Yaoolem 24 - SEBR SÕNGO

Pʋg-yiisdga

¹ Rao sã n kẽ kãadem ne paga n wa yik n yeel t'a manesma ningd-a-la yãnde, t'a ka le get-a ne yamleoog ye, n tol n gʋls sebre n kõ-a t'a looge,

² la paga loogame, n tɩ lebg ned a to paga.

³ Nin-kãng me sã n yik n yet t'a pa le nong-a, n gʋls welgr sebr n kɩs-a t'a looge, bɩ nin-kãng maana kaalem,

⁴ a pipi sɩda bãng t'a ka tõe n le reeg-a n maan a pag ye, t'a tʋka yell a zugu. Yaa bũmb Wẽnd sẽn kis wa fãa fãa. Gũus n da kẽes wẽng tẽng ning Wẽnnaam, f Soaala, sẽn kõt-fa ye.

Yikãad paalga

⁵ Rao sã n kẽ kãadem paalem, a ka bobd zabr ye. B ka wat n kos-a tʋʋmd ye. A basda fãa n be a zakẽ, yʋʋmd tõre, n noog a pag sũuri.

Noya kẽere

⁶ F sã n ka tar ligd n na yao samde, samda soab ka tõe n deeg wa bobelle, f zom wɛrdga la f neer ye. Ka rẽ yaa f vɩɩma meng la a fãsg n looge.

⁷ Ned sã n yõk a saam-biig Israyɛl kamba sʋka n tall n looge, n tɩ nams-a bɩ n tɩ koos-a, nin-kãng toga ne kũum. Yiis wẽng a woto buud f sʋka.

⁸ Maan-y gũusgu, Israyɛl kamba, ne bãas niyns sẽn wẽnd yĩng bãaga. Reeg-y la y tũ maan-kʋʋdba, a Levi kamba, sẽn na n wilg yã. Deeg-y noy niyns fãa m sẽn kõ-bã.

⁹ Tẽeg-y Wẽnnaam, y Soaala, sẽn maan ne a Miriyam, y sora zug, Ezipt yiib wakato.

¹⁰ Fo sã n peng f to bũmbu, da kẽ a zakẽ n dɩk a bũmb ye.

¹¹ Yaa yɩng la f yaasda, tɩ fo sẽn peng a soaba tall bũmbã n wa kõ-fo.

¹² Fo sẽn peng a soaba sã n ya nimbãan-neda, da kẽ gãag ne a bũmb a sẽn bobl-f ye.

¹³ Wĩndig sã n wa kẽedẽ, wa lebs-a a bũmbu. A na gãand ne a fuugu la a na kãab-f noogo, la Wẽnnaam, f Soaala, taoore fo me sõmblem na puki.

¹⁴ Naong soaba, ka neng soab, sã n tʋmd n deegd ligdi, a yaa f saam-biig bɩ sãan sẽn naag foo n kẽed tẽng a ye, da yao-a nimbãan-yaood ye.

¹⁵ Daar fãa ne a yaoodo, wĩndig ra kẽ tɩ f pa yao-a ye. A yaa naong soaba la yaa rẽ la a teeg yã. Da bas t'a kelem-f Wẽnd ye. A kelem yã, a ning-f-la taale.

Ned kam fãa zĩ-la a tʋʋmd maasmẽ

¹⁶ B pa kʋʋd ba rãmb b kamb yĩng ye, b pa kʋʋd kamba b ba rãmb yĩng ye. B sã n kʋ neda, b kʋ-a-la a meng beegr yĩnga.

Naong rãmb zãabo

¹⁷ Da wẽg sãan bɩ kɩɩb bil ye. Da reeg pʋg-kõor fuug ye.

¹⁸ F na tẽeg tɩ fo me yɩɩ yamb Ezipt tẽnga la yaa Wẽnnaam, f Soaala, n fãag-fo. Rẽ me yĩng la m yet tɩ f reeg la f tũ noorã.

¹⁹ F sã tigsd f koodo, tɩ ka-zut kẽer dʋʋg n pa f pʋʋgẽ da lɛɛg n wʋgs-b ye. Bãmb la sãana, kɩɩba la pʋg-kõor pʋɩɩre, la Soaala-Wẽnd na n tũ rẽ n ning f tʋʋma fãa barka.

²⁰ F sã n pãb n sʋʋg f oliv, da le lɛɛg n wa yiis sẽn pa tɩɩga zug ye. Sẽn pa wã yaa sãana, kɩɩba la pʋg-kõor dẽnna.

²¹ F sã n tõs f bugsuntungu, ra lɛɛg n wa yiis biisa ye. Sẽn pa wã yaa sãana, kɩɩba la pʋg-kõor dẽnna.

²² F na tẽeg tɩ f me yɩɩ sãan Ezipt tẽnga. Dẽ me la m yet tɩ y reeg noor kãngã.