Yaoolem 2 - SEBR SÕNGO

¹ D wẽnemda d nens n tees we-raoogo, d dɩka Rudum Mogr sore, wala d Wẽnda sẽn da wilg-ma, la d yõka Seyir tãnga gilgri, n tar gilgri.

Edom, Moab la Amon tẽnse

² Soaala-Wẽnd waa n yeel-m-la raar a ye:

³ ‹Yaa raar zãr la y sẽn tar tãnga gilgri, tees-y nug goabg marsã!

⁴ Yeel-y neba woto: Pãrg-y y saam-biis a Ezayu kamba tẽnse tɩ yaa Seyir la b kẽeda. B na n yãee yãmb n dig rabeem, la maan-y gũusgu.

⁵ Da maan-y zabr ne b ye, tɩ y ka na n paam fɩ b tẽn-peelmẽ ye. Y kõn paam sẽn sek y nao pʋg tabgr ye, tɩ m dɩka Seyir tãng n kõ a Ezayu.

⁶ Y na n daa rɩɩbã y sẽn na n dɩ wã, n da kooma y sẽn na n yũ wã.

⁷ Wẽnnaam, y Soaala, ninga y tʋʋma fãa barka, b yãenda y kẽn we-raoogẽ ka. Yaa yʋʋm pis-naas tõre la y Soaala be ne yãmba la bũmb ka paoog-y ye.›

⁸ D yeelame tɩ d kõn tũ Seyir, d saam-biis a Ezayu kamba sẽn kẽed tẽng ningã. D basa bãg-faaga sora rɩkre, d gila Elat la Esiõ-Gebɛr. D teema sore, d wẽnemdame n tees Moab zĩ-peen-daaga.

⁹ Soaala-Wẽnd yeel-m lame: ‹Da saag n zab ne a Moab ye, da bob tãp ye, f kõn paam bũmb n soog a tẽn-peelmẽ ye, tɩ yaa Ar la m dɩk n kõ a Lot kamba.›

¹⁰ (Emitsa n da kẽed tẽn-kãnga. Yaa neb yʋʋr sẽn da yi, tɩ b sõor ya ka tɛka, n leb n ya nin-daad wa Anakitse.

¹¹ Kẽer da naagd-b-la ne Refayitse, tɩ kẽer me mams-b ne Anakitsẽ la Moab rãmb ra boond-b lame tɩ Emitse.

¹² Yaa wa Oritsa sẽn da kẽed Seyir, la a Ezayu kamba ra waa n dig-b lame n yiisi, n sɛɛs-b zãnga, n deeg-b tẽngã, wala a Israyɛl me sẽn maan ne tẽng ning Wẽnd sẽn kõ-a t'a sooge.)

¹³ Marsã yik-y n dɩk y sore, gãndg-y Zerɛd kʋɩl-bɛɛgã. Tɩ tõnd na n sɩd gãndg Zerɛd kʋɩlgã.

¹⁴ D sẽn da yi Kadɛs-Barnea n sɩng kẽna, yaa yʋʋm pis-tã la a nii la d maan yã n yaool n dʋʋg Zerɛd kʋɩl-bɛɛga. Dẽ tɩ sẽn da tõe n tak-b zabr wakat kãng fãa da loogame. Soaala-Wẽnd meng ra pʋs n kãab-b-la rẽnna.

¹⁵ Soaala-Wẽnd meng ra tusd-b-la ne b nug n yiisd-b n togend b bɛɛba n wa sɛɛs-b zãnga.

¹⁶ Sẽn zĩnd b zaba sɩngrẽ sẽn waa n loog zãnga,

¹⁷ la Soaala-Wẽnd sẽn yeel-m:

¹⁸ ‹Dũnna f na n gãndga Moab toaaga, n kẽ Ar tẽn-peelmẽ.

¹⁹ F na n kẽe Amon toaagẽ. Da sɩng zabr ne a neba ye, da zẽk zab teoog b zug ye. F kõn paam bũmb Amonitsa tẽn-peelmẽ ye tɩ m dɩk-a lame n kõ a Lot t'a sooge.›

²⁰ B ra geta tẽn-bãmb me wa Refayits tẽnse. Sɩda Refayitsã n deng n zĩnd be la Amonitsa ra boond-b lame tɩ Zamzumitse.

²¹ Bãmb me yʋʋr da yiime, tɩ b sõor ya ka tɛka, n ya nin-daad wa Anakitse, la Wẽnd basame tɩ Amonitsa sɛɛs-b zãnga n deeg b zĩiga.

²² Yɩɩ boto yɛs la Soaala-Wẽnd maan ne a Edom, a Ezayu kamba sẽn da kẽed Seyir. B menesa Oritsa bãmb taoore, n deeg b zĩig n kẽedẽ n tãag rũnna.

²³ Yɩɩ boto me ne Avitsa sẽn da kẽed Gaza tẽn-bõonese. Yaa neb sẽn yi Kaftor n waa sɛɛs bãmb n deeg b zĩig n kẽedẽ.

²⁴ Soaala waa n yeelame: ‹Yik-y n dɩk sore, gãndg-y Arno kʋɩl-bɛɛga, yãmb nugẽ la m na n dɩk n sagl Amoritga Siyõ, Esbõ dĩma, yẽ ne a soolma zãnga. Tɩ sɩng-y zabr ne-a, tɩ reeg-y yã a soolma.

²⁵ Rũnda tɛka m na kɩtame tɩ dũni wã neba fãa rigd la b yɛɛsd y taoore. Y yʋʋra sã n pʋd bala, b na n saoo kalwaare.›

Siyõ rĩm lʋɩɩse

²⁶ M zĩnda Kedemot n tʋm neb Esbõ dĩm a Siyõ nengẽ, m tʋm-b-la ne laafi koeese:

²⁷ ‹Bas-y tɩ m tũ y tẽnga so-raoogã n looge! Dĩma so-raooga la m na n tũ, n ka bʋdg goabg bɩ rɩtg ye.

²⁸ Dɩɩba m sẽn na n dɩ wã, wa ne tɩ m da; kooma m sẽn na n yũ wã, wa ne tɩ m da. Bas bala tɩ m tũ f tẽnga ne nao n looge.

²⁹ A Ezayu kamba sẽn kẽed Seyir, Moabitsa sẽn kẽed Ar, bãmb fãa kõ-d-la sor tɩ d looge. D datame n dʋʋg Zʋrdẽ kʋɩlgã n tãag tẽng ning d Wẽnda sẽn kõt-d tɩ d sooge.›

³⁰ La Esbõ dĩm a Siyõ ka sak tɩ d loog ye, tɩ Soaala, y Wẽnnaama ra kidba a sũuri, sẽn na yɩlẽ n dɩk-a n sagl y nugẽ naana naana, tẽng ning y sẽn be a soab pʋgẽ rũnna.

³¹ La Soaala-Wẽnd yeel-m lame: ‹Ade, m zoe n dɩkda a Siyõ ne a tẽngã n kõt-fo, sɩng tẽnsa soogre sɩng ne a Siyõ rẽnna.›

³² A Siyõ yii ne a neba n na seg-d la a tak zabr ne-do, Yaas tẽnga.

³³ La Wẽnnaam, d Soaala, rɩk-a lame n kõ-do; d zabame n tõog-a, yẽ ne a kamba la a tãb-biisa fãa.

³⁴ D kẽ-la a tẽnsã, n pʋlem tɩ d kõn kees bũmb b pʋgẽ ye: pagba, rapa la kom-bõonego. Bũmb ba a ye ka kees ye.

³⁵ D sẽn kees yaa b rũmsã la b laogã, wala d sẽn maan tẽns a taabã d sẽn pãb n deegã.

³⁶ Sẽn sɩng Arowɛr sẽn be Arno kʋɩl-bɛɛga noore, n ta tẽng ning sẽn be bogda pʋga, n ta Galaad, tẽng ka zĩnd t'a soogr yɩ toog ne-d ye. Wẽnnaam d Soaala dɩka fãa n bas d nugẽ.

³⁷ Yaa Amon kamba tẽng bala la d ka pẽnege. D pa sɩɩs tẽns nins sẽn be Yabok yaanga ye, d pa pẽneg tẽns niyns sẽn be tãmsa zuta ye. Soaala-Wẽnd sẽn yet tɩ d da sɩɩs b rãmbã, d pa sɩɩs ye.