Yelbũna 15 - SEBR SÕNGO

¹ Leok noog gãnegda sũuri, leok wẽng puugda sũuri.

² Yam sõng rãmb zelemde kɩtame tɩ b nong bãngre, yam kaoolg rãmb noor wukda gãeemdo.

³ Naaba-Wẽnd nina nee zĩig zãnga, b nee nin-sõma la nin-wẽnse.

⁴ Zelemd sẽn mi sũur bʋkre kõta vɩɩm. Zelem toaag kɩtdame tɩ f bas raoodo.

⁵ Yam kaoolg soab sãbsda a ba wubri, la biig sẽn maand b sẽn wilg-a la yam soaba.

⁶ Nin-sõng yiri yaa arzɛka, nin-vẽng paoong yaa sãmb-sãmbe.

⁷ Nin-sõng gomdame n zãmsd bãngre, yalem nengẽ, yaa bũmb a to.

⁸ Wẽnd sẽn kis wa fãa-fãa yaa nin-wẽns maoongo, b sẽn nonge yaa nin-tɩrs wẽn-kosgo.

⁹ Wẽnd sẽn kis wa fãa-fãa yaa vɩɩm yoogo, b sẽn nonge yaa sẽn zoet-a n pʋgd sõmblem.

¹⁰ Sẽn zãag-a ne so-sõng sɩbgre kõn yɩ bilf ye, sẽn ka reegd-a saglgo na ki.

¹¹ Wẽnd nee sẽn be bʋg-tẽnga pʋga, la b nee ninsaal sũuri n yɩɩda.

¹² Zẽk-m-meng soab pa rat tɩ b rems-a ye, a ka tũud yam sõng rãmb ye.

¹³ Sũur sã n yaa noogo, neng yaa neere, sũur sã n sãame yam me sãamdame.

¹⁴ Yam soab baood n paasa a bãngre, yalem noor pida ne yalemdo, rẽ la a rɩɩbo.

¹⁵ Nimbãan-ned beoog wẽnda a zaame, beoog sẽn vẽege sũ-noog soab tara a kibsa.

¹⁶ Fo sã n zoet Soaala nifu tɩ f paoong ya bilfu dẽ pa são fo sẽn tar arzɛka n yaool n zĩ ne yɩɩre?

¹⁷ B sẽn na n kõ-f zẽ-zãgs ne nonglem são b sẽn na n kõ-f ne beem, naaf sẽn nob a nobr tɛka.

¹⁸ Sũ-pu-ned takda zabre, sũ-bʋgsem soaba sigsd-a lame.

¹⁹ Kʋɩɩm daolg sor pida ne gõose, tʋʋm noang sor yaa so-kõodre.

²⁰ Bi-sõng noogda a ba sũuri, bi-wẽng sãbsda a ma.

²¹ Yam kaoolg soab yalemda noom-a lame, yam sõng soab tũuda a sor tɩrga.

²² Yẽsg sã n ka pidi, f sẽn dat ka taasd ye. Sagendb lagem koabga tɩ b fãa pids zãnga.

²³ Ned sã n bãng leokre a sũur yaa noogo, leokre sẽn ya-a sõmbo sɩd wata ne sũ-noogo.

²⁴ Yam sõng soaba sor kuiisa yĩngri, woto a ka sigd tẽngre, bʋg-tẽngẽ ye.

²⁵ Naaba-Wẽnd tusda wilg-m-meng soab roog n lubi, bãmb n yaool n lebsd naong soab toaag kugri a zĩigẽ.

²⁶ Naaba-Wẽnd sẽn kis wa fãa-fãa: yaa nin-wẽnsa sẽn mii n zĩnd n geel b geelsã, Wẽnd nonga goam bʋgsa tɩ bãmb yaa sõmbo.

²⁷ Wagdr zak ka laafi zak ye. Sẽn ka sãamd-a bʋ-tɩrse ne kũuni na n vɩɩndame.

²⁸ Nin-sõng tagsdame n yaool n leoke, nin-wẽnsa yiisda goam sẽn ka võor ye.

²⁹ Wẽnnaam zãagda b menga ne wẽnem dãmba, n yaool n kelgd nin-sõma pʋʋsgo.

³⁰ Gesg sẽn noogd sũuri, yaa sẽn ka naag-a ne sũ-sãanga, kiba noog wata ne pãn-paale.

³¹ Fo tʋbr sã n modg n deeg saglse, ad-f ti-la f zaka yam sõma rãmb sʋka.

³² Sẽn bas-a so-sõng tũudem sãbsda a menga, sẽn deegd-a saglgo paamda yam.

³³ Naab a Wẽnd nif zoeese yaa yam sõng zãmsgo. Sulg-m-meng n dengd taoore tɩ ziir yaool n pʋge.