Yaoolem 3 - SEBR SÕNGO

Og rĩm lʋɩɩse

¹ D wẽnemdame n tees Bazã tãmse, tɩ Bazã dĩm a Og yi n seg-d Edreyi, n na zab ne-do, yẽnda ne a tãb-biisa gilli.

² Soaala-Wẽnd yeel-m lame: ‹Da maan dabeem ne-a ye, tɩ m dɩk-a lame n sagl f nusẽ, yẽ ne a tãb-biisã la a tẽngã. Maan ne yẽnd me wala f sẽn maan ne Amoritsa dĩm a Siyõ, sẽn da kẽed Esbõ.›

³ La Naaba-Wẽnd le rɩka a Og, Bazã dĩma ne a neba la a tẽn-peelma, n sagl d nusẽ, la d tõog-b-la zãnga n pa tol n kees bũmb ye.

⁴ Tõnd deega b tẽnsã n pa londg tẽng ba a ye. Tẽnsa taa pisoobe, yaa sẽn be-b Argob, Bazã tẽn-peelmẽ, a Og soolmẽ.

⁵ B tẽnsa gill mee n gũbga lals sẽn ya wogd-wogdo, tɩ b kʋɩlensa ya yalemse la b pagd neere, tɩ tẽn-bõones karg n gũbg-ba.

⁶ Tõnd pʋlmame tɩ d kõn kees bũmb b pʋsẽ, wala d sẽn maan ne Esbõ dĩm, a Siyõ, tẽnse. Rapa, pagba la kamba, fãa kiime.

⁷ D sooga b laoga la b rũmsã zãnga.

Galaad pʋɩɩbo

⁸ Woto wã yaa Amoritsa dĩm dãmb a yiib soolmẽ la d da kẽ yã. Yaa Arno kʋɩl-bɛɛga la Ermo tãnga sʋka, Zʋrdẽ foolle.

⁹ (Sidõ rãmba da boonda Ermo tãnga tɩ Siriõ, tɩ Amoritsa boond-a tɩ Senir.)

¹⁰ D pãb n deega tẽnsa sẽn da zao tãn-bi wã, Galaad tõre, Bazã tõre n ta Salka la Edreyi, Bazã dĩm a Og soolem.

¹¹ Bazã dĩm, a Og, yaool n da yaa Refayitsa sẽn keesa nin-yende. Kug la b pees wa koglg a mumb yĩnga, Raba, Amonitsa na-tẽnga. Koglga woglma yaa kãntɩɩs a wɛ, a yalma yaa kãntɩɩs a naase, kãntɩɩs wa d fãa rẽnna.

¹² Dɩlla Tẽns niyns d sẽn wẽ n deege wakat kãnga yɩɩ tẽn-peelma fãa sẽn yɛdg Arowɛr nug goabg, Arno kʋɩl-bɛɛga foolle. M kõ-la a Rubẽ la a Gad yagense Galaad tãmsa pʋɩ-sʋka ne b tẽnsã.

¹³ Galaad bogr a to wã la Bazã tõre, a Og tẽn-kʋda, m dɩk-b lame n kõ a Manase bogrã. Tẽnsa sẽn yɛdg Argob n ta Bazã ra boondame tɩ Refayitsa tẽn-peelem.

¹⁴ A Manase biig a Yayir n soog Argob tẽnsã n ta Gesuritsa la Maakaritsa tẽnse. A menga yʋʋr la a rɩk n kõ Bazã tẽns kãense la rũnda menga b ket n boond-b lame t'a Yayir pʋ-weese.

¹⁵ M dɩka Galaad n kõ a Makir, a Manase biiga.

¹⁶ A Rubẽ la a Gad yagensa reega tẽns niyns sẽn be Galaad ne Arno sʋka. Toaag yẽne la Arno kʋɩl-bɛɛga, nug rɩtgo. Yabok n ya toaag ne Amonitsã.

¹⁷ Nin-taoor toaaga rɩka Zʋrdẽ foolle, Zenezarɛt mogre n ta Yamsem mogre, n tat Pisga tãng sẽn zao yaanga.

¹⁸ Wakat kãnga m taasa sẽn paam-b tẽnsa Zʋrdẽ yegendã no-kãnga: ‹Yaa yãmb rũnda la y beoog Wẽndã n dɩk Zʋrdẽ yegend tẽnsã n kõ yã. Woto wã y tãb-biisa fãa na n boba zabre n dʋʋg Zʋrdẽ, n lʋɩ y saam-biisa taoore.

¹⁹ Y pagba la y kamba la y rũmsã sẽn labsã, bãmb bala n na n pa m sẽn kõ-y tẽns niynsa pʋgẽ.

²⁰ Y mens na n paa ne y saam-biisa n tãag bãmb me sẽn wat n kẽ b soolmẽ, n kẽ tẽns niyns Wẽnnaam y Soaala sẽn na n kõ bãmb me Zʋrdẽ rʋʋnde. Dẽ poor la y na n lɛɛg n wa m sẽn kõ-y tẽns niynsã pʋgẽ.›

²¹ Wakat kãng me la m yeel a Zozuwe: ‹Fo yãenda ne f meng nifu bũmb ning fãa Soaala-Wẽnd sẽn maan ne dĩm dãmb a yiibã. Bãng tɩ Soaala-Wẽnd na n kell n maana boto ne dĩm niyns fãa b sẽn na n seg Zʋrdẽ rʋʋnde.

²² Da zoe-y rabeem ye: yaa Naaba-Wẽnd meng n zabd n sõngd-y.›

A Moyiiz pa na n kẽ kãabga tẽng ye

²³ Dẽ me la maam a Moyiiz yõk Wẽnd sɛɛga. M goma woto:

²⁴ ‹Soaala-Wẽnnaam, yãmb sɩng n pukda y sõgna nifẽ, y ziir la y pãnga. D yãeta wẽnd a to yɛ, tẽng bɩ saag zugu, sẽn tar y pãnga la a tõe n tʋm y sẽn tʋma?

²⁵ M kotame n dʋʋg kʋɩlgã, tɩ m nif teeg tẽng ning sẽn be Zʋrdẽ rʋʋnde, n yãend Libã tãnga!›

²⁶ Bãng-y tɩ yãmb yĩnga, Wẽnd sũur yika ne maam wʋsgo, tɩ b pa kelg-m ye. B waa n leokame bala: ‹Sekame, da le gom dẽ yell ye!

²⁷ Dʋ Pisga tãnga zugu, wẽnemd n ges nin-taoore la goabga, n ges rɩtg la yaanga, ges ne f nin pãnga: ad-f kõn dʋʋg Zʋrdẽ kʋɩlga sẽn dɩg tɩ f neẽ wã ye!

²⁸ Wilg a Zozuwe f sẽn dat t'a maane, pids-a ne raood la pãnga tɩ yẽnda n na n lʋɩ neba taoor n dʋʋg Zʋrdẽ la yẽ n na n sõng-b tɩ b soog tẽngã f sẽn ne wã.›

²⁹ Dẽ tɛka, tõnd paa tãnga sɛɛga tɩ Bɛt-Peor yɛs d taoore.