Yaoolem 22 - SEBR SÕNGO

Bũmb sẽn meneme

¹ F sã n yãend f to naaf bɩ a pesg sẽn meneme, da maan wa f ka yãend-a ye, legl-a n kɩs a soaba.

² Rũnga soab sã n zãr, bɩ f sã n ka mi-a, kẽes rũngã f zakẽ t'a pa be n tãag a soaba sẽn wat n bolg-a. F na lebs-a a rũnga.

³ Maan boto ne a bõanga, ne a fuugu, ne a sẽn menes bũmb ning fãa, tɩ f yãende. Da maan wa f ka yãend ye.

⁴ F sã n yãend f to naaf bɩ a bõang sẽn pãs n lʋɩ sorẽ, da maan wa f ka yãend ye; tɩ sõng-a t'a yik-a.

Vɩɩm tẽnga pʋgẽ

⁵ Bɩ pag ra yeelg rao fuug ye, rao me ra yeelg pag fuug ye. Ned ning fãa sẽn maan woto maanda Wẽnnaam, f Soaala, sẽn kisi.

⁶ F sã n kẽnd f sore n tees n yãend tɩɩg zug bɩ tẽnga, luiil tʋko, tɩ luiin-bi be a pʋgẽ, bɩ yaa luiil n wũg a gɛlẽ, bɩ a põgna a kamba, da saag n dɩk luiili wã ne b ma ye.

⁷ Fo basdame tɩ luiila loog tɩ f wʋk a kambã. Dẽ na n waa ne f sũ-noogo la f yõ-woko.

⁸ F sã n me ro-paalga, f na ning bɛonga zuga kogre: woto ned kõn yi yĩngr n lʋɩ n daag a zɩɩm n tʋk taal f zug ye.

⁹ Da kẽ f bugsuntung pʋgẽ n le bʋd bũmb a to ye, tɩ naag n dɩ f sẽn bʋde la f sẽn sel zĩ yɛng yaa kisgu.

¹⁰ F sã n kooda, da naag n sog wãg yɛnga naaf la bõang ye.

¹¹ Da yeelg fuug sẽn wʋg ne rũng kõbdo la beren-dɩgr gĩs ye.

¹² F sẽn tar fu-goabg ning n pinnẽ wã, da saag n ning zʋmba a noorẽ ye.

Rõadg b sẽn dõd paga

¹³ Rao sã n kẽ kãadem ne paga n wa yik n yet t'a pa le nong-a ye,

¹⁴ n wa yik n zabd ne-a t'a ka tar a meng neere, la a sãamd a yʋʋr n yetẽ: ‹Maam n dɩk pʋg kãnga n maan m paga la d sẽn waa n na n bãng taabã, m tẽed t'a ra zoe n sãamame.›

¹⁵ Paga ba ne a ma wata tẽnga noore, la b kõta nin-kẽemsã kaseto, bʋʋda zĩigẽ, tɩ b biiga ra ka sãam ye.

¹⁶ Paga ba yeta nin-kẽemsa: ‹Yaa m biiga, m dɩk-a lame n kõ nin-kãnga t'a maan a paga la a pa le nong-a ye.

¹⁷ Dẽ marsã la a yik n sãbsd a vɩɩma n tãag n wilg-ma t'a mikame tɩ m biiga ra zoe n sãamame. La ad-m kaseto tɩ m biiga ra pa sãam pĩnd ye.› La b yɛdgda biiga kãadma fuugu tẽnga nin-kẽemsa nifẽ.

¹⁸ Dẽ wã nin-kẽemsa na n yõka paga sɩda n sɩbg-a.

¹⁹ B na n kɩtame t'a yao paga ba wanzurf wakɩ koeems koabga, t'a sãama Israyɛl bi-pugl yʋʋre. Paga na n yɩ-la a paga la a kõn tõog n dig-a n yiis abada.

²⁰ La sã n sɩd mik tɩ yaa vẽenega tɩ paga ra sãamame,

²¹ b talld-a lame n taas a ba zak noore. Tẽnga rãmb labd-a-la ne kuga n kʋ, t'a sẽn maan yoob a ba zakẽ, a maana bũmb sẽn kis Israyɛl tẽn-peelmẽ. Yiis wɩɩbd a woto buud f sʋka!

²² B sã n ling yoaad ne pag sẽn tar sɩda, b kʋʋda b yiiba fãa, paga ne raoã. Yiis wɩɩbd a woto buud Israyɛl sʋka.

²³ B sã n zoe n kãaba pa-kul sɩda tɩ ned a to seg-a tẽnga pʋg n sãam-a,

²⁴ y talld-b la b yiib fãa n yiis tẽnga noore la y labd-b lame n kʋ. Y kʋʋda bi-puglã tɩ yella maama tẽnga sʋka la a pa kelem ye. Y kʋʋda raoã t'a kẽe ne a to paga. Yiis wẽng f sʋka.

²⁵ Sã n yaa pʋtẽ la raoã seg pa-kul b sẽn pʋlem sɩda, n sãam-a, raoã bal la b kʋʋda.

²⁶ Da maan pa-kula bũmb, t'a ka maan yel-wẽnd sẽn sek a kʋʋb ye. A ka bãng tiir ye. Yaa wa nin-kʋʋd sẽn yẽeg a soab n kʋ wã sẽn ka bãng tiirã.

²⁷ Sẽn ya pʋtẽ wã la b seg taabã, tõe t'a sã n kelem me bɩ ned ka wa ye.

²⁸ Rao sã n seg pa-kul sẽn nan ka rɩk n kõ sɩda t'a yõg-a tɩ b ling-ba,

²⁹ raoã kɩta pa-kula ba wanzurf wakɩ koeems pis-nu. A sẽn sãam-a wã, a na n lebga a paga la a ka tõe, abada, n wa rig-a n yiis ye.