Yaoolem 13 - SEBR SÕNGO

Sɩbgr sẽn toge

¹ M sẽn yet tɩ y maan bũmb ningã, reeg-y la y tũ fãa. Gũus-y tɩ bũmb da yiisi, gũus-y tɩ bũmb da paas me ye.

² Tõeeme tɩ daar a ye bãngd bɩ ned sẽn paamd likri poog yãmb sʋka n gomd tɩ yel-bãnd n na n maane.

³ Ad-y yel-bãnd sã n sɩd maan wa a sẽn yeelã, tɩ nin-kãng kos yãmb tɩ y wa waoog la y pʋg wẽn-sãamse, wẽnd-dãmb f sẽn ka mi,

⁴ da saag n kelg a sẽn yet ye. Ya y Soaala-Wẽnnaam n tʋlg n fɛɛs yãmba n bãng y sã n yaa neb sẽn nong Wẽnnaam, y Soaala, ne y sũur fãa, ne y yalẽ wã fãa.

⁵ Y Soaala-Wẽnnaama bal la y na n tũ, bãmb nif la y na n zoe, bãmb noya la y na n deege, b koɛɛga bal la y na n kelge, bãmb bal la y na n waooge, y na n dɩka y mens n kõ bãmb bala.

⁶ Bãngdã, sẽn paamda likrã, y kʋʋd-a lame t'a tʋlgame tɩ y yi Wẽnnaam la y Soaala poorẽ, la yaool n yaa bãmb n yiis yãmb Ezipt tẽnga, bãmb n fãag yãmb yembdo. Nin-kãng da ratame n tak yãmb n yiis sor ning Wẽnnaam, y Soaala, sẽn wilg yãmb tɩ y tũ wã. Y na menes rat-wẽng soabã y sʋka.

⁷ Y ba-biiga, y ma biiga, y bi-ribl bɩ y bi-pugla, y pʋg-nongre, y tũud-n-taaga sẽn zems wa yãmb, sã n soos n wa yeel yãmba: ‹Wa-y tɩ d pʋg wẽnd-dãmb a taaba,› wẽnd-dãmb y menga la y ba rãmb sẽn ka bãnge,

⁸ wẽnd-dãmb sẽn paamd waoogr buud niyns sẽn zãr-b ne yãmba nengẽ, bɩ sẽn pẽ-b yãmb n gilgã nengẽ,

⁹ y kõn sak ye, y kõn kelg-a ye, da yeel-y tɩ y nong-a lame ye, da zoe-y nin-kãng nimbãaneg ye, da zab-y n sõng-a ye.

¹⁰ Y tog n kʋ-a lame. Y meng nug n dengd n sɩɩs-a tɩ neb a taaba yaool n wa baas.

¹¹ Y labd-a-la ne kuga t'a ki, t'a baoome n na n zãag yãmb ne Wẽnnaam, y Soaala, sẽn yiis yãmb Ezipt tẽnga, y yembd tẽnga.

¹² A Israyɛl kamba na wʋm yellã, b na rig rabeem, la b kõn saag n maan wẽng a woto buud y sʋk ye.

¹³ Ade, Israyɛl, fo sã n zĩnd f tẽngẽ, tẽng ning Soaala-Wẽnnaam sẽn kõt yãmba pʋgẽ, n wʋm tɩ b gomd

¹⁴ tɩ nin-yaals n yik n kẽesd b taab weoogo la b yet-b: ‹Wa-y tɩ d tɩ waoog wẽnd-dãmb a taaba, wẽnd-dãmb y sẽn pa mi,›

¹⁵ f na maan gẽesgo, sogsgo, vɛɛsgo, la f sã n wa bãng tɩ wɩɩbd a woto sɩd maana y sʋka,

¹⁶ f koota tẽnga rãmb fãa ne sʋʋse la f kãab tẽnga beedo, la f kood a rũmsa fãa.

¹⁷ Wʋk b laoga fãa n zam b tẽnga sʋka la f naag-b ne tẽngã n yõog bugum, Wẽnd yĩnga. Tẽnga lebgda raboogo, zamaan sẽn wate la b kõn le yik a raboog ye.

¹⁸ F nug ra sɩɩs fɩ: b kãaba tẽnga beedo. Woto la Soaala sũur na n maage, tɩ f rɩ b nonglma kaseto la f lebg tẽn-kãsenga, wala Wẽnd sẽn kãab f yaab rãmba.

¹⁹ La rẽ yaa f sẽn kelg m koɛɛgã la f reeg noya m sẽn wilgd dũnna wã, n maand sẽn ya tɩrg Wẽnnaam, f Soaala, nifẽ.