Yelbũna 19 - SEBR SÕNGO

¹ Naong soab sẽn vɩ a pʋ-peelem vɩɩm, são arzɛk soaba sẽn zĩ ne zelem golemde.

² Tʋlg bũmb n yaool n ka reng n tagse ka bõn-yõod ye, woto f sã n maand yãgbo, f tudgame.

³ Yaa tõnd yalemdã n wat ne d meng bõne tɩ d lɛɛg n ningd Wẽnd taale.

⁴ Arzɛk soab sõta a zo-rãmb ka tɛka, naong soab pa tar zoa ye.

⁵ Kaset ziri ka paade n ka yãend a sɩbgr ye, la sẽn yagd-a zirẽ ka põsd ye.

⁶ Kõat tara neb ka tɛka sẽn belgd-a n dɩtẽ, ned kam fãa yõgda zoodo ne sãonsãood soaba.

⁷ Naong soaba, saam-biis kis-a lame, naong soab zo-rãmba zoet n bas-a lame; a yɛs n tara goama, mik b sẽegame.

⁸ Sẽn nong-a a menga modgdame t'a tagsg yɩ tɩrga. Sẽn ka basd-a t'a yam kẽ moogo, yẽ soab yell yaa neere.

⁹ Kaset zirẽ ka paad n ka reeg sɩbgr ye, sẽn togsd-a zirẽ-beedo wãada a menga.

¹⁰ Yalem ka tog n vɩɩnd wala naab ye, yamba me ka tog ne naam ye.

¹¹ Ned ninga yam sẽn sek-a yaa sũ-bʋgs soaba, a zu-zẽkre yaa a tõog n kõ beegr sugri.

¹² Dĩm sũ-puuri, bãng bõnyẽeg kɛlenga, dĩm yel-sõmde yaa meenem sẽn dʋʋgd mood zutu.

¹³ Biig sẽn ya gãeenga lebga sabaab a ba yĩnga, pag kɛlenga yɛsa wa toaka n ka yoogd tao-tao ye.

¹⁴ Yir ne arzɛka yaa f ba n bas n looge, pʋg-sõng ne yam sẽn pidi yaa Naaba-Wẽnd kũuni.

¹⁵ Kʋɩɩm tʋɩta a gõeem gãaga, sẽn ka nong-a tʋʋmde kiida kom.

¹⁶ Sẽn deegd-a noore wogenda a meng yõore, sẽn ka rat-a n tũ baooda a kũum.

¹⁷ Sẽn zoet-a nin-koam nimbãanega, pengda Wẽnde la Wẽnd yaa roanda.

¹⁸ Tẽeb sã n ketẽ bɩ f sɩbg f biiga, fo yee n da sɩbg-a tɩ tũ ne a yõor ye.

¹⁹ Sẽn puugd-a a sũur wʋsgo toga ne sɩbgre, f sã n bas-a, n ka sɩbg-a, f yet-a lame t'a paas beoogo.

²⁰ Deeg saglgo, tũ noore, tɩ f na paam yam sõngo.

²¹ Ninsaal sẽn dat a sũurẽ ka tɛk ye, la Wẽnd pʋlemd bala n ka vaande.

²² Neb sẽn dat ne ninsaala yaa sõmblem vɩɩm, woto naong soab la b nonga n yɩɩd zirẽ-be-neda.

²³ Naaba-Wẽnd nif zoeese wata ne vɩɩm, bãmb nengẽ f tarame n dɩtẽ, la yʋngo yell ka wat n pak-f ye.

²⁴ Kʋɩɩm daolg nug tʋmda laagẽ la a nug ka pãnga n na n ning sag-võra a noorẽ ye.

²⁵ Wẽ sẽn nong-a a tãab laado, tɩ tembenda na bãng yam. Wilg nin yẽesenga t'a tudgame t'a yam na puki.

²⁶ Biig sẽn wat ne yãnd la paoor, maanda a ba pãnga la a kɩtdame t'a ma kʋɩ tĩiga.

²⁷ M biiga, zãag f menga ne zãms wẽnse, n da wa zãag f meng ne bãngr sõng ye.

²⁸ Kaset faoog soaba laada bʋ-kaooda, nin-wẽns noor venda wẽnga wala koom.

²⁹ Yaa sẽn nong-b taab laad yĩnga, la b pees rasaare, la yam kaoolg soab poore n tog ne pãbre.