Yelbũna 23 - SEBR SÕNGO

¹ F sã n zĩi n dɩt ne nin-kãsenga, maan gũusgu ne f sẽn zĩ a soab taoorã.

² F puk f yão-beedo, sʋʋg la f pẽneg f kokore.

³ Da tʋlg a rɩ-nooda ye, tɩ tõe n dɩɩme tɩ wa kãgemd-fo.

⁴ Da nams n bao arzɛk ye, da tags a yell meng ye.

⁵ Fo pa yãet n ges-a n kaoos, t'a loog ye, a mii pɩgs pusbu. A wat n yɩka wa sɩlga n loog yĩngri.

⁶ Da rɩ zoe-bõn soab rɩɩb ye, da tʋlg a rɩ-nood ye.

⁷ A na n maana wa ta-la a yam, n yet tɩ f rɩ la f yũ, tɩ yaool n pa yit a sũurẽ ye.

⁸ A sag-võr sẽn ta f noorẽ la f sẽn lɛɛg n wʋk-a, tɩ fo sẽn yiis gom nood niynsa na n lebg zalem.

⁹ Da gom tɩ yalem tʋbr dɩk ye, a na sãbs f goama yẽesem.

¹⁰ Da viig kʋdem-wẽnnẽ toaag kugri ye, da ko n kẽ kɩɩb vẽenemẽ ye.

¹¹ Sẽn na n deeg-a kɩɩbsa zĩigẽ n zaba tara pãnga. La yẽ soabã n na n bʋ ne foo n paalg-fo.

¹² Ning pãng n deeg saglgo, ning pãng n kelg mitba.

¹³ Da zoe yaams ne biig sɩbgre ye, sãbsg wẽedo ka kʋʋd biig ye.

¹⁴ Bao sãbsga n sɩbg-a, n fãag-a ne bʋg-tẽng rãmba.

Ba saglse

¹⁵ M biiga, f sã n tar yam soab sũuri, ad mam me sũura na n yɩɩ noogo.

¹⁶ Ad-m yĩnga fãa na n langame, f noorã sã n wa togsd sẽn ya sɩda.

¹⁷ Bas nin-wẽnsa togsgo n sulg f meng raar fãa Soaala taoore,

¹⁸ la noog f sũur tɩ f sẽn saagd bũmb ning beooga kõn vaal ye.

¹⁹ M biiga, kelge, lebg yam sõng soaba, tɩ f sora na yɩ tɩrga.

²⁰ Da yɩ rã-tɩgd ye, da yɩ vɛlg ye.

²¹ Dã-yũud la vɛlga kẽesda a meng naongo. Sẽn ka wɩsgd-a a meng ne tʋʋmde, yeelgda kʋdse.

²² Kelg sẽn dog-a fooma, da sãbs f ma sẽn lebg pʋg-yãang ye.

²³ Bao sɩda, yɩ ned sẽn dengd n tagse, ned sẽn sak noora tũudem.

²⁴ Nin-sõng ba zĩi n kɩdemdame, sẽn dog-a yam sõng soaba tara sũ-noogo.

²⁵ Wẽnd na kɩt tɩ f lebg f ba la f ma kɩdengo. Wẽnd na kɩt tɩ f ma lang ne sũ-noogo!

²⁶ M biiga kelg m neere, f sẽn yãend bũmb ning m nengẽ wã, modg n vɩɩnd boto.

²⁷ Loang sẽn zulum la pʋg-yoodre, bulg sẽn ya sẽka la sãama.

²⁸ A maanda wa fãada, n bao zĩig n soonde, la yaa rap wʋsgo la a tudgda.

Rã-tɩgda

²⁹ Ãnda rãmb n maand: kato! Ãnda rãmba n maand: m sã n da bãngẽ? Ãnda rãmba la zabre, ãnda rãmb n tar guglengu, ãnda rãmba la b pãbd n yɩlemnẽ, ãnda rãmba nini n ka ne b taoore?

³⁰ Yaa sẽn kaoosd-b rãam zĩigẽ, yaa sẽn yũud-b toose.

³¹ Da ges rãam n yeele: ges a nifã sẽn mooge, ges a sẽn kũmd yʋʋrẽ wã, ges a sẽn vend naana naana.

³² A wat n dũma wa waafo, n kɛ wa põeere.

³³ F nina na n sɩng n nee bõn-bãna, tɩ f noora na n yiis gãeeng goama.

³⁴ Fo wat n tẽeme tɩ f bee mogre kosʋka, n be koglg zugu, n dʋ n sog koglga ra-wokã n be be n lengdẽ.

³⁵ F wat n zaoo be n maandẽ: «Yaa waa m poglame, yaa waa b pãb-m lame tɩ m ka bãng ye. M na n yaa n neka wakat bʋgo? M yikyã, ad-m na n le kosame n yũ!»