Yaoolem 20 - SEBR SÕNGO

Zabr noya

¹ Y sã n yi n na n tak zabr ne y bɛɛba, Israyɛl kamba, y sã n yãend wiidi, bɩ bilim-bilm, bɩ tãb-biis sõor sẽn tagme, da saag-y n maan dabeem ye tɩ Wẽnnaam, y Soaala, bee ne yãmba, la yaa bãmb n yiis yãmb Ezipt tẽnga.

² Y sẽn wat n na n sɩng zabrã, maan-kʋʋda wata taoore n gom ne nebã.

³ Ad-a sẽn yet-ba: ‹Kelg-y yã, Israyɛl tãb-biisi, y yika rũnna n na n zab ne y bɛɛba. Da bas-y y raooda tɩ boog ye, da zoe-y rabeem ye, y pɛleng ra yɩk ye, la da rig-y b taoor ye.

⁴ Yaa Wẽnnaam, y Soaala, n be y sʋka. Bãmb n wa y sõngre n na n zab y bɛɛba n kõ yã.›

⁵ Taoor dãmba na n yeela neba woto: ‹Ned sã n be yãmb sʋka n me ro-paalle la a nan ka kẽ a roogã, a leb a zakẽ n da wa pa zabrẽ tɩ ned a to yõdg n kẽ a zĩigẽ ye.

⁶ Ned sã n be yãmb sʋka n sel a bugsuntungu n yaool n nan ka rɩ a pipi biisi, a leb a zakẽ n da wa pa zabrẽ tɩ ned a to yaool n wa tõsd bi-kãens ye.

⁷ Ned sã n pʋlem bi-pugla t'a na yi kãadem ne-a, a leb a tẽngẽ n da wa pa zabrẽ tɩ ned a to wa kẽ kãadem ne bi-kãng ye.›

⁸ Taoor dãmba wat n le sokame: ‹Ned sã n be yãmb sʋkã, t'a sũur kiuusdẽ, t'a raood boogdẽ, a leb a zakẽ la a ra wa boog a taab raood wa a meng ye.›

⁹ Taoor dãmba sã n gom n sɛ, b lʋɩsda tãnsoaben-dãmba taoore.

¹⁰ F sã n ta tẽnga n na n tak zabr ne-a, f na reng n gom ne-a laafi goama, n yeel-a t'a sak n pak a kʋɩlense.

¹¹ Tẽnga rãmb sã n leoke: ‹D sakame, d basa zabre,› b sã n pak foom b tẽnga kʋɩlense, neba fãa sẽn be tẽnga pʋg na n lebga f zak-tʋʋm-tʋmdba la f sõgen-kamba.

¹² Tẽnga sã n zãgs laafi goama kelegre, n kaoog zabre, fo gũbgd-a lame.

¹³ Wẽnnaam, f Soaala, rɩkd-a lame n sagl f nugẽ la f sʋʋg koota rapa fãa.

¹⁴ F na n sooga pagbã, kom-bõonegã, rũmsã la laog fãa sẽn pa tẽnga pʋga. F na n dɩlga f meng ne b laogã tɩ yaa Wẽnnaam, f Soaala, n kõ-fo.

¹⁵ Yaa woto la f na n maan ne tẽns niyns fãa toaag sẽn zãr ne fo tẽnsã, ne tẽns niyns fãa sẽn ya toore, ne b sẽn na n sõdg b rãmb marsã wã.

¹⁶ Tẽns niyns Wẽnnaam f Soaala sẽn deegd n na n kõ fooma da kees bõn-vɩɩs b pʋgẽ ye.

¹⁷ F na ges wa kisgu Ititga, Amoritga, Kanaã rãmba, Perizitga, Ivitga la Zebuzitga, wala Wẽnnaam, f Soaala, sẽn kõ-f noore tɩ f kʋ.

¹⁸ Woto b kõn zãms-y tɩ y wɩɩb wala b sẽn wɩɩb ne b wẽn-naandsa ye. Y waoog wẽn-naandsã, bãng-y tɩ y beega Wẽnnaam, y Soaala.

¹⁹ F sã n wa gũbg tẽng n na n wẽ-a n sooge, tɩ zabra wa tadgdẽ, da zẽk f zende n kɛɛg tɩɩg ye, tɩ yaa tɩɩsã n na n dɩlg-fo. Dẽnd yĩnga da kɛɛg-b ye. Pʋʋg tɩɩg ka ninsaal tɩ f na n gõdg n zab ne-a ye.

²⁰ Yaa tɩɩs niyns sẽn ka womd-b biisa bala la f tõe n kɛɛg n wʋk n pag tẽngã n wa tõog-a zãnga.