Yelbũna 1 - SEBR SÕNGO

Yelbũna sebr tʋɩɩsgo

¹ Israyɛl dĩma a Daviid biiga, a Salomo, yelbũna.

² Ad-y yelbũna na n zãmsa ninsaala t'a zã a meng ne yẽesem, n paam gʋʋl-sõngo la a wʋm b sẽn zulg n togsd bũmb ninga võore.

³ B wilgda ninsaal sẽn na n tũ sor ninga n yẽege, n zoe Wẽnd nifu, n lak ne so-goalma, n pid ne zemsgo.

⁴ B zãmsda neb niyns vɩɩma sẽn nan ka sĩdã tɩ b maan gũusgu la sõngda kom-bɩɩba tɩ b modg n bãng n bak bũmb ne a taaga.

⁵ Woto, sẽn zoe n tar-b bãngre, bɩ b karem-ba, n paas b bãngre, n sɩls b yama n paase. Sẽn zoe n pid-b ne yam na tõog n wilg b taab tɩ b rɩk so-sõngo.

⁶ B na n tõog n wegsa yelbũn kẽer pagdo, b na n sɩd paama karen-saamb dãmba yam zulungã n dɩke.

⁷ Bãngr zulunga yẽgende yaa zoe Soaala Wẽnd nifu. Sẽn tar-a yam vẽenem, gʋʋla gʋʋlg sõngo; gãeeng bala n ka baood yam vẽenem la a zãgsd a tũudem.

Tũud-n-taas wẽnse

⁸ Kelge, m biiga, kelg f ba saglse la da sãbs f ma wilgri ye.

⁹ Ad-b saglsã na n manega f vɩɩma wa pugl neere sẽn fõgneg f zugu, bɩ faong teedo sẽn luund f yãoogẽ.

¹⁰ M biiga, dar ninga kamb sẽn ka paam gʋʋlg sõngo wat n dat n kʋɩɩb-f lame, bɩ f da sak ye.

¹¹ B sã n yeel-fo: tũ tõndo, d bao zĩig n soonde n paam ned zɩɩm n yiis zaalem, d bao zĩig n soonde, n tʋm beedo ned sẽn ka tar a toorẽ yelle,

¹² d vel-a vɩɩga wala bʋg-tẽnga, d vel-a mumdi wala bo zulunga,

¹³ b sã n yeel-fo: wa tɩ d na paam arzɛka, wa tɩ d pids d roto ne fãab teedo, wa tɩ f na paam f zu-noog sẽn na n tʋʋg foom a soaba fãa,

¹⁴ wa tɩ ligda korgo na yɩ-la d fãa korgo,

¹⁵ m biiga, da sak n tũ-b ye. Zãag f nao ne b soya tũudem.

¹⁶ Ad-b nao zoet n dabda wẽng zĩigẽ, ad yaa zɩɩm la b yãgd n na n tɩ raage.

¹⁷ Ade, da nams zaalem, tɩ bẽdg ka rɩgend luiil nifẽ t'a le yõk-a ye.

¹⁸ B bãng tɩ b bẽdgã n na n wẽneg n daag b zɩɩm.

¹⁹ Na n yɩɩ woto ne ned ning fãa sẽn fãad a taaba: b wat n fãsga yẽ meng vɩɩm.

²⁰ Yɩnga yam vẽenem kẽndame la a boondẽ. A koɛɛgã n sãt soya zutu.

²¹ A yɛsa sobadsẽ n boondẽ, a yɛsa tẽns noore n sokdẽ:

²² Yalemse, yaa bõe tɩ yãmb nong yalemdo? Yam-pa-wisg rãmba, yaa bõe tɩ yãmb pa rat n yẽege? Sẽn nong-b taab laado y na n laa taaba n ta wakat bʋgo? Yalemse, y na n baoo bãngre da-bʋre.

²³ Deeg-y m saglgo n teem y zʋgo. M na n zuka sẽn be m sũura pʋga tɩ y wʋm m koeesa fãa.

²⁴ M bool-y lame tɩ y zãgse, m tuda m nug, la y pa yõk-a ye.

²⁵ M sagl-y lame tɩ y kɩɩse, y pa sak n deeg y kongre ye.

²⁶ Yaa rẽ yĩnga la mam me na n la yã, y rigba wakato. Y sã n wa yɛɛsdẽ, m na n pusga laado.

²⁷ Yɛɛsgã yaool n na n tiig-y-la wa saluka, tɩ y rigbã yik-y wa sɩlmande, tɩ y sɩbgre la y sũ-beedo wẽneg n ta.

²⁸ Wakat kãnga la y na n bool ma, la m kõn sak ye. B na n bao-m lame la b kõn yãend-m ye.

²⁹ B pa rat bãngr ye, b pa rat n zoe Soaala nif ye.

³⁰ B pa rat m saglgo ye, b toog ka be ne m leokre ye.

³¹ Ad-y b na n dɩ b tudgrã yõodo, b na tɩge ne b meng saglse.

³² Yaa b sẽn pa sakd n deeg yella n kʋʋd yam kaoolg soaba, yaa yalem sẽn gãd t'a miime wã n kẽesda moogo.

³³ Sẽn yaool n kelgd-a maam zĩi ne laafi. A zĩi ne laafi, a ka rigd bũmb ba a ye rabeem ye.