Yaoolem 27 - SEBR SÕNGO

ISRAYƐL YÕGDA ZOOD NE WẼNDE Zooda sakre

¹ A Moyiiz ne Israyɛl nin-kẽemsa kõo neba noor kãnga: «Reeg-y noy niyns fãa m sẽn wilgd-y rũnna wã.

² Y sẽn na n dʋʋg Zʋrdẽ kʋɩlga raare, n dʋʋg-a n tees tẽng ning Wẽnnaam, y Soaala, sẽn kõt yãmbã, y na wʋk kug bɛda n sel, n fẽ goore.

³ Gʋls-y b zutu, y sẽn dʋʋg Zʋrdẽ kʋɩlga raare, noy niyns fãa m sẽn taas yãmbã. Woto y na tõog n kẽ tẽng ning Wẽnnaam, y Soaala, sẽn kõt yãmba, yaa tẽng sẽn bund bĩisim la sɩɩdo wala y ba rãmba Wẽnda sẽn kãab yãmba.

⁴ Y sã n wa rʋʋg Zʋrdẽ kʋɩlga, y na n sela kugã wala m sẽn wilg-y rũnna wã, Ebal tãng zugu. Fẽ-y kuga goore.

⁵ Me-y maan-kugr Wẽnnaam, y Soaala, yĩnga. Maan-kugra na n mee ne kug sẽn ka pees ne kut ye.

⁶ Yaa kug sẽn ka pees la y na n dɩk n me Wẽnnaam, y Soaala, maan-kugrã. Yaa maan-kugr kãng zug la y na n kʋ yũ-nooda maando, Wẽnnaam, y Soaala, yĩnga.

⁷ F na kʋʋ laafi kosg maando. F na rɩ ne sũ-noog Wẽnnaam, y Soaala, taoore.

⁸ Gʋls-y noy kãensa goama kuga zutu. Rɩgl-y-b tɩ b karenga yɩ naana.»

⁹ A Moyiiz ne Levitsa sẽn ya maan-kʋʋdba le yeela a Israyɛl: «Sĩnd n kelge, Israyɛl, dũnna, Wẽnnaam, f Soaala, welg-f-la toore b meng yĩnga.

¹⁰ Bɩ f kelg Wẽnnaam, f Soaala, koɛɛga, n tũ b noya la f lak f meng ne b sẽn gɩdge, wala f sẽn le tẽeg rũnna wã.»

¹¹ Baraare, a Moyiiz yeela neba woto:

¹² «Ad neb niyns sẽn na n yaas Garizim tãnga zug n kãab neba kãab-noodo, b sã wa rʋʋg Zʋrdẽ: a Simeõ, a Levi, a Zɩɩda, a Isakar, a Zozɛf la a Bẽnzame.

¹³ Ad neb niyns sẽn na n yaas Ebal tãnga zug n kãab kãab-beedã: a Rubẽ, a Gad, a Asɛr, a Zabulõ, a Dã la a Neftali.

Kãab beed piig la a yi

¹⁴ Levitsa na n tãsa woto Israyɛl kambã:

¹⁵ ‹Wẽnd na sãam ned ning fãa sẽn na n pees wẽn-naand bɩ nin-naande n na n soos n waoog-a. Ninsaal nug tʋʋmde Wẽnnaam sẽn kis wa fãa fãa la rẽnda.› La neba fãa na n leokame: ‹Ami!›

¹⁶ ‹Wẽnd na sãam sẽn sãbsd a ba la a ma!› La neba fãa leokdame: ‹Ami!›

¹⁷ ‹Wẽnd na sãam ned ning fãa sẽn teemd a yak toaaga!› Tɩ neba fãa leoke: ‹Ami!›

¹⁸ ‹Wẽnd na sãam ned ning fãa sẽn kẽesda zoang moogo!› Tɩ neba fãa leoke: ‹Ami!›

¹⁹ ‹Wẽnd na sãam ned ninga fãa sẽn wẽgd sãana, kɩɩba la pʋg-kõore!› Tɩ neba fãa na n leoke: ‹Ami!›

²⁰ ‹Wẽnd na sãam ned ning fãa sẽn kẽ ne a ba paga t'a kẽeda a ba soolmẽ!› Tɩ neba fãa leoke: ‹Ami!›

²¹ ‹Wẽnd na sãam ned ning fãa sẽn wɩɩbda ne rũnga!› Tɩ neba fãa leoke: ‹Ami!›

²² ‹Wẽnd na sãam ned ning fãa sẽn kẽeda ne a tão, a ba biiga bɩ a ma biiga!› Tɩ neba fãa leoke: ‹Ami!›

²³ ‹Wẽnd na sãam ned ninga sẽn kẽeda ne a pag ma!› Tɩ neba fãa leoke: ‹Ami!›

²⁴ ‹Wẽnd na sãam ned ninga sẽn soosd n pãbd a taaba!› Tɩ neba fãa leoke: ‹Ami!›

²⁵ ‹Wẽnd na sãam ned ning sẽn na n deega ligdi n tɩ wẽ n kʋ ned sẽn ka maan wẽnga!› Tɩ neba fãa leoke: ‹Ami!›

²⁶ ‹Wẽnd na sãam ned ning sẽn na n kɩɩsa noy kãensa goama, sẽn na n tõdg b tũubu!› Tɩ neba fãa leoke: ‹Ami!›