Yaoolem 12 - SEBR SÕNGO

SẼN BE NOORA PƲGẼ Waoogr zĩiga

¹ Ad noya la rog-n-mik niyns y sẽn na n tũ y vɩɩma zãnga, tẽng ning y Soaala, y yaab rãmba Wẽnd, sẽn kõt yãmb tɩ y soogã.

² Sãam-y zĩis niyns fãa buud niyns y sẽn dig n yiisa sẽn da waoogd b wẽn-naandsã, tãmsa zutu, tãn-bi wã zutu, tɩɩsa sẽn tob n yɛsẽ wã tẽngre.

³ Y na pãb b maan-kugã n sẽege, n wã b kug peesdi wã, n yõog b ra-lug-bɛda bugum, n to n bõgs b wẽn-naandsã, n menes b yʋʋra menga.

⁴ Tẽnga rãmb sẽn da maand bũmb ningã, da maan-y boto ne Wẽnnaam, y Soaala ye.

⁵ Soaala-Wẽnd sẽn yãk zĩig ning n maan b belem la b waoogr zĩigã na n yɩɩ sags a taaba fãa zĩiga, na n yɩɩ zĩ yɛng la b na n tigim. Be la y na n kẽng n tɩ waoog-ba.

⁶ Be bal la y na n wa ne y yũ-nood maando, laafi la sugr kosg maando, pʋɩɩr a ye piig zugã, yamleoog kũuna, kũun niyns y sẽn pʋlme, y rũms bɛda la y rũms bõonesa kom-dẽemse.

⁷ Be la y na n dɩ Wẽnnaam, y Soaala, taoore la y yik n kɩdem sũ-noogo ne y zak rãmba, y mens la y tʋʋma sẽn paam bark wakat ning fãa y Wẽnnaam, y Soaala, nengẽ.

⁸ Y ka na n kell n maan wala d sẽn maand dũnna, tɩ ned kam fãa maanda wala a sẽn tags tɩ rẽ la neere.

⁹ Y nan ka kẽ y vʋʋsga tẽng ye, y nan ka reeg y buuda pʋɩɩr y Soaala nengẽ ye.

¹⁰ La y na n dʋʋga kʋɩlgã n deeg pʋɩɩrã y Wẽnnaam, y Soaala, sẽn kõt yãmbã. B na n kõ-y-la vʋʋsgo, n zãag-y ne y bɛɛba rɩdgre tɩ y be y zagsẽ n ka mi yɩɩr ye.

¹¹ Zĩig a ye la Wẽnnaam, y Soaala, na n yãk t'a yɩ b waoogr zĩiga, yaa zĩ-kãng la y na n wa ne m sẽn yet tɩ y wa ne bũmb ningã: y yũ-nood maando, y laafi la sugr kosg maando, y yamleoog kũuni, y sẽn wat ne bũmb ning fãa n na n pids y sẽn pʋlem Naaba-Wẽnde.

¹² Y na n kɩdma sũ-noog y Soaala taoore, yãmb ne y kom-dibli la y kom-pugli, y yemse la y yem-pogse la Levitsa sẽn naag n kẽed ne yãmba n yaool n ka tar b buud pʋɩɩr wa yãmbã.

¹³ Da saag-y n yãend zĩ-yaare n yet tɩ be la y na kʋ y maanda ye.

¹⁴ Yaa Soaala-Wẽnd sẽn na n yãk zĩig ning y buud a ye rãmb pʋɩɩrẽ la y na n kʋ y yũ-nood maandã. Yaa be la fãa na n maan wa m sẽn wilgã.

¹⁵ Bũmb sẽn be, yaa tɩ y tõe n kʋ rũmsi n wãb b nemdo tẽns niyns y sẽn dat pʋgẽ, la wala y sẽn dat tɛka, la wala Wẽnd sẽn kõ-y ne b nonglem. Ka get f yɩlgame bɩ yell ket n be f zug ye, rũms kãens nemd wãbda wa yĩsr bɩ walga.

¹⁶ Bũmb sẽn le be yɛsa, y ka na n dɩ zɩɩm ye. Raagd-a-la tẽng wala koom.

¹⁷ Da lɛɛg-y n dɩ, tẽn-kãng pʋgẽ, kooda sẽn yãk peoog a ye piig zugu n kõ Wẽnnaama ye; da lɛɛg-y n yũ rãama wamd a ye piig zugu sẽn yãk n kõ Wẽnnaama ye la kaama me lengr a ye piig zugu sẽn yãk n kõ Wẽnnaama ye. Da wãb-y y rũms bɛdã la y rũms bõonesa kom-dẽemsa ye. Da lɛɛg-y n dɩ y sẽn pʋlem n dɩk n kõ Wẽnd ye, y meng y toor sẽn kõ ne yamleoog ye.

¹⁸ Yaa Soaala-Wẽnd taoor bal la rɩ kãens rɩta la zĩig ning bal Wẽnnaam y Soaala sẽn na wilg yã. Rɩ-y ne y kom-dibli, y kom-pugli, y yembse, y roog kamba, la Levitg sẽn naag yãmb n kẽed tẽng a ye. Kɩdem-y sũ-noog Wẽnnaam, y Soaala, taore, y tʋʋma sẽn dabd taoora yĩnga.

¹⁹ Modg-y n da zẽng Levitg n tãag y kũum ye.

²⁰ Naaba-Wẽnd sã n wa yalg f tẽngã, Israyɛl, wala b sẽn kãab fã, tɩ f wa yeel f sũurẽ: ‹M data nemd n wãbe.› Ad-f na wãb nemd wala f sẽn date.

²¹ Soaala-Wẽnd sẽn yãk b waoogra zĩig sã n zãr ne f tẽngã, f tõe n kʋ-la f rũm-bɛd la f rũm-bõonego Soaala-Wẽnd sẽn na n kõ-fo, wala m sẽn zoe n wilg fo, f tõe n wãb-b-la f tẽngẽ wã wala f sẽn dat tɛka.

²² F tõe n wãb-b lame wala f sẽn wãbd yĩsr bɩ walga. Sẽn yɩlga woo, sẽn yaa rẽgd woo, fãa tõe n naaga taab n dɩ.

²³ Fo ye n da saag n dɩ zɩɩm, tɩ zɩɩma la vɩɩm la f kõn naag n dɩ vɩɩm ne f nemd ye.

²⁴ Da rɩ zɩɩm ye, daag-a tẽnga wala koom.

²⁵ Da rɩ zɩɩm ye, woto f sũur na yɩ noogo, foo la f kamba, fo loogr poore, la rẽ yaa f sã n tũud so tɩrg Soaala-Wẽnd taoore.

²⁶ F sẽn na n tall bũmb ning n wa Soaala-Wẽnd taoore, b waoogra zĩigẽ, yaa f sẽn dɩk n kõ bãmbã, n paas f sẽn pʋlem bãmba.

²⁷ F na wa ne f yũ-noog maand, nemd la zɩɩm, Wẽnd maan-kugra zugu. Maanda zɩɩma raagda Soaala-Wẽnnaama, maan-kugra zugu, la nemdã, wãb-a!

²⁸ Kelg la f reeg m sẽn kõt-f noy niynsa fãa. Woto f na paam sũ-noogo daar fãa. F kamba me na paam sũ-noogo, fo loogr poore, f sẽn maan neere la f kẽn tɩrg f Soaala taoora yĩnga.

Wẽnd sẽn kisi

²⁹ Wẽnnaam, f Soaala, sã n wa menes f taoore neb niyns fo sẽn na n tɩ reeg b rãmb tẽns n kẽ wã, f sã n wa tõog-b zãnga n led b zĩiga,

³⁰ gũus n da lʋɩ b bẽdga pʋgẽ, b loogr poore, n yik n maand wa bãmb ye. Gũus n da pʋg b wẽn-naandsa ye, da sok f meng f sũurẽ: ‹Bãmba ra waoogda b wẽnd dãmba wãna tɩ m me maan wa bãmba?›

³¹ Wẽnnaam, f Soaala, yĩnga, da saag n maan boto ye. Bãng tɩ Soaala-Wẽnd sẽn kis bũmb ning wa fãa-fãa wã, bõn-kãng la b maan b wẽn-naandsa yĩnga, n tol n yõ maand b yĩnga, b kom-dibli la b kom-pugli maando.