Yaoolem 17 - SEBR SÕNGO

¹ Da saag n wa ne Wẽnnaam, f Soaala, taoore, naaf bɩ pesg sẽn tar bãnd ye. Yaa bũmb Wẽnnaam, f Soaala, sẽn ka reegde.

² B sã n yãend tẽng ning Wẽnnaam, f Soaala, sẽn kõ fooma pʋgẽ, pag bɩ rao sẽn maand Wẽnnaam, f Soaala, sẽn kisi, bũmb sẽn sãamd b zoodã,

³ b sã n yãend pag bɩ raoa sẽn waoogd wẽnd-dãmb a taaba la a wõgemd b taoore, n wõgemd wĩntoog taoore la kiuugu la yĩngr ãdsa fãa taoore, rẽ yaa bũmb m sẽn pa kose.

⁴ Sã n yaa ned n wa n togse, bɩ f wʋma woto tɩ b gomda, modg n pʋg yella nao la f sã n sɩd tara kaset tɩ wɩɩbd a woto buud maana Israyɛl tẽn-peelmẽ,

⁵ f kɩtdame tɩ b tall n wa tẽnga noor, paga bɩ raoã sẽn maan yellã, tɩ y lab-a n kʋ.

⁶ La tog n paama neb a yiib bɩ a tãab kaseto n yaool n kʋ beegdã. Kaseta sã n ya nin-yend kaseto, b pa kʋʋd a soab ye.

⁷ Kaseta rãmb n lobgd pipi tɩ sẽn ket-ba yaool n pʋge. Da bas yel-maand f sʋk ye!

Bʋʋda kaoob yaa toogo

⁸ Zɩɩm sã n daage, bɩ sãmpogre n pogle, bɩ kɩɩs-taab n yiki, la f gesame tɩ yella welgr yaa toogo, f kẽngda tẽng ning Wẽnnaam, f Soaala, sẽn yãk tɩ ya b waoogr zĩigã.

⁹ F tʋgd n yãenda Levits niyns sẽn ya maan-kʋʋdbã la sẽn so-b bʋʋda wakat kãnga. Bãmb la f na n sok tɩ b wilg-f fo sẽn na n maanega.

¹⁰ Fo tũuda b sẽn wilg foom, Wẽnnaam sẽn yãk b waoogr tẽngẽ wã, n da bas tɩ bũmb ba a ye pa ye.

¹¹ Tũ n da kɩll goabg bɩ rɩtgo, tũ b sẽn yet tɩ f maan bũmb ningã.

¹² Bãng tɩ ned ninga sẽn na n maan waa a sẽn tagse, n pa kelg Wẽnnaam, f Soaala, maan-kʋʋdã la bʋ-kaoodã, b yiisda yẽ soab nin-vɩɩs sʋka. Zãag a Israyɛl tẽn-peelem ne wẽng buud fãa.

¹³ Neba fãa na wʋme n dig rabeem la ned kõn le saag n welg yell a meng a toor ye.

Wẽnd sẽn dat dĩm ningã

¹⁴ Israyɛl, ad-f sã n wa kẽ tẽng ning f Soaala-Wẽnnaam sẽn kõt-f tɩ f soogã, f sã n paam n me f roto, la f sɩng n gomd f sũurẽ: ‹M data dĩm n kõ m menga n wẽneg buud niyns fãa sẽn gũbg-b maama,›

¹⁵ bãng tɩ f sẽn na n bao a soaba tog n yɩɩ neda f Wẽnnaam, f Soaala, sẽn zoe n yãke. Kẽ f buuda pʋgẽ n bao f dĩma. A ra yɩ sãana la bu-zẽn ye.

¹⁶ A wiidi wã ka tog n yɩ wʋsg tɩ loog ye. A ra saag n tall buudã n leb Ezipt tẽng tɩ be n be wiidi wʋsg ye. Soaala-Wẽnd yeel-f lame: ‹Da le gõdg n dɩk so-kãng ye.›

¹⁷ Dĩma pagba me ka tog n yɩ wʋsg ye. A sũura wat n tedgame. A wanzurf la a sãnema me ka tog n yɩ wʋsg tɩ loog ye.

¹⁸ A sã n wa rʋ a naama goeele, a na kɩt tɩ b gʋls a yĩnga, bũmb ning fãa sẽn be noora sebrẽ. Yaa maan-kʋʋdba sẽn ya Levitsa nengẽ la a na n deeg sebrã.

¹⁹ Noora sebr paada a sɛɛgẽ t'a karemda beoog-beoog fãa. Woto a na zãms n zoe Wẽnnaam a Soaala nifu n deeg la a tũ bũmb ning fãa sẽn gʋls a pʋgẽ,

²⁰ n da wa lebg zẽk-m-meng soaba, a soolma rãmb nifẽ, la a bas noorã n bʋdg goabg bɩ rɩtg ye. Woto me la yẽ ne a kamb na n kaoos Israyɛl naama goeela zugu.