Yaoolem 19 - SEBR SÕNGO

Soondg tẽnse

¹ F Wẽnnaam, f Soaala, sã n wa wã bu-zẽmbã f taoore, n deeg b tẽnsã n kõ-fo, f sã n wa kẽed b tẽnsã la b rotã,

² f na n yãka tẽns a tãabo n welg-b toore, f soolmẽ, Wẽnnaam, f Soaala sẽn na n kõ-fã,

³ f na sõog kug a tãab zugu vẽenem ning f buuda sẽn paam Wẽnnaam, f Soaala, nengẽ wã la soya sẽn digd tẽns a tãabã sẽn yãkã la woto nin-kʋʋd fãa paamda a soondg zĩiga.

⁴ Ad sẽn na n tũ ne bũmb ninga tɩ nin-kʋʋda wa kẽ tẽn-bãmb pʋsẽ n paam n põse. Yaa a sã n kʋʋ ne yĩdgu, beem da ka be sʋk ye.

⁵ Yaa wa ned sẽn tũ a to n kẽng weoogo n na n tɩ kɛ tɩɩse. La kɛɛba sẽn waa n kɛɛdẽ wã, ned a ye lar baagame n tɩ wẽ ned a to t'a ki, nin-kʋʋda tõe n zoe n tɩ soond tẽn-kãens pʋsẽ n põse.

⁶ Ned ninga sẽn tõe n daag zɩɩm n dol zɩɩma da yik ne sũ-puuri n pʋg nin-kʋʋdã, n yet tɩ sora sẽn wogma a na paam n kʋ-a t'a nan ka ta soondga tẽng ye. B ka tog n kʋ-a ye tɩ yaa yĩdgu, beem da ka be sʋk ye.

⁷ Yaa rẽ me yĩng la m kõt f noor kãngã: ‹Welg tẽns a tãab toore.›

⁸ La Wẽnnaam f Soaala sã n yãend tɩ f reegame la f tũu noy niyns m sẽn kõt-f rũnna, n nong Wẽnnaam, f Soaala, beoog sẽn vẽege, n ka bʋdg sore,

⁹ b na yalg f soolma, wala b sẽn pʋlem f yaab rãmbã n dɩk tẽnga zãng n kõ bãmbã. Dẽ marsã la f lebd n paas soondg tẽns a tãabo.

¹⁰ Woto, yell sã n ka rog a zugu, b kõn daag ned zɩɩm y tẽngẽ, zĩig ning Wẽnnaam, f Soaala, sẽn yãk pʋɩɩr f yĩngã. Zɩɩm sã n daage, taal be-la f zugu.

¹¹ Ned sã n kis a to, n gũusd-a, n wudg n yẽeg-a n pãb n kʋ, n yaool marsã n zoe n kẽ soondg tẽng a ye,

¹² tẽnga nin-kẽemsã na n tʋma neb tɩ b tɩ yõk-a la b na bas-a-la sẽn tõe n daag zɩɩm n dol zɩɩma soab nugẽ, t'a yãk a yõore.

¹³ Da bas t'a weoog kẽ-f ye, da bas tɩ b raag f tẽngẽ, ned sẽn ka beeg zɩɩm ye, tɩ woto la f na n paam sũ-noogo.

Ned kam fãa ne a toaaga

¹⁴ Da teem f yak toaag kugr ye. Toaaga pa, wa pipi kẽedba sẽn deege, wa Wẽnnaam, f Soaala, sẽn kõ-b tɩ b sooge.

Kaset dãmba

¹⁵ Ned sã n kʋ, ned sã maan wẽnga, a sẽn maan a soab fãa, yella kaset soab ka yikd, yẽnd a ye, n tɩ kõ kaset ye. Yella tog n welga ne kaset dãmb a yiib bɩ a tãabo.

¹⁶ Ned sã n wa ne kaset zirẽ n yet t'a zagl sʋgda a taab tɩ b kɩɩs noore,

¹⁷ neb a yiiba sẽn tar kasetã, tata maan-kʋʋdba la bʋ-kaoodba taoore, bʋ-kaoodb niyns sẽn so-b tʋʋmd wakat kãngã taoore,

¹⁸ bʋ-kaoodba na n vɛɛsa yella neere, la b sã n mik tɩ yaa rõadga, tɩ yaa zirẽ-beedo,

¹⁹ b maanda ne yẽ soaba wala a sẽn da rat tɩ b maan a tũud-n-taagã. F yiisda wẽng f tẽn-peelmẽ.

²⁰ Neb a taaba na wʋme, rabeem na yõk-ba, la b na vẽ ne yell a woto maaneg f tẽngẽ.

²¹ Da bas tɩ nimbãaneg yõk-f ye: vɩɩm donda vɩɩm, nif ronda nifu, yẽnd donda yẽnde, nug ronda nugu, naoor donda naoore.