩtgo a zãada yõ-woko, goabga, a zãada arzɛk la ziiri.

¹⁷ Soy niyns a sẽn tũudi yaa sũ-noog sẽn pid zãng soy, a soy fãa digda sũ-noog sẽn beẽ.

¹⁸ Sẽn paam-a n gãd, bee vɩɩm tɩɩg tẽngre, sẽn gãd-a zĩi ne sũ-noogo.

¹⁹ Wẽnd ne b bãngrã n maan tẽngã b yamẽ, bãmb n yals yĩngri teedã.

²⁰ Bãmb minima n tuk mogre, bãmb yama n le zĩnd tẽngre n kɩt tɩ sawat dʋʋgd meenem.

²¹ M biiga, tũ b sẽn wilg-fu, maan gũusgu, puk f nin neere.

²² Gũusgu la saglsã deegre n na n kõ f vɩɩm, n na n yɩ faoong bũmbu f sẽn bob n kẽnda.

²³ F pa kẽnd tɩ f sũur kiuusdẽ ye, f pa kẽnd n lagsdẽ ye.

²⁴ F sã zĩẽ, rabeem ka ye, f sã n gõe, f gõeem sakd-f lame.

²⁵ Bɛɛba yɩɩr pa tar-f ye, b kõn soos n tak zabre ne f ye.

²⁶ Wẽnd na n yɩ-la f sõangda, Soaala-Wẽnd kõn bas tɩ f lʋɩ bẽdgẽ ye.

²⁷ Ned sã n kos f sõngre, tɩ f tõe n sõng-a, bɩ f da zãgs ye.

²⁸ Da yeel f saam-biiga: kẽnge tɩ f na lɛɛg n wa wakat a to, beoogo, m na kõ-fo, n yaool n tõe n kõ-a dũnna ye.

²⁹ Da tʋlg ne wẽnga ned sẽn tẽed tɩ fo ket n dat-a-la ne neer ye.

³⁰ Ned sã n ka maan f wẽnga, bɩ f ra yaas n maan no-koeemd ne-a ye.

³¹ Da wẽneg sẽn ka mi-a sugri soab ye, da togs a manesem ye.

³² Wẽnd pa nong nin-wẽng ye, Wẽnd data nin-tɩrse n maan b zak kamba.

³³ Wẽnd kãab wẽnga n sirgd nin-wẽng roogo, Wẽnd kãab noodo n pid nin-sõng dẽnna.

³⁴ B laada sẽn nong-b taab laado, la b kũuna zamda sulg-m-meng rãmba.

³⁵ Sẽn tar-a yam sõngo, n paamd ziiri, la yalemsã n so yaoolgo.