Yaoolem 32 - SEBR SÕNGO

A Moyiiz yɩɩlle

¹ Yĩngr dãmb yoog b tʋba tɩ m na n gomame, Tẽng zug rãmb kelg m sẽn na n togse

² M saglsa na n toka wa saaga, m goama na n dʋʋga wa meenem n madg wa sa-luk sẽn madgd pʋʋgo wa sa mina-mina sẽn bʋkd moogo.

³ M na n moona Soaala yʋʋre. Bãng-y tɩ bãmb n yɩɩd bũmb fãa.

⁴ Bãmb yaa Pĩiga, tɩ bɛɛb pɛɛm na n tĩni, b tʋʋma fãa tũuda sore. B noya ka yiis yaar ye. B sẽn kãab fãa na pidsi, la zãmb buud ka b nengẽ ye. B mii zemsgo, b bʋʋd kaooda tɩrse.

⁵ B sã n get yã, Israyɛl kamba, b neeme tɩ y sãama zãnga, y sẽn tar zʋg wẽng ningã y ka le wẽnd b kamb ye. Y sãamame n kẽ moogo.

⁶ Yaa bõe la y maan ne Soaala, zu-kaoolgo la yam ka yẽeg rãmba? Ka bãmb la y ba, n kõ-y vɩɩm laa? Bãmb n naan yãmba, bãmb n zĩndig-y tẽng zugu.

⁷ Tẽeg sẽn zĩnd pĩnda, tẽeg sẽn loog al yʋʋm ka tɛka, kos-y y ba, t'a le tẽeg yã, kos-y nin-kẽemsa tɩ b na togse:

⁸ Sẽn dɩt-a naam yĩngrã sẽn waa n pʋɩt tẽnga Adem biisi, b kõo buud fãa a toaaga. B sẽn waa n welg Adem biisa toor toore, b yãka gũud yĩngr n kõ buud fãa,

⁹ b waa n keesa a Israyɛl b meng yĩnga, n kees a Zakoob wala b meng pʋɩɩre.

¹⁰ Yaa zĩ-peen-daagẽ wã la b seg taaba, zĩig sẽn pid ne we-rũms bʋʋre tɩ b sɩng n na n koll-a, n na wek a yam, n na n gũ-a wa nin-paok sẽn gũud nin-beelle.

¹¹ Soaala wẽnega pa-nand-tugri sẽn yet a kamb tɩ b vẽ ne rabeem t'a meng yɛdga a pɩgsa zãnga n laand b zugu, n mii n wa põgend-ba a pɩgsẽ.

¹² Soaala b yembr bal n wilgd-b sore wẽn-naand ka paas bãmb ye.

¹³ Soaala zombga a nebã tãmsa zutu, tɩ pʋta na n kõ-b b rɩɩbo, tɩ b nus na n leo sɩɩdo, pĩisa bogdẽ, tɩ oliv tɩɩg zao pĩiga n womd a biis sẽn na n wa lebg kaam.

¹⁴ Soaala n dɩlg-b ne niis bĩs-kaam, n dɩlg-b ne piis bĩisim, n dɩlg-b ne pe-bi wã nem-bʋgsa ne Bazã pe-raado la ne boees kaam, n dɩlg-b ne alkam zom bãanega, n yũnug-b ne bugsuntung rãam sẽn kũmi.

¹⁵ Woto la a Yesurun, a tog ne kãsengo, paam n dɩ n nobe n yik n lebg tõata. - Fo sɩd nobame, n lebg bedre, n lebg taoko. A tog ne kãsengo basa a Wẽnd la a Naanda, a paooga a Teegda la a Fãagda.

¹⁶ B sẽn yãend sãamba wẽn-naandsã b mams-b la wa Soaala tũud-n-taase la b sãama Soaala sũur ne b manes yoodã.

¹⁷ B kʋʋ maand n kõ sẽn pa wẽnde, n kʋ maand n kõ sʋtãamba, n kõ wẽn-sãamse b sẽn pa mi, wẽnd dãmb sẽn yaool waoongo, tɩ b ba rãmb zɩ n dig rabeem b taoore.

¹⁸ F Pĩigã, f teegdã sẽn yiisa foo moogã, Israyɛl, fo pa tẽeg b yell ye; fo yĩma f Wẽnde, sẽn yiisa foo moogo.

¹⁹ Soaala sẽn yãend bũmb ninga yika b sũuri; f kom-dibli la f kom-pugli n yik n paoog-ba.

²⁰ Dẽ la Soaala yeel yã: «M na n solg-b-la m nenga n ges-b sẽn na n lebg bũmb ninga. Yaa zamaan yoog kamba, ya kamb sẽn ka tar pʋga.

²¹ B yãenda sẽn pa wẽnde n baas n mams-a ne m tũud-n-taase; b beeg-m-la ne b wẽn-naandsã. Mam me na mams-b ne buud sẽn ka buudu. M na kɩt tɩ b bɛ yɩ buud sẽn yik gãeemdo.

²² M sũura waa n wɩdga bugum, bugum sẽn dɩ-ba n tãag bʋg-tẽng noore. Bug-kãng n dɩ tẽnga ne a koodo, bug-kãng n dɩ tãmsã n ka kees ye.

²³ Ad-y yaa yel-beed la m na n wʋk n sam-ba; bãmb la m na n yãag m tãpã n teese.

²⁴ Koma sã n wa loog ne b pãnga zãnga, tɩ m sa-tãsa la m pɛɛma zẽnem pogl n baase, m na soos rũms toose tɩ b yĩ-ba, tɩ bõn-vuudi wã zẽnema sɛɛs-ba.

²⁵ Yɩnga yaa sʋʋga n na n loog ne b kamb zãnga, roogẽ na n yɩɩ yɛɛsgo; bi-ribl ka põsd tɩ bi-pugla, bi-pɛɛlg na n naaga nin-kẽem n looge.

²⁶ Maam n yeele, maam a Wẽnde: M datẽ lame n tõos-b wa fuugu, m datẽ lame n yẽes b yʋʋr moogo.

²⁷ La bũmb n be, m zoeta b bɛɛba paoore, m zoeta b na n wa tudg n yeele: ‹Tõnd n tʋm daoodo, Soaala ka maan fɩ.›

²⁸ Bɛɛba geelsa fãa na n paa vɩɩdo, tɩ bãmb me pa tags ye.

²⁹ B sã n da tagsẽ, b na bãngẽ vẽenega; b na maanẽ gũusg ne sẽn wat beoogo.

³⁰ Nin-yend yɩta a wãn n wa rigd neb tusri tɩ neb a yiib bal na n sẽeg tus piiga, sã n ka b Teegdã n lɛɛg n koos-b ne b bɛɛba, sã n ka Soaala meng n dɩk-b n sagl b nusẽ?

³¹ B yaool n ka na n yɩ bɛɛba Sõangda wa b sẽn ya tõnd Sõangda ye. La b mens mi rẽnna. La rẽ yɩɩ vẽenega b fãa nifẽ.

³² A Israyɛl bɛɛba miime tɩ b ka são Sodom dãmba, la b ka são Gomor dãmb ye, fãa yaa bugsuntund sẽn ka tar noosem, b bugsuntunga biis sẽn ya zẽnem, b sib-gĩna yaa tɩsense.

³³ B rãama yaa zẽnem, põeer zẽnem, rãama yaa wag-bãnd dẽnna.

³⁴ Ad maam b Wẽnnaam soos n segenda bũmb b yĩnga,

³⁵ M na n zab n doka sũuri, ned kam fãa na n paama a rolbo. B naoor sẽn na n lak raare, (la b zu-bʋka raar zoe n pẽnegame,) b lʋɩɩsa raar kõn le kaoos n wa ye.»

³⁶ Soaala na n yalsa b buuda poore, b na n yãba b kambã tɩ b lebga wa neb sẽn koms n dɩga n ka le tar teegda, n ka le tar sõangda.

³⁷ Wakat kãng la b na n sok-ba: «Y wẽn-naandsa bɛɛ, y pĩigã, y soondga zĩig bɛɛ?

³⁸ Sẽn da yʋbd-b y maanda kaama bɛɛ? Sẽn da yũud-b y rãama bɛɛ? Bãmb kõn yik n n wa sõng yã, bãmb kõn yãend zĩig n kõ-y tɩ b soonde.

³⁹ Ges-y la y reege, ad-y yaa maam bal n tõe n fãage. Wẽnd a to ka paas ye, yaa maam la maam m ye tãa, wẽnd sãang ka wa naag ye, maam n kʋʋd la m vʋʋgdẽ, sẽn kaooge, maam n lebd n tonge, b kõn fãsg bũmb m nugẽ ye.

⁴⁰ M zẽka m nug n tees saaga la ad-m sẽn yete: maam la Wẽnd rũnna la beoogo!

⁴¹ M sã n saas m sʋʋga t'a yãgda, m sã n moon m bʋʋda raare, m na rok m sũur ne m bɛɛba; sẽn kis b maama na reeg b sɩbgre.

⁴² M na n yũnuga m pɛɛma, n yũnug-b ne zɩɩm tɩ b gãeeme, m na n tɩgsa m sʋʋga ne nemdo. Bɛɛba tãb-biig ba a ye kõn põs ye, sẽn yõg b rãmba wa sẽn pogl b rãmba.»

⁴³ Adem biisi, pẽg-y Wẽnd buudã Wẽnd sɩbga sẽn daag b kamba zɩɩm, Wẽnd doka b sũur ne b bɛɛba; B buuda na n paama sugri b buuda na n zĩnda b tẽngẽ ne bãane.

⁴⁴ A Nun biig a Osea yãaga a Moyiiz t'a wa wilg zãma wã yɩɩn kãnga goama fãa.

⁴⁵ A Moyiiz sẽn togs a Israyɛl goam kãensa n sɛ,

⁴⁶ a yeel-b lame: «Deeg-y ne y sũuri m goama fãa. M goma woto n yiis taal m zugu. Zãms-y y kamba tɩ b modg n tũ noora gilli.

⁴⁷ Goama ka goam sẽn ka tar yõod y yĩng ye. Yaa y vɩɩm goama, bãmb bal n tõe tɩ y yõor yɩ wok tẽng ning y sẽn na n dʋʋg Zʋrdẽ n soogã.»

A Moyiiz kũum wilgri

⁴⁸ Baraar bala Soaala yeela a Moyiiz:

⁴⁹ «Dʋ Abarim tãmsa sẽn tong n dabdã, dʋ Nebo tãnga sẽn be Moab, Zeriko yegende la ges Kanaã tẽng m sẽn kõt a Israyɛl t'a sooge.

⁵⁰ Tãnga zug la f na n maan kaalem, be la f na n sak f ba rãmba, wala f kẽema Aarõ sẽn maan kaalem Or tãnga, n tɩ sak a ba rãmba.

⁵¹ Y ka kõ-m kaset ning m sẽn da rat tɩ y kõ-ma, Israyɛl kamba sʋk ye. Kadɛs Meriba kʋɩlsẽ, Sin we-raoogẽ, y ka puk m sõmblema zãng Israyɛl kamba sʋk ye.

⁵² F na n yãenda tẽng ning m sẽn na n kõ a Israyɛl sẽn yɛdg f taoore la f kõn kẽ a pʋgẽ ye.»