Yelbũna 17 - SEBR SÕNGO

¹ Rɩ-faasga ne laafi são zak sẽn pid ne nemd la zaba.

² Sõgen sẽn tar yam são bi-roak sẽn wegme, n ningd a ba yãnde; sõgen sõng lebgda zak biiga n dɩt zaka soab raboogo.

³ Wala wanzurf la sãnem sẽn yɩlg boaagẽ, woto me la Wẽnd vɛɛsd sũya.

⁴ Nin-wẽng kelgda zelem goaleng soaba, tɩ zirẽ-be-ned kelgd gom yood soaba.

⁵ Sẽn laad-a naong soaba laada a Naanda, ned ka laad nimbãan-neda n ka paam sɩbgr ye.

⁶ Nin-kẽem zu-zẽkre: a yagense, la kamba faongo: b ba.

⁷ Gom minim ka tog ne yam kaoolg ye, la sẽn ka tog n yɩɩda, yaa naab ne zirẽ-beedo.

⁸ Kũun yaa wa zu-noog tɩɩm, f sã n yãend bũmb n kõ, f sẽn dat fãa na yɩ.

⁹ Sẽn yĩmd-a yelle n mi zood korem; sẽn ka tõe-a a zelemde welgda zo-rãmb ne taaba.

¹⁰ Saglg manegda sẽn tar-a yam soab yelle n yɩɩd dasab koabga sẽn mamegd yalem yelle.

¹¹ Nin-wẽng sẽn dat yaa a zẽk a zug ne a zu-soaben-dãmba, la a bãnge tɩ na-yir nin-toaaga la b na n wa tʋm a nengẽ.

¹² Fo sẽn seg bõnyẽega b sẽn dɩgs a kamba, são fo sẽn na n seg zu-kaoolg soab gãeemda yikri.

¹³ Sẽn maand a soab neere t'a lebsd wẽnga, kõn zãag a yiri bada ne yel-beed ye.

¹⁴ F sã n sɩng zabre yaa ko-sor la f pak yã, bas zabra tɩ sɛ t'a nan ka yãng ye.

¹⁵ Paalg nin-sõng bʋʋdo, n yaool n bas nin-wẽnga, yaa bũmb a yiibu sẽn ka tat Wẽnd yam ba bilfu.

¹⁶ Ligd yõodo la bʋgo a sã n be yalem nugẽ, yaẽ la rɩk n da yam sõngo, la yɩta a wãna tɩ yalemd be sʋka.

¹⁷ Yamleoog tɛka, zood tɛka, la rogem ket n yɛsame, ba ya bãaga.

¹⁸ A yam-pa-sek nonga pãsg a gɛde, a nonga kãab a to t'a na sõng-a.

¹⁹ Sẽn nong-a zabre nonga wẽnga, mo-be-neda baooda a meng wãabo.

²⁰ Laafi ka be nin-wẽng sũurẽ ye; zelem goaleng ka põsd yell ye.

²¹ F rog yalma, f rog sũ-toogo; f rog gãeenga, f kõn le bãng sũ-noog ye.

²² Sũ-noogo la bãag tɩɩm, a tɩ-sõngo, sũ-beed waglemda kõaba.

²³ Sẽn nong-a ligd tɩ looge soosdẽ n deegda kũuni, tɩ bʋʋda na n lebg kɛdba.

²⁴ Sẽn tar-a yam soab neng pukame n dɩga ne yẽesem; a yam-pa-sekr nini wẽnda bi-pɛɛlg rẽnna: pɛɛla la ka ne ye.

²⁵ Bi-yalem yaa a ba sũ-toogo, a yaa a ma sũ-beedo.

²⁶ Ka tog tɩ b sɩbg nin-tɩrg ye, la na-biig pãbr yaa wẽng n yɩɩda.

²⁷ Sẽn tõe-a a noore, la yam soaba, sẽn tõe-a a menga tʋmda yam tʋʋmde.

²⁸ Yalem sẽn tõe a noore, lebgda yam soaba. A sã n ka yaagd a noore b yetame t'a yaa sɩlem soaba.