Yaoolem 15 - SEBR SÕNGO

Sam kiisg yʋʋmde

¹ Yʋʋm a yopoepoe, yaa sama kiisgu. Ned ka le tar y samd ye.

² Ad sama sẽn na n kiis to-to: B sã n moon Soaala yʋʋr yĩnga tɩ yʋʋmda yaa sam kiisg yʋʋmde, ned ning fãa sẽn peng a to bũmbu, ka le so a sẽn peng-a ye. A ka tõe n modg tɩ b lebsa a bũmba ye, a kõn modg a ba-biiga bɩ a saam-biiga, tɩ b mooname, tɩ Soaala-Wẽnd yĩnga, bɩ b ra sok samd yʋʋmd kãng ye.

³ Sã n ya sãana b tõe n modga yẽ. Sã n ya f saam-biiga, kell n bas taale.

⁴ Modge, Israyɛl biiga, tɩ naong soab ra zĩnd f tẽngẽ ye, tɩ Soaala-Wẽnd kũuna ka na n paoog-f tẽng ning b sẽn dɩk n kõ-f tɩ f sooga pʋgẽ ye.

⁵ Fo yee n modg bala n deeg Wẽnnaam noya fãa b sẽn kõt maam tɩ m deege n wilg-f rũnna wã.

⁶ Wẽnnaam, f Soaala, kõn pa n ka ning f bark wala b sẽn kãab fooma ye. Woto wã, fo na n deega bobelle buud wʋsg nengẽ n yaool n dɩk f bũmb n peng-ba la buud ba a ye kõn deng n deeg fo bũmb n yaool n peng-f ye. Fo na n sooga buud wʋsgo la buud ba a ye kõn soog foo ye.

⁷ F saam-biig a ye sã n be ne foo, tẽng a ye pʋgẽ, Wẽnnaam, f Soaala, sẽn na n deeg n kõ fooma, la f saam-biiga yaa naong soaba, fo kõn kʋɩɩs f sũur ne-a ye.

⁸ F na yaag f nugu yalengo, f na reeg bũmb a nengẽ n yaool n kõ-a a sẽn tar bũmb ning fãa tʋʋmde.

⁹ Da bas tɩ tags yaals wa f sũurẽ tɩ f yeele: ‹Yʋʋmd a yopoe soaba zoe n taame, bas sama taal yʋʋmda zoe n vẽkame,› tɩ f na n kʋɩɩs f sũur ne naong soaba n bas-a n ka kõ-a bũmb ye. F maan boto, f na maan wẽnga la naonga soab na kãab-f beed ne Soaala-Wẽnde.

¹⁰ Bao wʋsg n kõ-a la kõ-a ne sũ-noogo, la Naaba-Wẽnd me na ning f tʋʋma fãa bark la yõodo.

¹¹ La m sẽn mi tɩ naong soab ka tõe n ka zĩnd f tẽngẽ, m kõt-f-la no-kãnga: Ypk f nug yalengo f saam-biig yĩnga. Nimbãan-ned la naong soab sẽn naag-b foom n kẽed tẽng a ye wã, puk f nug b yĩnga.

Yembs basgo

¹² Israyɛl kamba sʋka, pag bɩ rao sã n kẽes a meng yembd f zakẽ, la a sã n tʋma wala yamba, yʋʋm a yoobe, yʋʋmd a yopoe soaba f na bas-a t'a yi n looge.

¹³ F sã n wa yet t'a yi n looge, f ka basd-a t'a loog ne nug vɩʋʋg ye.

¹⁴ F na bao kũun n zam-a, kũun sẽn yi f wubrẽ, f zɛɛgẽ, f bugsuntungẽ. F sẽn kõtã ka yit zĩig a to tɩ ka Wẽnnaam, f Soaala, nengẽ ye.

¹⁵ F na tẽeg tɩ f meng yɩɩ yamb Ezipt tẽnga la Wẽnnaam, f Soaala, n yiis-f yembdẽ. Dẽnd me yĩng la m kõt-f no-kãnga rũnna.

¹⁶ La f yem-daooga sã n yeel foo: ‹M pa rat n yi n loog ye,› a sẽn nong foo yĩnga, a sẽn nong foo ne f zaka, la a gomd tɩ bũmb k a paoog-a,

¹⁷ fo na n baoo pĩim n dɩdg a tʋbra ne f roog lugri n vʋdge la a na lebg f yamba, daar fãa yĩnga. Sã n ya yem-poaka, le yaa boto la f maanda.

¹⁸ Bas yamba t'a loog n soog a mengã, da ges rẽ wa bũmb sẽn ya toog ne-f ye t'a sẽn tʋm f zakẽ yʋʋm a yoobã, a kẽes-f-la yõodo naoor a yi, n yɩɩd tʋʋm-tʋmd sẽn deegd yaoodo. Bas-a t'a soog a menga, la bãng tɩ Wẽnnaam, f Soaala, na ning f tʋʋmd fãa yõodo.

Wẽnd n so bi-rẽenga

¹⁹ F na n dɩkame n kõ Wẽnde f rũng fãa pipi biig sẽn ya raoogo, yaa rũng sẽn ya bedr bɩ rũm-bila. Da tʋm ne rũm-bedr pipi biig ye. Da wõrs f pesg bɩ f bʋʋg pipi biig sẽn ya raoog kõbd ye.

²⁰ Yaa Wẽnnaam, f Soaala, taoor la f na n wãb a nemdo, foo ne f zak rãmba, Soaala-Wẽnd sẽn yãk b waoogr zĩigẽ.

²¹ Rũnga sã n yaool n tar bãnde, n ya woabg bɩ zoanga, bɩ kɩsre, b pa kʋʋd rũng kãng maoong Soaala-Wẽnd taoor ye.

²² B kʋʋd-a-la tẽnga pʋgẽ. Ned ning sẽn ya rẽgdo la ned ning sẽn ka rẽgdo naagda taab n wãb-a wala yĩsr bɩ walga.

²³ F kõn sɩɩs a zɩɩma yẽ ye. Zɩɩma raagda tẽng wa koom.