Yaoolem 28 - SEBR SÕNGO

Kãab noodo

¹ Fo sã n sɩd kelg Wẽnnaam, f Soaala, koɛɛga, n tũud noya m sẽn kõt foo rũnna wã, ad Wẽnnaam, f Soaala, na n kɩtame tɩ f yɩɩg buud a taaba fãa.

² La ad bark ning sẽn na n sig f zugu, f sẽn kelg Wẽnnaam, f Soaala, koɛɛga yĩnga:

³ Wẽnd bark na sig neb nins sẽn be b tẽngẽ bɩ b pʋt rotẽ!

⁴ Wẽnd na kõ-y kamba wʋsgo, n kõ-y kood zembala, Wẽnd bark na sig y pʋtẽ, y bãgrẽ, tɩ y niis la y piis ne y bʋʋs rogdẽ.

⁵ Wẽnd bark na pids y pet ne tɩɩs biisi, n pids y bur koglg ne buri,

⁶ Wẽnd ning f yiib la f kõom barka.

⁷ F bɛɛba sã n yik n teeg ne foo, bɩ Wẽnd yõg-b n sagl f nusẽ. B tũu so yɛng n na n wa tak zabr ne foo, la yaa soy a yopoe la b na n tũ n menem f taoore.

⁸ Wẽnd na n paalga b barka ne foo, ne f baoa la f tʋʋmd ning fãa f sẽn na n tʋme. Barka na pa ne foo, tẽng ning Wẽnnaam, f Soaala, sẽn kõt-fo.

⁹ Soaala na n kɩtame tɩ f lebg buud sẽn welg toor b yĩnga, wala b meng sẽn kãabe, la rẽ yaa f sã n deeg noya Wẽnnaam, f Soaala, sẽn kõt-fo, la f sã n tũ b soy wã.

¹⁰ Tẽnsa fãa na bãng tɩ Wẽnd barka sig-f lame la b na rig rabeem f taoore.

¹¹ Bãng tɩ f na n paama sũ-noogo, f na n paama rogem wʋsgo, tẽng ninga pʋgẽ, Soaala-Wẽnd sẽn kãab f ba-rãmb tɩ b na kõ-fã. F rũms na n weka balbo, f pʋt na n pelga ne koodo.

¹² Wẽnd na n yooga f yĩnga, b saasa ko-nina tɩ saaga rʋʋg f tẽngẽ wakat sẽn ta, tɩ f tʋʋm fãa zĩnd yõodo. F na paam tɩ sek f wa yãk n peng tẽns a taab sõor sẽn pa paood ye, la f kõn bõs tɩ b peng-f bũmb ye.

¹³ Soaala-Wẽnd na n lʋɩs-f-la taoore, f kõn pa poorẽ ye. B na n zẽka f yʋʋre, f kõn yãend paoor ye. La rẽ yaa f sã n kelg Wẽnnaam, f Soaala, noya m sẽn yet tɩ f reeg rũnna la f tũ wã.

¹⁴ La rẽ yaa f sã n tũ soy niyns m sẽn wilgd-f rũnna n ka kɩll goabga, n ka kɩll rɩtgo la f ka yãend wẽn-faado n zoe n pʋg-b ye.

Belgr ka ye

¹⁵ Fo sã n pa kelg Wẽnnaam, f Soaala, koɛɛga, n tũ b noya la f zãag f meng ne b sẽn gɩdge tɩ m wilgd-f rũnna, ad kãab beed niyns sẽn na n lʋɩ f zugu:

¹⁶ Wẽnd na sãam f zak la f pʋto!

¹⁷ Wẽnd na wõr f peoogo la bur koglgo!

¹⁸ Wẽnd na gɩdg f buud yalgre la f pʋta wombo! Wẽnd na sãam f niis la f piisi!

¹⁹ Wẽnd na sãam f yiib la f lebgre!

²⁰ F sẽn na n sɩng tʋʋmd ning fãa Wẽnd na n yãag-f-la ne bʋko, ne yɛɛsgo tɩ far wa baas-fo, tɩ f wẽneg n menem. La rẽ yaa f sẽn tʋm wẽnga, n lak n bas maama yĩnga.

²¹ Soaala na kɩt tɩ f bẽ bãaga, bãag sẽn na n yiis-f tẽng ning f sẽn dabd n na n tɩ kẽ n soogã.

²² Ad bãas niyns Soaala sẽn na n lobg-fo tɩ b wa sɛɛs-f zãngã: kɩbga, zu-zabre, pʋ-zabre, zãnkãda la solenkẽense. Sã n yaa f pʋtã na n yɩɩ wãoong la gãnem.

²³ Yĩngri, saaga gãnema a neng wa wãre, tɩ tẽnga kʋɩɩs a meng wa kutu.

²⁴ Sa-kooma zĩigẽ, yaa tompɛglem la wubsgu n na n dʋʋge. B na n tara rʋʋgre, tɩ fo wa menem zãnga.

²⁵ Soaala na dɩk-f lame n sagl f bɛɛba nusẽ. So-yɛng la f neba na n yi n tɩ seg bɛɛbã, soy a yopoe n na n yɩ b zoees soy. Tẽns a taaba rãmb sã n yãend-fo b sũur na n yaalame.

²⁶ Yĩngr luiili la we-rũms na n dɩ-la f yĩnga nemsã la b kõn yãend ned sẽn na n dig-b ye.

²⁷ Ezipt yũya la a nod-tãodsã la y na n bẽ, n paas gɛnda la zagengo sẽn ka tõe n tɩp ye.

²⁸ Soaala na n lob-f-la gãeemdo, zondo la zʋbsgo.

²⁹ Wĩnto-sʋka f na n kẽnd n babendame wala yʋn-sʋk zoanga, f kõn yãend f sor ye. Neb n na n belg foom n sɛ f paoong zãnga la f kõn tol n yãend sõangd ye.

³⁰ Fo sẽn bao bi-pugl ning n na n maan f pagã, ned a to n dengd foom a roogẽ. F sẽn me roog ning n na n kẽ wã, f kõn kẽe ye. F sẽn na n sel bugsuntung ningã, f kõn tõs b pipi biisa meng ye.

³¹ B na n kʋ-la f naaf f nifẽ la f kõn wãb a nemd ye. B na n looga ne f bõanga la f kõn le yãend-a ye. B na n wʋka f piisã n kõ bɛɛba la ned kõn waa n sõng-f ye.

³² Tẽns a taab rãmb n na n loog ne f kom-dibli la f kom-pugli, tɩ f nin wa raag ne b gẽegre, beoog sẽn vẽege, la f kõn le yãend-b ye.

³³ F pʋta yõodo, f tʋʋma fãa yõodo, yaa neb n na n dɩ-a, neb fo sẽn ka mi n na n dɩ-a. Fo lebga ned b sẽn zɛɛde la sẽn zĩ ne sũ-toog bala.

³⁴ F na yika gãeemdo: f sẽn tar sẽn dɩg f taoora gesgo la f sẽn tare.

³⁵ Wẽnd na n kɩtame tɩ yũy sẽn zabd pus y rũma la y gɛ, yũy sẽn ka tõe n sãoog ye. B na n pusa y nao-sɩlpama n tãag y zug tẽnsʋka.

³⁶ Yaa tẽn-zãoorgẽ, Israyɛl, tẽns foo ne f ba-rãmb sẽn zɩ n bãnge, la Soaala na tʋm foo ne dĩm ning f sẽn na n bao n kõ f mengã. F na tɩ waoog wẽn-naandse: raad la kug-peesem!

³⁷ Wẽnnaam, f Soaala, sẽn na n tall-f n taas zĩig ning fãa, b na wẽ siri f poorẽ, f na lebg f bɛɛb baobgo la b laado.

³⁸ F na n bʋda pʋt zembala la f kõn yãend kood ye tɩ sʋʋr na n looga ne zãnga.

³⁹ F na n sela bugsuntundu n maneg-b tɩ ya sõmbo la f kõn tol n yũ b rãam, f kõn tol n yãend b biis meng n tõse, tɩ zũnzũur n na n dɩ zãnga.

⁴⁰ Oliviye tɩɩs na n pida f tẽngã la f kõn paam kaam meng n zɛ f yĩng ye, tɩ b na n sʋʋga kãse.

⁴¹ F na n doga kom-dibli la kom-pugli la b kõn pa ne foo ye, tɩ b na n tall-b lame n kẽng yembdo.

⁴² F tɩɩsa la tẽnga sẽn wom fãa na n yɩɩ sʋ-warõng soolem.

⁴³ Sãana sẽn naag foo n kẽed tẽn-yɛngã na n lʋɩ-la f taoore, tɩ fo tar poorẽ lebre.

⁴⁴ Yẽ n na n yãe n peng foo, fo kõn tõog n peng-a bũmb ye. Yẽ zĩi taoore tɩ fo paad poorẽ zĩiga.

⁴⁵ Kãab beed kãensa fãa na n lʋɩ-la f zugu, b na n pʋg-f lame tɩ f wa menem zãnga. La rẽ yaa f sẽn pa kelg Wẽnnaam, f Soaala, koɛɛga n gɩdg f meng ne b sẽn kisi la f reeg b noya b sẽn wilgi.

⁴⁶ Dẽ n na yɩɩ wa saglgo, yãmb ne y kamba yĩnga, beoog sẽn wate.

⁴⁷ Fo sẽn ka pʋg Wẽnnaam, f Soaala, ne sũ-noog la kɩdengo, f sẽn waa n tar f sẽn date,

⁴⁸ f na yɩ sõgne, Wẽnd sẽn na n tʋm-f bɛɛb niynsa sõgne, la f na tɩg kom, ko-yũud, naong la far buud fãa. Wala nag koodre, f yubl na reeg toogo n tãag f loogre.

⁴⁹ Wẽnd na n yiisa buud t'a wa zab ne fo. Yaa buud sẽn yi tẽn-zãoorgẽ, dũni wã sɛtmẽ, n tar pa-nand-tugr tʋʋlem la a pãnga, buud f sẽn pa wʋmd a goam ye,

⁵⁰ buud sẽn ya toaaga, n ka mi nin-kẽem waoogre, n ka zoet bi-bilf nimbãaneg ye.

⁵¹ A na n dɩ-la f rũmsã, f koodã al tɩ f wa menem zãnga. A kõn kees bũmb f zɛɛgẽ ye, f rã-paalg rʋgdẽ ye, la f kaama sĩmbiẽ ye. A kõn kees nag-bil la pe-bil ye, n wa tãag f loogr zãnga.

⁵² A na n yẽd-f lame n pag-f f tẽngẽ, al tɩ lalsa wa rʋʋg zãnga, lals niyns sẽn gũbg f tẽngã n ya wogd-wogd, tɩ f sũur kegmẽ wã. Wẽnnaam, f Soaala, sẽn kõ-f tẽng ning tɩ f soogã la bɛɛba na n gũbg zãnga.

⁵³ F bɛɛba sẽn wat n gũbg tẽngã n kẽes-f nimbãaneg ninga pʋgẽ, f na n wãba f sẽn doge, f kom-dibli la f kom-pugli, Wẽnnaam, f Soaala, sẽn kõ fooma.

⁵⁴ Rao fãa sẽn vɩ f tẽn-peelmẽ, n yet t'a yãee gʋʋlgo sẽn pid gʋʋlgo, n yet t'a sɩlsa a ning-taaba wa pĩim al tɩ rat n kẽke, rao kãng na n mooga a nif ne a ba-biisi, ne a paga a sẽn nonge, ne a kamba sẽn keese,

⁵⁵ a na n mooga a nif ne ba t'a pa rat n yãk n kõ, ba bilf menga, a kamba nemdã a sẽn na n wãb n pa kees bũmbã, bɛɛba sẽn gũbg tẽngã n kẽes-a nimbãaneg sẽn pid nimbãanega yĩnga.

⁵⁶ Pag fãa sẽn vɩ f tẽn-peelmẽ n yet t'a yãee gʋʋlgo sẽn gʋʋl n taase, n yet t'a mii ning-taaba sẽn dat bũmb ninga, pag sẽn ka saagd n bas a naoor tɩ sɩɩs tẽnga, a sẽn yet t'a yãee wubr sẽn pid wubri, t'a sɩlsa a ning-taaba wa pĩim al tɩ rat n kẽke, pʋg kãng na n mooga a nif ne a sɩda a sẽn nonge, ne a bi-ribl la a bi-pugla,

⁵⁷ a na n mooga a nif ne a biig a sẽn doge, ne a kamb a sẽn yiis dũniya, tɩ bɛɛba sẽn gũbg tẽngã n kẽes-a nimbãaneg sẽn pid nimbãanegã, rɩɩb buud pa kees ye, t'a na n soos n wãb a kamba.

⁵⁸ F sã n ka modg n tũ noorã wala a sẽn gʋls sebr kãnga pʋga, la f zoe Wẽnnaam, f Soaala, n zoe b yʋʋra sẽn yɛɛsd la sẽn kẽesd dabeem,

⁵⁹ Soaala meng n na n sɩbg-fo, foo ne f buudu. B na n sɩbg-f-la ne sãmpoaga sẽn ka tẽng zug sãmpoag ye, sãmpoag sẽn kẽ pãafo, bãas sẽn zabd n ka maagdẽ ye.

⁶⁰ B sẽn na n le wa buk f poor bãas niynsã, yaa Ezipt bã-wendã.

⁶¹ Bãas niynsi, sãmpoag niyns sẽn pa sõdg noor sebr kãnga pʋga, Soaala na n fẽeg-b-la yãmb gilli tɩ y wa menem moogo.

⁶² La yãmb sõora sẽn da ta yĩngr ãdsã, y na n keesa fĩyãayõo bala. La rẽ yaa y sẽn pa kelg Wẽnnaam, y Soaala, koɛɛga.

⁶³ La wala Soaala sẽn da nong n koll yã n dat tɩ y yɩ zembala la y pid ne sũ-noogo, b nongame marsã n sõng tɩ y menem, tɩ y sɛ zãnga, tɩ b võ-y wa tɩɩse tẽng ning y sẽn na n tɩ kẽ n soogã.

⁶⁴ Soaala na n sẽeg-y-la tẽns a taaba pʋgẽ, dũni wã yaang n ta a taoore. Yaa wẽn-naands la y na n waooge: wẽn-naands foo ne f ba-rãmb sẽn ka mi, Israyɛl, bũmb sẽn pees ne raad la kuga.

⁶⁵ B tẽnsa pʋga f kõn paam vʋʋsem ye, f kõn paam vẽenem sẽn sek f nao-pʋg tabgr ye. Soaala na n kõ-f-la sũur sẽn kiuusdi, nin sẽn suusdi, vɩɩm sẽn maage.

⁶⁶ F vɩɩ wa f kiime, n digd rabeem wĩndig la yʋngo, n sãmbd f na ki, f na vɩɩnde.

⁶⁷ Yibeoogo f na n yeela f menga: ‹M nongẽ lame tɩ zĩiga zoe n sobgẽ!› La f tata zaabr n maanẽ: ‹M nongẽ lame tɩ zĩiga zoe n yẽegẽ!› F sẽn ne bũmb ning n tar gesgã n na n kiuus f sũurã.

⁶⁸ Soaala na n kẽes-f-la kogend pʋgẽ tɩ f leb Ezipt tẽnga la m da yeel-f lame: ‹F kõn le yãend tẽn-kãng bada?› Beelẽ fo meng f toore n na n koos f meng wa yem-daago la yem-poaka la f kõn paam daad ye!»

⁶⁹ Yɩɩ woto la a Moyiiz yals a Israyɛl zĩigẽ tɩ zooda ne Wẽnda yõge, wala Soaala sẽn da rata. Zooda yõga Moab tẽn-peelmẽ la a yaa toor ne Oreb tãnga zug soabã. Gom bãmba la a Moyiiz yiis yã, a sẽn waa n deeg Wẽnd noor n yõg zood ne Israyɛl kamba, Moab tẽnga. Zood kãng yõg n paasa Oreb tãnga zug soabã.