Yaoolem 30 - SEBR SÕNGO

A Israyɛl na n lɛɛg n kẽe Soaalã

¹ Yɛl kãensa fãa m sẽn gom n wilg-y wã, kãab nooda la kãab beedã, fãa na n pidsame. La y Soaala, y Wẽnnaama, sã n wa sẽeg-y tẽn-zẽngẽ y yama na neke.

² Y na lɛɛg n wa Wẽnnaam, y Soaala, nengẽ la y na kelg b koɛɛga, yãmb ne y kamba, y na n kelg-b ne y sũur fãa, ne y yalẽ fãa, y na n tũ m sẽn wilg rũnna wã fãa.

³ Wẽnnaam, y Soaala, na n teema b manesem, b na n wilga b nonglem, b sẽn sẽeg-y tẽns niynsa fãa, b na n kams-y lame n le tigim zĩ-yɛnga.

⁴ Ba sã n da ya tẽnga sɛtme la b ra tall yãmb n looge, Soaala na le tɩ tall-y n wa naag y taaba.

⁵ Wẽnnaam, y Soaala, na n tall-y lame n kẽes y ba-rãmb tẽngẽ tɩ y soog-a. B na kɩt tɩ y sũ-noog la y sõor yɩɩg y ba rãmb rẽnna.

⁶ Israyɛl, Soaala-Wẽnd na n kõo-foo ne f kamba sũ-paale tɩ f tõog n nong Wẽnnaam, f Soaala, ne f pãng fãa, ne f yalẽ fãa n paam yõ-woko.

⁷ Wẽnnaam na n pidsa b kãab beeda fãa ne bɛɛb niyns fãa sẽn na n yik n pʋg-b foo ne beema.

⁸ Fo yẽ na n maneg n le kelga Soaala koɛɛga la f na n tũu noy niyns fãa m sẽn kõt-f rũnna wã.

⁹ Wẽnnaam, f Soaala, na n kɩtame tɩ f yãend sũ-noog f tʋʋma fãa pʋgẽ. F rogem na n fɩɩgame, f rũms na n weka balbo, f pʋt na n zõonda ne koodo, tɩ f sũ-noogã n lebg bãmb rẽnna, wa f yaab rãmba wakatẽ.

¹⁰ La rẽ na n tõogame tɩ f na n kelga Wẽnnaam, f Soaala, koɛɛg la f reeg b noya, la f tũ b raabã sẽn gʋls noora sebrẽ, la f lɛɛg n wa pʋg-b ne f sũur fãa la f yalẽ wã fãa.

Noora bãngr ka toog ye

¹¹ N-ye! M sẽn kõt foo noor ninga ka toog wʋsg ne foo ye, a ka loog f yaadma tɛk ye.

¹² A ka be yĩngri tɩ f na n yeele: ‹Ãnda n na n dʋ yĩngr tõnd yĩnga n sik-a n kõ-do, n sõng tɩ d wʋm-a n tõog n tũ?›

¹³ Ka rʋʋgd mogr n tɩ seg-a, tɩ f na n wa yeele: ‹Ãnda n na n dʋʋg mogra tõnd yĩnga n gẽes-a n yãend la a wilg-d tɩ d tũ?›

¹⁴ N-ye! Koɛɛga pẽe ne foo, a bee f noorẽ, a be f sũurẽ, tɩ f tõe n tũ.

Sor yãkre

¹⁵ Ade, dũnna m yalsda f taoore, vɩɩm la sũ-noogo, kũum la yel-beedo.

¹⁶ Maam n kõt-f noor dũnna, tɩ f nong f Wẽnnaam, f Soaala, tɩ f tũ b sore, n gɩdg f meng ne sẽn kisi la f reeg b noya la b rog-n-miki tɩ woto la d na vɩɩnd, n lebg zembala, tɩ Wẽnnaam, f Soaala, ning f barka tẽng ning f sẽn dabd n na n tɩ kẽ n soogã.

¹⁷ La f sũura sã n lak n bas maam, f sã n pa kelgde, f sã n bas tɩ b ta foo n dig wẽn-naands rotẽ tɩ f tɩ wõgemd b taoore n waoog-ba,

¹⁸ m wilgd-f-la rũnda bala, tɩ f na menem zãnga; f rasma na sõd koees-koeese, tẽng ninga pʋgẽ f sẽn dabd n na n tɩ soog Zʋrdẽ rʋʋndã.

¹⁹ M kaset dãmb a yiib taoore, saaga la tẽnga, la m kot-y tɩ y yãke, Israyɛl kamba: vɩɩm bɩ kũum, kãab noog bɩ kãab beedo. Yãk-y vɩɩm, yãmb ne y kamb yĩnga,

²⁰ n nong Wẽnnaam, y Soaala, n kelgd b koɛɛg, n pʋgd-ba. Yaa woto la y na n vɩɩnd n kaoos tẽng ning Wẽnnaam, y Soaala, sẽn kãab tɩ b na n dɩk-a lame n kõ y yaab rãmba, a Abraam, a Izaak la a Zakoob.»